Pammadles—Uso Pay Laeng
“MABALIN a pagarupen ti maysa, nga iti daytoy nga aldaw a nasaknapen ti pannakalawlawag ken edukasion, saanen a nesesita ti panangbabalaw kadagiti pammati a naibatay iti mahika ken an-anito.” Paset daytoy ti sasao a pinirmaan dagiti 186 a natatan-ok a sientista, agraman 18 a nangabak iti premio Nobel. Aniat’ sarsaritaenda? Ti astrolohia, a gagangayen a langa ti pammadles nga agus-usar kadagiti bituen, a sigun kadakuada, “nanglapunos iti moderno a sosiedad.” Mamatpatikayo met aya a personal iti dadduma a langa ti pammadles? Wenno nalabit addaankayo ti panagduadua, wenno sipipigsa ti panangbusoryo iti dayta, kas kadagitoy nalatak a sientista? Ti panangmatmatyo iti daytoy a banag ket nasken. Kitaentayo no apay.
Daytoy nga aramid ti napalalo ti kinasaknapna. Sigun iti pannakangiwat ti maysa a gunglo dagiti mammadles idiay Paris, “4 milion a [tattao] a Pranses ti mapmapan kadagiti sikiko tunggal innem a bulan.” Idiay Estados Unidos adda napattapatta a 175,000 a paset-tiempo nga astrologo ken 10,000 nga amin-tiempo. Nakaad-aduda met idiay Gran Britania, nga addaanda pay kadagiti kabukbukodanda nga eskuelaan. Ken ti magasin a Pranses a Ça m’intéresse (That’s Interesting) ti nagkomento: “Iti isuamin a lugar, agraman ti karang-ayanen a kagimongan, maipasangotayo kadagiti kakasta met laeng nga estadistika. Dagiti sikiko umad-aduda iti panagserra ti siglotayo.”
Asino dagiti Umuman Kadakuada—Ken Apay?
Mabalin a patien dagiti dadduma dagiti laeng nababa ti adalda, dagiti nababa a klase dagiti tattao ti interesado kadagiti “siensia” ti okulto, a ti astrolohia nalabit ti kasasaknapan unay. Ngem ni Madame Soleil, maysa nga agdindinamag nga astrologo a Pranses, ti nangipanayag: “Umayda amin kaniak, umanamongda man wenno komuntra, dagiti politiko iti amin a punto de vista, ken dagiti ganggannaet a papangulo iti estado. Addaanak pay kadagiti papadi ken komunista.” Maitunos iti daytoy, idi natay ni mahiko a Frédéric Dieudonné, maysa nga artikulo ti nagparang idiay Le Figaro, maysa a serioso nga inaldaw a periodiko a Pranses, ti nanglagip nga isut’ nakaatrakar “ti kadadakkelan unay a kliente kadagiti personalidad ti Paris, dagiti ministro, natatan-ok nga opisiales, mannurat ken dagiti aktor.”
Dagiti managsugal umumanda met kadagiti astrologo tapno maammuanda no kasano ti ipupustada. Dagiti negosiante mapanda met kadakuada tapno ammuen no kasanot’ panangipuonanda iti kuartada. Dagiti astrologo situtulokda pay a mangibaga kadakayo no kaano ti panagrubbuatyo a mapan agbiahe wenno no ania ti ilutoyo. Ket dagiti mammadles rinautda met dagiti dadduma pay a tay-ak. Dagiti departamento ti polisia kadagiti nagduduma a pagilian agtungpalda kadagiti mammadles iti panagsapsapulda kadagiti kriminal wenno tattao a mapukpukaw. Ken sigun iti linawas a Le Figaro Magazine a Pranses, “ti Pentagon ti mangsusueldo ti 34 a tattao nga addaan sagut iti maikadua a panagkita a mangted impormasion no aniat’ mapaspasamaken kadagiti sekreto a base militar ti U.S.S.R.” Ti isu met laeng a magasin ti mangipadpadamag a ti kongresista ti E.U. a ni Charles Rose kunkunana a dagiti Russo nagtungpalda metten kadagiti sikiko a pannakabalin.
Apay a ti astrolohia ti kaskasdi nga agus-uso pay laeng? Maysa laeng kadi dayta a di makadangran a dibersion wenno pasa-tiempo? Dayta kadi ti kasayaatan a pamay-an a pangammuan no ania ti adda iti masanguanan—wenno adda pay nasaysayaat a pamay-an? Kitaentayo no masarakantay dagiti sungbat kadagitoy nasken a salsaludsod.