Kumpetkayto Aya iti Kinapudno?
NO NANGRUGIKAYON a makipagadal iti Biblia kadagiti Saksi ni Jehova, ti kangrunaan a saludsod a masapul a masungbatan iti kabukbukodan a pannakapnek ket, Isu aya daytoy ti kinapudno? No makitayo nga isu dayta, kumpetkayto aya iti dayta? Dagiti umas-asping a salsaludsod ti naipasango kadagiti tattao idi kaaldawan ni Jesu-Kristo ken dagiti apostolna.
Idi inkaskasaba dagiti apostol ti maipapan ken Jesus, kasano ti panagtignay dagiti tattao? Bueno, ti damag maipapan iti Pagarian ni Kristo, dagiti milagrona, ti daton a pangsubbotna, ti panagungarna, ken ti biag nga agnanayon napintas met ti panagawengna, ket adu dagiti nangawat iti nangngeganda kas kinapudno. Ngem ti kaaduan ti saan. Kinapudnona, ti organisasion Kristiano iti dayta a tiempo ti “mapagsasawanda” iti isuamin a disso. (Aramid 28:22) Gapuna ti panangawat kadagiti kinapudno nga inkaskasaba dagiti adalan ni Jesus kaipapananna ti panangsumbra ti popular nga opinion ken ti pannakaipasango iti ibubusor. Ngarud masapul a paneknekan dagiti interesado a tattao iti kapkapnekanda a dagiti Nakristianuan a pannursuro isuda ti kinapudno. Babaen laeng iti dayta a mabalindanto ti mangala iti natibker a takderda.
Idi sinarungkaran da Pablo ken Bernabe ti Asia Menor, adu a tattao ti dimngeg iti mensaheda a buyogen ti dakkel nga interes. Kuna ti rekord ti Biblia: “Ket idi rimmuarda, dinawatda nga iti sumaruno nga aldaw a panaginana maipalawag koma kadakuada dagitoy a sao. Ket iti sumuno nga aldaw a panaginana naurnong ti ngangngani isuamin nga umili a nagdengngeg iti sao ni Jehova.” (Aramid 13:42, 44) Ngem daytoy a damo nga interes ti kimmapuy idi dakkel a bilang dagiti tattao nangngegda dagiti emosional a bumusbusor a nagsao a maikontra kadagiti apostol.
Ti bersikulo 45 iti Aramid kapitulo 13 ti nagkuna: “Ngem dagidi Judio idi nakitada dagiti adu a tattao, napnoda iti agum ket sinuppiatda ti sasawen ni Pablo ket nagtabbaawda.” Kalpasanna intuloy a kinuna ti bersikulo 50 Ara 13 : “Ngem dagiti Judio sinulbogda dagiti babbai a nasingpet ken nanakman ken dagiti panguluen ti siudad, ket dinuroganda ida a mangidadanes kada Pablo ken Bernabe ket pinagtalawda ida kadagiti beddengda.” Masapul nga agdesidir dagiti tattao nga interesado no agtultuloyda a dumngeg kadagiti paspasurot ni Jesus agpapan pay ti ibubusor. Mabalin nga awatenda ti nangngegda kas ti kinapudno wenno iserrada dagiti lapayagda.
Ti Ibubusor Itatta
No kasano ti pannakabusbusor dagiti Kristiano idi umuna a siglo K.P., kasta met adda dagiti agdama a bumusbusor a padpadasenda a serraan dagiti lapayag dagiti tattao nga interesado kadagiti Nainkasuratan a kinapudno nga isursuro dagiti Saksi ni Jehova. Masansan a padpadasen dagiti gagayyem, kakabagyan ken dagiti narelihiusuan a papangulo nga upayen dagiti interesado manipud panagad-adalda ti Biblia a kadua dagiti Saksi. Uray awan dagiti Nainkasuratan a pammaneknek, dagiti bumusbusor suppiatenda ti adda a maisursuro ket agaramidda kadagiti ulbod a pammabasol.
Aniat’ rebbeng nga aramiden dagiti tattao nga interesado? Palubosandanto aya dagiti sasao dagiti bumusbusor a mangserra iti is-isip ken lapayagda kas iti dadduma kadagiti taga Antioquia? Wenno rebbeng kadi a paneknekanda a mismo manipud iti Biblia no ti ad-adalenda isu ti kinapudno wenno saan?
Nakomendaran dagiti mannakaawat a tattao iti siudad ti Beroea agsipud ta sinukimatda ti Kasuratan tapno makitada no ti imbaga ni Pablo kadakuada isut’ kinapudno. Apaman a nakitada a nga isut’ agsasao ti kinapudno, innalada ti natibker a takderda a maipaay iti dayta. Maibaga kadatayo: “Ket dagitoy [dagiti taga Beroea] nataktaknengda ngem kadagiti adda idiay Tesalonica, ta inawatda ti sao a nadardaras unay, inaldaw a sinuksukimatda dagiti Sursurat, no pudno dagitoy a banag.”—Aramid 17:10, 11.
