Ti Panagpayunir a Serbisyo Pinaregtana ti Biagko

Kas sinalaysay ni Arthur Gustavsson

IDIAY tuktok ti naabbungotan ti niebe a Himalayas, ti kinapudno a masarakan iti Sao ti Dios a ti Biblia ti nakagteng kadagiti dadakkelko, a Fred ken Amanda Gustavsson. Dayta idi ti 1903, ket idi addaak pay laeng iti aanakan ni nanangko. Ania ti ar-aramiden dagiti dadakkelko sadiay, a nakaad-adayo manipud iti ili a nakayanakanda a Sweden?

Idi tawen 1880 immakarda manipud Sweden a nagturong idiay Estados Unidos. Isuda a dua ti addaan napigsa a pammati iti Dios. Timmiponda iti Scandinavian Mission Alliance idiay Chicago. Kalpasan ti maysa a panawen a panagsanay, naibaonda kas misioneros idiay Baltistan, a masarakan itan idiay amianan a paset ti Pakistan. Nupay kasta, di nagbayag nasarakanda a nagrigat a kumbertien dagiti Muslims kadagiti pannursuro ti Kakristianuan. Isuda a mismo nangrugida a pagduaduaan no ti Dios ket agpalpaliiw a nakauy-uyong a mangkondenar kadagidiay naayat-panagpuspusona, managpadagos a tattao iti agnanayon a pannakadusa idiay apuy a pagtutuokan no saanda a makumberte. Bassit ti pannakabigbigda a dagiti is-isipda ti maisagsagana a maipaay iti banag a nasaysayaat.

Di nagbayag immawatda ti maysa a libro manipud maysa a gayyem idiay Estados Unidos a nangbalbaliw a naan-anay iti panagpampanunotda. Dayta ti The Divine Plan of the Ages, ni Charles T. Russell, nga isu idi ti presidente ti Watch Tower Society. Binasada dayta, ket daytat’ kasla siksik ti ikan a nagtinnag manipud iti matmatada. Nakitada a silalawag a ti supapak ti basol isu ti patay, saan a ti agnanayon a panagtutuok. (Roma 6:23) Itan addaandan iti positibo a mensahe ti namnama nga agpaay kadagiti tattao​—a ti Pagarian ti Dios ti mamagbalinto iti daga a maysa a paraiso.

Ti Panagbalbaliw ti Mision

Agarup met iti daytoy a tiempo a siak ti naipasngay idiay Shigar idiay Baltistan. Di nagbayag ni Mirjam a kabsatko dimteng iti daytoy a lubong. Naikeddeng dagiti dadakkelmi a tarigagayanda ti agtrabaho iti sidong ti panangiwanwan ti Watch Tower Society tapno iwaragawag ti baro a kinapudno a nasarakanda. Nupay kasta, dagiti kasasaad ti nangpilit kadakuada nga agsubli idiay Sweden idi 1908. Idiay Göteborg rinugianda nga inkaskasaba ti ‘naimbag a damag ti Pagarian’ kas colporteurs, kas pannakaawag idi dagiti amin-tiempo a ministro. (Mateo 24:14) Bayat ti umuna a sangapulo a tawen, sinaknapanda ti intero a siudad ti namitlo a daras iti ministerio a panagbalaybalay. Adu a tattao ti nangawat iti kinapudno.

Malaglagipko pay ti maysa a Mrs. Hanna Gunnarsson a makapungtot unay idi a kuna ni tatangko a ti Biblia dina isursuro a ti tao addaan ti di matay a kararua. Indir-ina: “No awanantay ti imortal a kararua, di naimbag laengen a mapanka aglemmes idiay karayan!” Siaasi nga immisem ni tatangko ket isu ti inikkanna ti polieto nga What Say the Scriptures About Hell? Kamaudiananna ti babai nagbalin a Saksi agraman dagiti annakna a babbai. Dayta a pasamak ti nangisuro kaniak a pulos a saan koma a mariribukan​—aniaman ti kunaen dagiti tattao.

Idi agtawenakon iti sangapulo, ni Kabsat Rutherford immay idiay Göteborg tapno mangiparang iti palawag publiko a “Where Are the Dead?” Bayat ti panangiparangna, isut’ nangitukon iti $1,000 iti asinoman kadagiti agdengdengngeg a makapaneknek kenkuana a ti tao addaan iti di matay a kararua. Awan pulos ti nangawat iti karitna.

