Maisalakan Amin a Kita ti Tattao
1 Pagayatan ni Jehova a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Tim. 2:4) Nupay adda epekto kadagiti tattao ti natawidda a kababalin ken ti aglawlawda, addaanda iti nawaya a nakem ket mabalinda ti agpili no kasanoda nga usaren ti biagda. (Mat. 7:13, 14) Kasano nga apektaran daytoy ti panangmatmattayo kadagiti tattao a kasabaantayo?
2 Ditay koma ipagarup a ti interes ti maysa a tao iti kinapudno ket agpannuray iti nasional wenno kultural a nalikudanna wenno iti saadna iti kagimongan. Makaawis ti kinapudno kadagidiay nababa wenno nangato ti nagadalanna, kadagidiay adda iti politika, ken kadagiti propesional, ateista, ken uray kadagiti agdindinamag ti kadakesda. Adda dagiti tattao a nagduduma ti nalikudan ken saadda iti kagimongan a nangtallikud iti dati a kabibiagda ket kumitkitada itan iti masanguanan a biag iti baro a lubong ti Dios. (Prov. 11:19) Gapuna, ditay koma bumdeng a mangidanon iti mensahe ti Pagarian iti amin a kita ti tao.
3 Usigenyo Dagitoy nga Ehemplo: Pinanggep ti maysa a lalaki a patayen ti agsiuman kenkuana ngem saanna a naaramid. Idi agangay, inkeddengna ti agpakamatay ngem napaay a nangaramid iti dayta. Kalpasan a naibalud gapu iti panagtakaw ken panaglako iti droga, napaay ti panagasawana. Ita sagsagrapenen daytoy a lalaki ti naragsak a panagasawa ket nasayaat metten ti relasionna iti agsiuman kenkuana. Ania ti namagbalbaliw kenkuana? Nakiadal iti Biblia kadagiti Saksi ni Jehova ken inyaplikarna dagiti naadalna. Saan nga imbilang ni Jehova a di maikari a subboten.
4 Ti kinalatak ti maysa nga agtutubo a babai kas artista iti TV saan a nangyeg kenkuana iti ragsak. Ngem, gapu ta magustuanna ti nasayaat a kondukta dagiti Saksi, immannugot nga agadal iti Biblia, ket di nagbayag mangaskasaban kadagiti dadduma. Iti uray sadino a papananna iti ministerio a panagbalaybalay, isu ket mabigbigda, ngem inlawlawagna a kayatna a maam-ammo kas maysa kadagiti Saksi ni Jehova imbes a kas maysa nga artista.
5 Idi rinugian ti maysa a Saksi nga iyadalan iti Biblia ti maysa a suskritor ti Pagwanawanan, nadamag dayta ti maysa a kaarruba ket nakipagadal. Dagus a nailasin ti kaarruba ti kinapudno a nabayagen a sapsapulenna! Saanda nga intuloy ken lakayna ti nagdiborsio ket nagkappiada nga agassawa. Naigamer idi iti astrolohia ken iti espiritistiko a kulto, ngem sidadaan a nangibelleng kadagiti nangina a libro ken amin nga adda kenkuana a nainaig iti demonismo. Di nagbayag nangrugin a tumabuno kadagiti gimong ken nangisarsarita kadagiti kakabagian ken gagayyemna iti maipapan iti baro a pammati a nasarakanna. Ita sigagagar a mangaskasaban kadagiti dadduma.
6 Ditay koma ukomen ti asinoman. Imbes ketdi, iranudtayo ti naimbag a damag kadagiti tattao iti sadinoman. Makapagtalektayo a ni Jehova, a ‘ti puso ti kitkitaenna,’ ket agbalin a “Manangisalakan iti amin a kita ti tattao.”—1 Sam. 16:7; 1 Tim. 4:10.