Report dagiti Manangiwaragawag ti Pagarian
Ti Kinapudno ti Biblia Mangyeg ti Panagkaykaysa ti Pamilia ken Kinaragsak
MAYSA nga agassawa idiay India a miembro iti iglesia ti Kakristianuan ti agap-apa a kanayon. Masansan ti asawa a lalaki pang-orenna ti asawana. Pinadasda pay a papatayen ti maysa ken maysa! Iti naminsan nangipaburek iti ghee (nalitnaw a mantikelia) ket daytat’ inyegna kenkuana a kasla tsa ngem idin insuyatna iti rupana. Kamaudiananna, inkeddengen ti babai ti agsusaid.
Adda kadi mabalin a makaiyeg iti panagkaykaysa ken kinaragsak iti daytoy nga agasawa? Adu ti mangibaga iti awan. Ngem sakbay ti panagsusaidna, ti babai napanna sinarungkaran ti anakna a babai ken ti manugangna a lalaki. Isudat’ makipagad-adal kadagiti Saksi ni Jehova. Inkeddengna ti umimdeng, ket natignay a naimbag ti pusona iti nangngeganna. Kalpasan ti panagadal, imbagana iti Saksi dagiti parparikutna. Impakitada kenkuana manipud iti Biblia dagiti rebbengenna kas asawa a babai. Nasarungkaran met ti asawana ket narugian ti panagadal iti Biblia kenkuana. Ti nagbanaganna? Agpada ti lalaki ken ti asawana iyap-aplikardan dagiti prinsipio ti Biblia, dagiti parparikutda iti pamilia naparmeken. Itan ti agasawa nagprogresodan agingga iti punto nga indedikardan ti biagda ken Jehova, ket nabautisarandan.
Adu a sabsabali pay nga agasawa ti nakasarak a ti naipaltiing a Sao ti Dios ti pudno a naglaon iti solusion kadagiti parparikut ti pamilia. Babaen ti panangiyaplikar kadagiti balakadna, kas iti masarakan idiay Colosas 3:12-14 ken Efeso kapitulo 5, dagitoy naparmekda dagitoy a parparikut ket nagun-odanda ti panagkaykaysa ken kinaragsak.
□ Ti sabali pay nga ulidan iti no kasano a ti kinapudno ti Biblia mapagkaykaysana ti pamilia naggapu idiay Lebanon. Idi 1973 maysa kadagiti Saksi ni Jehova ti nakairugi iti panagadal ti Biblia iti maysa a pamilia iti maysa a bassit a bario. Dua a babbai, agkabsat, manipud iti sangakaarrubaan ti nagatender met iti panagadal. Ngem idi ti lokal a padi binusorna ti panagadal, ti pamilia insardengda dayta. Dagiti dua nga ubbing a babbai intuloyda ti panagadal babaen iti surat, nga inusarda ti direksion ti ipagda. Kalpasan ti panangadalda ti surat manipud iti Saksi, intedda daytoy iti ipagda tapno basaenna, nupay no ti asawana ket bumusbusor. No adda salsaludsodda, imtuodenda ti Saksi babaen iti surat.
Nupay kasta, ti kabsatda a lalaki intuloyna ti panangbusorna. Pinisangna dagiti publikasion ti Biblia nga adda kadagiti kakabsatna ken ti asawana ket pinuoranna pay dagiti Bibliada. Ngem nupay nakaro ti panangsipsiput ti pamilia, ti padi, ken dadduma pay iti bario nagtultuloy dagiti ubbing a babbai iti panagadal. Kabayatanna, nabautisaranda. Dagiti dadduma a kakabagianda nagadalda met iti Biblia ket nabautisaranda. Ti bumusbusor a kabsat a lalaki dagiti dua a babbai naammuanna met ti kinapudno ket nabautisaran. Isut’ agserserbi itan kas ministerial nga adipen iti kongregasion, ket kanayon nga auxiliary payunir. Iti pagnguduan ti 1985, 23 a miembro daytoy a pamilia ti nakaammon iti kinapudno ket nabautisarandan!
Anian a nagragsak dagidiay dua nga agkabsat gapu iti panagtalinaedda iti kinapudno nupay adda pannakabusor! Anian a rag-oda a makita ti panagkaykaysa ken kinaragsak ti pamiliada kas banag ti panagawatda iti kinapudno ti Biblia! Dayta patalgedanna dagiti sasao ti salmista idi kinunana: “Naragsak ti ili a ti Diosna ni Jehova!”—Salmo 144:15.
□ Kaskasdi ti sabali pay a kapadasan ti naggapu idiay Siudad ti Nueva York, E.U.A. Daytoy a tao rinugianna ti nagusar iti droga idi agtawen iti 13 ket nakaron ti pannakaadiktona ta saan payen a makapangan agingga a saan a makasigarilio iti marihuana! Ti ugalina a panagtomar iti cocaine ti paggastuanna iti $100 iti maysa nga aldaw, ket bayat ti panaglakona iti droga kankanayon a mangawit iti dua a paltog. Isut’ nangasawa ket nakaputot iti uppat nga annak. Idi ti asawana nagbalin a maysa a Saksi ni Jehova, isut’ bimmusor. Ngem kamaudiananna nagaburido iti estilo ti panagbiagna a kanayon a pasayaaten ti droga ti riknana ken “adda kadagiti kalkalsada,” a mangar-aramid iti pannakikamalala.
Babaen iti kanayon a pammaregta manipud iti asawana ken ti naayat a tulong dagiti panglakayen, immanamong nga agadal iti Biblia kalpasan iti makatawen a pannakabautisar ti asawana. Daytoy ti nangtulong kenkuana a makapagballigi kadagiti kangrunaan a parparikut iti panangisardeng iti droga agraman ti panagar-arapaap. Isut’ rimmang-ay agingga iti bautismo ket itan addaanen iti rag-o a makakita iti pamiliana a nagkaykaysa ken dagiti uppat nga annakna rumangrang-aydan iti kinapudno. Gaput’ addaan iti pirmi a trabaho ken nasayaat a sapul, isu ken ti asawana inanamaenda ti makiraman iti serbiso nga auxiliary payunir.
[Blurb iti panid 21]
“Naragsak ti ili a ti Diosna ni Jehova!”—Salmo 144:15