Dagiti tattao idiay Beroea dida pinalubosan dagiti sasao dagiti bumusbusor a mangserra ti is-isipda iti naimbag a damag. Imbes ketdi, sinukimatda nga inaldaw dagiti Kasuratan tapno mapatalgedan no dagiti bambanag a nangngeganda ket pudnoda. Nakasarakda ti nagpateg a kinabaknang ket saanda a palubosan dagiti bumusbusor nga isuda ti mangiyadayo kadakuada iti dayta. Saan kadi nga isu daytoy ti rasonable a kurso nga alaen maipapan iti isu met laeng a naimbag a damag nga iwarwaragawag itatta dagiti Saksi ni Jehova?
No Apay Dadduma Bumusorda
No maminsan dagiti bumusbusor isuda dagiti nasayaat panggepna a kakabagian nga ay-ayaten ken pagraraemanyo, ket addaankay ti amin a rason a mamati a sipapasnek nga interesadoda iti pagimbaganyo. Ngem kasapulan nga usigenyo no apay a busorenda ti pannakipagad-adalyo ti Biblia kadagiti Saksi ni Jehova. Addaanda kadi kadagiti natibker a Nainkasuratan a pammaneknek a ti maad-adalyo saan nga isu ti kinapudno? Wenno ti ibubusorda ket gapu iti kinuna dagiti dadduma kadakuada? Agkurangda aya ti umiso a pannakaammo maipapan iti isursuro dagiti Saksi? Adu kadagiti bimmusor ken ni Jesus inaramidda dayta gapu iti kinakuneng iti insursurona ken agsipud ta pinatida dagiti ulbod a pammabasol dagiti bumusbusor.
Idi a naibayubay ni Jesus iti kayo a pagtutuokan, dagiti tattao a lumabas “nagsasawanda nga inngilangilda dagiti uloda ket kunkunada: ‘Ania! Sika a rebbaem ti templo ket iti tallo nga aldaw bangonem met laeng, isalakanmo ta bagim ket umulogka dita kayo a pagtutuokan.’ Kasta met dagiti panguluen dagiti papadi isu inang-angawda a kunkunada iti maysa ken maysa agraman dagiti eskriba: ‘Insalakanna dagiti sabsabali; ket saanna a mabalin nga isalakan ti bagina! Ni Kristo, ti Ari ti Israel, umulog koma dita kayo a pagtutuokan, tapno makitami ket mamatikami.’” (Marcos 15:29-32) Aniat’ rason iti daytoy nagdakes a kababalin?
Pinalubosan dagiti tattao a mabukel ti opinionda ken Jesus babaen kadagiti narelihiusuan a papangulo a nanggura kenkuana agsipud ta imbutaktakna ida kas ulbod a mannursuro a dagiti ar-aramidda ket di maitunos iti panagkunkunada a kas dagiti pannakabagi ti pudno a Dios. Sipaprangkesa, kasapulan a kunaen ni Jesus kadakuada: “Apay-apay a salungasingenyo met ti bilin ti Dios gapu kadagiti kadawyanyo? Dakayo a managinsisingpet, naimbag ti panangipadto ni Isaias iti maipapan kadakayo, a kunkunana, ‘Daytoy nga umili dayawendak kadagiti bibigda, ngem ti pusoda adda iti adayo kaniak. Ngem barengbareng ti panagdayawda kaniak, nga isursuroda dagiti sursuro a bilbilin dagiti tao.’”—Mateo 15:3, 7-9.
Nagbara unay ti pananggura dagiti narelihiusuan a papangulo ken ni Jesus ken ti kinapudno nga insurona a nagkukumplotda a mangpapatay kenkuana ket nagreggetanda amin nga ibaw-ing dagiti tattao a maibusor kenkuana. Itatta, adu met a narelihiusuan a tattao ti bumusbusor kadagiti Saksi ni Jehova iti kasta met laeng a kinabara. Ket kas iti kaso dagiti immuna a Kristiano, dagiti Saksi “mapagsasawanda” iti isuamin a disso. Ngem nainsiriban kadi ti panangipalubos iti daytoy popular nga ibubusor a mangbukel met iti panagpampanunotyo?
Ti isu met laeng a Nainkasuratan a kinapudno maipapan ti Pagarian ti Dios nga inkaskasaba ni Jesus ken dagiti apostolna ti iwarwaragawag itatta dagiti Saksi ni Jehova. Ginasgasut a ribo dagiti tattao iti intero a lubong ti mangaw-awaten iti daytoy naimbag a damag agpapan pay iti nabara nga ibubusor dagiti gagayyem, kakabagian, ken dagiti narelihiusuan a papangulo. Dagidiay umawat iti mensahe iti Pagarian ti nangpanekneken iti kapkapnekanda nga isu dayta ti kinapudno, ket determinadoda a kumpet iti dayta.
Gapuna apay nga agbalin a kas kadagidiay idi umuna a siglo pinalubosanda dagiti dadduma a mangibaw-ing kadakuada manipud iti makaited-biag a Nainkasuratan a kinapudno nga immay kadakuada babaen kadagiti di popular a paspasurot ni Jesu-Kristo? Imbes ketdi, itultuloyyo nga adalen ti Biblia a kadua dagiti Saksi nga us-usaren ti naisurat a Sao ti Dios tapno paneknekan iti kapkapnekanyo a ti naadalyo ket isu a talaga ti kinapudno. (Juan 8:32) Ket babaen iti tulong ti Dios kumpetkayo iti kinapudno.