Espiritu ti Panagpayunir ti Pamilia

Gapu iti nagsayaat nga ulidan dagiti dadakkelmi, di nagbayag naakaranak met iti espiritu ti panagpayunir. Nangrugiak a makiraman iti ministerio iti nasapa nga edad. Ni tatangko ti mamalubos kaniak nga agited kadagiti handbills a mangipabpablaak kadagiti palawag publiko. Tinagiragsakko daytoy ket addaanak kadagiti sumagmamano a karkarna a kapadasan. Maysa nga aldaw sinarungkarak ti maestrak tapno isut’ awisen iti palawag. Sigugubsang a di inawat ti maestrak ti polieto. Nakellaatak ket naitibkolak pay ken natnagak iti agdan. Daytat’ maysa a leksion kaniak​—nasursuruannak nga agbalin a realistiko. Dagiti tattao ket saan a kanayon a kas iti kayattayo a pagbalinanda koma.

Ti balaymi ti nagbalin kas maysa a pagtaengan dagiti payunir, a tunggal maysa aramidenna ti rebbengenna. Siak ken ni kabsatko a Mirjam silalagipkami iti kinapateg ti panangaskasaba nga ar-aramiden da Tatang ken Nanang. Gapuna, iti kabukbukodanmi masansan daldalusanmi ti intero a balay kalpasan ti panagawidmi manipud eskuelaan.

Iti edad a 16 indedikarkon ti bagik nga aramiden ti pagayatan ni Jehova ket nabautisaranak idi 1919 idiay kumbension idiay Örebro. Iti sumaruno a tawen naawisak a makipagtrabaho a kadua ti bassit a grupo dagiti walo a kakabsat nga okupado idiay sanga nga opisina iti Watch Tower Society idiay Sweden. Dagidiay a tawtawen ti panagserbi iti sanga ti nangisaad iti pundasion a maipaay iti disiplinado ken naurnos a panagbiag iti serbisio ni Jehova.

1914​—Ti Di Maliplipatan a Tawen

Iti adu a tawtawen sakbay ti 1914, dagiti Estudiante ti Biblia, kas pangawag kadakami idi, ti kumitkita iti masanguanan iti dayta a tawen kas banag a naisangsangayan. Yantangay daytat’ natandaan iti padto ti Biblia, manginanamakami kadagiti naisalsalumina a paspasamak. Silalawag a malaglagipko pay ti Domingo, Agosto 2, 1914. Ni tatangko ti mangidadaulo ti gimong idiay Göteborg idi idiay ruar nangngegmi ti ubing nga aglaklako ti diario nga impukkawna: “Nangrugin ti sangalubongan a gubat!” Dagiti kakabsat idiay paggigimongan ti nagkikinnita iti maysa ken maysa. Dadduma kadagiti bambanag nga iwarwaragawagmi maipapan iti 1914 ket mangrugidan a pumayso.

Ti tawen 1914 kinaipapananna met ti maysa a banag ken ni Johan Severin Petersson. Ti kabsatna a babai a ni Ida ti nangibati kenkuana kadagiti tallo a libro nga insurat ni Kabsat Russell. Impagarupna a napeggadda, gapuna pinuoranna ida. Nangngeg ni Ida dayta ket, gaput’ pingetna, pinabulodanna manen ti tallo pay. Itan dagitoy ti kinandaduanna iti maysa a uyusen.

Kalpasanna immay ti Naindaklan a Gubat ti 1914. Nangngegan ni Johan a dagiti libro ti nagsasao maipapan iti dayta a petsa. Gaput’ panagusiusona, linukatanna ti uyosenna; inruarna ida ket binasana ida. Naluktan dagiti matmatana kadagiti kinapudno ti Biblia, ket isu met nagbalinen nga Estudiante ti Biblia. Isut’ nabautisaran idi 1917, ket ni Rosa nga anakna ti simmurot iti ulidanna idi 1918. Idi 1928 isu ti nagbalin nga ingungoten nga asawak ken kabinnadang iti biag iti serbisio ni Jehova.

Agdaldaliasat a Kadua ti Naimbag a Damag

Idi nangasawaak, pinanawak ti sanga nga opisina, ket siak ken ni Rosa ti nangbusbos ti honeymoonmi iti panagpayunir! Bayat ti umuna a bulan ti panagasawami, nakaipaimakami iti 4,000 a kopia ti polieto a Freedom for the Peoples.

Kalpasan laeng ti sumagmamano a bulan, napagsaludsodanak no awatek ti panagdaliasat kas regional service director, itan pagaammo kas manangaywan ti sirkito. Kaipapanan dayta ti panagsarungkar kadagiti kongregasion iti intero a Sweden ken kamaudiananna ti Norway. Awan idi ti urnos a panangitugot ti asawa kadagitoy a panagbiahe. Kasapulan ti pannakaiyadayok manipud pagtaenganmi iti innem wenno pito a lawas no maminsan, nga adda laeng ti panaginana a sumagmamano nga aldaw iti nagbabaetan ti tunggal rota. Situtulokkami nga agsakripisio ket inaramidmi dayta iti 14 a tawtawen.

