Report dagiti Manangiwaragawag ti Pagarian
‘Ti Makasarak ti Kinasirib Masarakanna ti Biag’
“TI KINAPUDNO ti mangaw-awis kadagiti ‘amin a kita dagiti tattao,’ manipud kadagiti nadumaduma a komunidad a mangbukel iti moderno nga Estado ti Israel,” insurat ti sanga nga opisina ti Watch Tower Society iti dayta a pagilian. Naipasiguro kadagitoy nasingpet-panagpuspusona nga agsapsapul ti kinapudno: “Ta siasinoman a makasarak kaniak [ti kinasirib] masarakanna ti biag, ket magun-odnanto ti parabur ni Jehova.” (1 Timoteo 2:4; Proverbio 8:35) Ti kapadasan ti maysa a babai idiay Israel ti mangiyilustrar iti daytoy.
◻ Maysa kadagiti Saksi ni Jehova ti simmarungkar iti maysa a nagsuskribir iti Pagwanawanan ket nangiyurnos ti panangidaulona ti panagadal ti Biblia kenkuana. Maragsakan ti babai a maaddaan iti panagadal. Maysa a kaarubana ti nakangngeg iti dayta ket timmabuno met. Ti kaarrubana “insigida a nabigbigna nga isu daytoy ti banag a nabayagen a sapsapulenna iti napalabas a sumagmamano a tawen,” kuna ti report. Ket anian a panagbalbaliw ti sipapardas nga inaramidna iti panagbiagna! Isu ken ni lakayna ti adda iti sumagmamano nga aldaw laengen a panagsina ngem dayta ti kinanselarda ket nagkappiada. Ti Babai ti naigamer unay iti astrolohia ket nasinged iti maysa a kulto, ngem imbellengna amin dagiti nangingina a librona ken isuamin a bambanag a nainaig iti demonismo. Rinugianna ti timmabuno iti panaggigimong dagiti Saksi ni Jehova ket nakisarsaritan kadagiti kakabagian ken gagayyemna maipapan iti kabbaro a nasarakanna a pammatina. Maipapan kadagiti gagayyem a napukawna gapu iti dayta, kinunana: “Kaawatan, saanda a pudpudno a gagayyem.”
Itan daytoy a babai ti mangaskasaban a siraragsak kadagiti sukida iti paglakuan a kukua ti pamiliada ken makiramraman a regular iti panangaskasaba iti naimbag a damag kadagiti binalaybalay. Anian a ragsakna ta isu nasarakanna ti kinasirib ket naammuanna ti maipapan kadagiti nakaskasdaaw a sagana ni Jehova maipaay iti biag nga agnanayon idiay baro a sistemana! Ti kaarrubana nga immuna a nagsurat a dimmawat ti suskripsion ti nangitultuloy met ti panagad-adalna ket rumangrang-ay met.
◻ Ni Lloyd ti agtataeng idiay Guyana. Ti panagmartsana a nagturong iti narelihiusuan a pannakawayawaya ket nakaat-atiddog. Rinugianna ti pannagnana kas maysa a Presbiteriano. Inasawana ti maysa a Hindu ket uray isu nagbalin met a Presbiteriano. “Nakellaatak iti kinamanaginsisingpet” nga adda iti dayta a relihion, kunana iti kamaudianan. Gapuna isut’ nagturong iti Islam, ngem uray daytoy ket saanna a pinennek ti panagsapsapulna iti wayawaya. Sumaganad pinadpadasna ti Hinduismo. Kalpasan ti pannakaammona iti adu maipapan iti reinkarnasion ken dagiti linlinteg ni Karma, nangrugi met a pagduaduaanna dagitoy a doktrina. Isu ti nagbaliw manen a napan iti okultismo, nangibangon iti maysa nga altar ket sinursuruanna ti pamiliana iti dayta a pannursuro. “Ngem dagiti nakabutbuteng ken nakaam-amak a kapadasan ti namagtalaw kaniak ken ti pamiliak manipud iti daytoy a relihion,” kunana. Sinurotna ita ti materialistiko a panagbiag, ngem ti pamiliana ti masinasina. Gapuna kinunana: “Nagkararagak iti Dios, Ama, ni Allah, ken ni Ram ket imbagak kenkuana a makisasaoak iti Namarsua kadagiti isuamin a bambanag. Impakaammok kenkuana a kayatko ti mangay-ayo kenkuana a saan ket a ti tao.”
Iti daytoy a punto maysa a “nagsayaat ti panagkawkawesna, naemma, napakumbaba” a Saksi ni Jehova ti simmarungkar iti pagtataengan da Lloyd ket sinungbatanna a sipepennek dagiti salsaludsodna. Ti Saksi nakaibati kenkuana ti libro a, Ti Kinapudno a Mangiturong iti Biag nga Awan Inggana ken ti maysa a Biblia. Di nagbayag narugian ti maysa a panagadal ti Biblia ken ni Lloyd ken ti asawana. Rmmang-ayda iti pannakaammo, simminada manipud Babilonia a Dakkel—ti sangalubongan a sistema ti ulbod a relihion. Idi agangay indedikardan ti bagbagida ket nabautisaranda. Kuna ni Lloyd: “Ti ayat, ti pudpudno nga ayat ti nangsandin iti gura ken pungtot ket kangrunaan kadagiti isuamin, ti kinapateg ken panggep ti nainayon iti panagbiagmi.”
Itan agragragsakdan iti ‘kinapudno a nangluk-at kadakuada.’—Juan 8:32.
◻ Maysa nga agtutubo a babai idiay Seychelles ti nakaam-ammo met ken ni Jehova, nga isut’ nangibunga kadagiti bendisionna. Isu ti agbibiag a kadua ti maysa a lalaki a dida nagkasar ket addaanen ti sumagmamano nga annak iti dayta a lalaki. Inapresiar ti babai ti kinapudno a maad-adalna manipud iti Biblia ngem nakitana a narigat ti panangalana iti takderna tapno makakualipikar a maipaay iti serbisio ni Jehova. Isut’ aggigian iti maysa a nagpintas a balay nga addaan kadagiti isuamin a pagnam-ayan a tagtagiragsaken ti sumagmamano laeng a tattao. Kalpasan ti kararag ken pammaregta manipud iti manangaywan iti sirkito, pinagpilina ti lalaki a pakikabkabbalayanna—isuda ti agpakasar iti legal wenno agsinada. Ti lalaki agal-alikaka a mangala ti uray ania kadagita nga addang, gapuna ti babai pimmanaw iti balay. Anian ti ragsakna ta itan isu ti makakualipikaren a mangikaskasaba ti naimbag a damag ken mangidedikar ti biagna ken Jehova ken mabautisaran! Daytoy isu ti inaramidna. Makapainteres, ti lalaki a pakikabkabbalayanna idi ti nagsiddaaw iti natured a takderna maipaay kadagiti prinsipio ti Biblia a gapu itoy rinugianna metten ti mangaramid kadagiti urnos tapno mapagkaykaysa ti pamilia babaen iti legal a panagasawa.
Binigbig ti salmista: “Ta adda kenka [ni Jehova] ti ubbog ti biag.” (Salmo 36:9) Dagitoy a tattao binigbigda met daytoy, ket sinapulda ti kinasirib tapno maammuanda ni Jehova ken dagiti pagannurotanna a maipaay iti biag. Anian ti panangapresiarda iti kinapudno a “ti siasinoman a makasarak [ti kinasirib] masarakanna ti biag”!