Aniat’ ar-aramiden ni Rosa bayat daytoy a tiempo? Isu ti agpaypayunir a kadua ti kabsatko a babai idiay Hälsingborg, Sweden. Nagadu ti aramidenda a panagbisekleta kadagitoy nga al-aldaw tapno masaknapan dagiti nalalawa a teritoria. Ngem palubosanyo a ni Rosa ti mangibaga iti dayta nga estoria.

“Ti panagpaypayunir kadagiti 1930’s ket naiduma unay iti panagserbi itatta. Siak ken ni Mirjam ti mangabang iti maysa a bassit a kuarto iti maysa wenno dua a lawas bayat nga agakar-akarkami manipud maysa a paruko nga agturong iti sabali. Kalpasanna umakarkami nga amin dagiti badahemi ti naikarga kadagiti bisekletami​—dagiti kawkawes, pariok, ken kinahon a liblibro. Daytat’ maysa a nagpintas a buya!

“Saan a kanayon a nalaka ti agsapul ti pagdagusan. Maysa nga aldaw, kalpasan ti panagtrabahomi a nagsina, siak ken ni Mirjam ti nagsabat iti agarup alas otso ti rabii.

“Intultuloymi ti nagbisekleta aginggana iti sumaganad a pagtalonan a nakakitaanmi kadagiti silaw. Kalpasanna nabigbigmi dayta a balay. Nagsennaay pay dagiti pusomi. Dagiti tattao sadiay ket bumusorda unay idi simmarungkarkami idi immuna. Agal-alikaka, napan ni Mirjam idiay ruangan ket dinawatna no mabalinmi ti makidagos. Iti panagsiddaawmi ken pakabang-aranmi, inawat ti baket a sumrekkami ken agtugawkami. Kalpasanna napastrekkami iti kasasayaatan a kuarto, a sadiay addan ti nakadasar a lamisaan nga addaan iti nagadu a taraon. Ngangngani dikam patien dagiti matmatami! Kalpasan a nakapangankamin, dakamin ti naiturong iti siled a dagiti katre ti sisasaganan nga addaan kadagiti kasayaatan a pagules. Kasla dikam maawatan daytoy a panagbalbaliw ti kababalin.

“Iti sumaganad nga agsapa dakami ti pinagalmusarda. Idi kayatmin ti agbayad, dida kayat nga awaten ti kuartami. Sinaludsodmi no mabalinmi nga ibati kadakuada ti libro a maaw-awagan Deliverance kas maysa a sagut. ‘Ay, wen, kayatmi dayta a libro,’ kunada. ‘Imbaga ti kaarrubami nga isuda met ti inikkanyo ti maysa idi nagdaguskayo kadakuada. Kunana a tinagiragsakna unay dayta.’ “Dayta a kapadasan ti nangisuro kadakami a ditay pulos ammo no ania ti ibunga ti maysa a maipaima a literatura iti Biblia.”

Panagtalinaed iti Payunir a Serbisio

Idi 1942 naisardeng ti trabaho a panagdaliasat iti apagbiit, isu a ni Rosa ken siak ti nakasubli manen iti panagpayunir. Iti kamaudiananna ti tatang ni Rosa ti nagsakit, ket insardengmi ti amin-tiempo a ministeriomi tapno isu ti aywananmi. Nupay kasta, apaman nga impalubos manen dagiti kasasaad, nagsublikami iti paboritomi a trabaho​—ti amin-tiempo a serbisio. Mariknami a nakasublikami kadagiti umiso nga elementomi. No agawidkamin kalpasan ti makabannog nga aldaw ti panangaskasaba, masansan a maikunami: “Ti serbisio a panagpayunir ket maikari kadagiti isuamin a panagsakripisio ken panagregget a kasapulanna.”

Iti sumagmamano a tawen itan agpaypayunirkami iti makinlaud a deppaar ti Sweden, a makipagtartrabaho a kadua ti Svenljunga a Kongregasion dagiti Saksi ni Jehova. Agsipud ta lallakay ken babbaketkamin, awanankamin iti pigsa dagiti kabanuaganmi, ngem maragsakankami a makapagtultuloykami pay iti ranggo dagiti payunir. Nairingpasko itan ti 55 a tawtawen iti amin-tiempo a serbisio ket ni baketko ti 48. Nupay kasta, saankami nga agbibiag babaen kadagiti laglagip laeng, nupay dayta ti mangpasayaat iti rikriknami. Nupay kasano ti kalakay ken kabaketyo, masapul a kumitakayo iti masanguanan. Ti napasnek a tarigagaymi a ta makapagnakami koma a simamatalek ken sipapakumbaba a kadua ti Diosmi, ni Jehova, ket iti kamaudiananna magun-odanminto dagiti nakaskasdaaw a bendision ti Pagarianna nga inkaskasabamin iti amin a tiempo a serbisio iti nakaad-adu a tawenen.​—Mikias 6:8.

[Ladawan iti panid 26]

Siak ken ni baketko ti agkuykuyogen iti serbisio ni Jehova iti 58 a tawtawen