Makipagrag-o a Kadua ti Maika-82 a Klase ti Gilead

“SAANKAMI a Kristiano iti nasayaat laeng a panniempo. Ngem naragsakkami laeng nga adda ditoy.” Babaen kadagitoy a sasao ti tsirman linukatanna ti naisangsangayan nga agmalmalem a gimong idiay Jersey City Assembly Hall of Jehovah’s Witnesses idi Domingo, ti umuna nga aldaw iti Marso. Iti ruar, agtudtudo iti kasta unay. Iti uneg, dayta ti aldaw ti graduasion iti 24 nga estudiante iti maika-82 a klase iti Gilead. Babaen iti panangmatmat kadagiti nararagsak a ruprupa dagiti estudiante, ti tsirman ni Theodore Jaracz iti Bagi a Manarawidwid intuloyna a kinuna: “Nalawag a magagaranda ken maragsakanda maipapan iti inanamaenda. Yantangay kunaen ti Biblia ‘makipagrag-oka kadagiti tattao nga agragrag-o,’ siguradoak a datay amin kasta met ti mariknatayo!” Ti panagpalakpak a nangsabet iti daytoy a komento ti nangpaneknek nga immanamong ti isuamin nga immatender a 4,557.

Ti umuna a nagpalawag iti programa isu ni John Barr, kameng met iti Bagi a Manarawidwid. Babaen iti adu a panangadaw manipud iti Salmo 104, impakitana a saan laeng a pinarsua ni Jehova dagiti isuamin a bambanag, addaan biag ken awanan biag, no di ket pinarsuana met ti lugar a maipaay a pagnaedan iti tunggal parsua. Intuloyna a kinuna: “Ita, bayat ti ipapanyo iti destinoyo, panunotenyo: ‘Inkabilnak ni Jehova ditoy.’ Dikay koma liplipatan dayta.”

Ti sumaganad a nagpalawag isu ti kameng ti Watchtower Farms Committee, ni John Stuefloten. Impalagipna kadagiti estudiante: “Ibaga ti proverbio kadatayo: ‘Ikkam ti pannursuro ti masirib a tao ket masmasiribto pay.’” (Proverbio 9:9) Bayat iti lima a bulan dagiti estudiante naikkanda iti nabaknang a naespirituan a taraon. Awan duadua, iti daytoy nga aldaw iti graduasion mariknada a nabnabsogda iti naespirituan. “Ngem,” kuna ti nagpalawag, “karugrugiyo pay laeng!” Pinaregtana dagiti estudiante a rumang-ay iti kinasirib ken kaasi tapno ad-adda pay a makabaelda a tumulong kadagiti dadduma.​—Proverbio 3:27.

Ni George Gangas iti Bagi a Manarawidwid simmaruno nga addaan kadagiti nagsayaatan ti pannakapilina a sasao maipapan iti kinaragsak. Pinalagipanna dagiti nagraduar nga agserserbida iti “naragsak a Dios” ket kinunana: “Makasarakkayto iti ragsak iti ganggannaet a destinoyo.” Apay? “Agsipud ta ni Jehova imbaonnakayo a mangisalakan kadagiti tattao manipud iti pannakaadipen.”

Ni George Couch iti Brooklyn Bethel Committee ti nagpalawag maipapan iti panagdanag. Dagiti karit iti ipapan iti Gilead, ti panagbiag idiay Brooklyn Bethel, ken ti panangasaba idiay Siudad ti Nueva York nangpataudda amin iti panagdanag. Itan dagiti estudiante madanagandan maipapan iti destinoda kas misionero. Ngem ti nainkalintegan a panagdanag saan a maysa a kabusor. “Ti panagdanag mabalin a makatulong a mangparegta kadatayo a mangaramid iti kasayaatan a kabaelantayo,” inlawlawagna, ket pinaregtana dagiti estudiante nga agtalek ken ni Jehova ken aramidenda ti kasayaatan a kabaelanda iti destinoda.

Ti instruktor iti eskuelaan a ni Jack Redford ti simmaruno a napan iti podium. Isut’ namakdaar a maibusor iti di nainkalintegan a panangbabalaw. Babaen iti panangisitarna kadagiti pagulidanan iti Biblia kadagiti nadarasudos a nangukom a nangpataud kadagiti parikut kamaudiananna, inadawna dagiti sasao ni Jesus: “Dikay agipato tapno dikayo maipato.” (Mateo 7:1) Ti maika-82 a klase ibagbagida ti maysa a Dios iti ayat. Dagiti estudiante ti maibaon iti destinoda tapno makipagrikna, saan a mangbabalaw.

Ti instruktor iti Gilead a ni Ulysses Glass inadawna ti proverbio ti Biblia: “Ti lumba saan nga agpaay kadagiti nasiglat, wenno ti bakal kadagiti napigsa.” (Eclesiastes 9:11) Ti pagbanagan ti maysa a banag saan a kanayon nga agpannuray kadagiti gagangay nga abilidadtayo. Iti trabaho a kinamisionero, masansan a dayta ti banag maipapan iti pammati ken ti kinatulok a mangawat iti karit. Kinomendaran ti nagpalawag ti maika-82 a klase iti saanda a pannakaisin, mapagtalkanda ken makituntunosda. Dagita a kababalin ti mamagtalinaed kadakuada iti nasayaat a kasasaad.

Ti maudi a nagpalawag iti agsapa, kinuna ti presidente ti Watch Tower Society a ni Frederick Franz, a ti graduasion iti maika-82 a klase intan-okna ti pammati dagidiay a nangirugi iti eskuelaan idi nalidem nga al-aldaw iti Gubat Sangalubongan II. Isut’ nagsarita maipapan iti nagan a Gilead, nga inlawlawagna a dayta ket maysa a sao iti Biblia a kaipapananna “Sangabunton a Pammaneknek.” (Idiligyo iti Genesis 31:43-53.) Dagiti misionero iti Gilead a nagtalinaed a matalek kadagiti destinoda agserbida a sangabunton a pammaneknek. Dagitoy ti sibibiag a pammaneknek iti kinapudno.

Kalpasanna inawaten dagiti estudiante dagiti diplomada, ket ti agsapa nagserra babaen iti pannakaibasa iti surat iti panagyaman manipud iti maika-82 a klase. Napaliiw dagiti estudiante a ‘ti bendision ni Jehova ti mangpabaknang.’ Gapu iti dayta, kinunada, “Imparikna ni Jehova kadakami a dakami dagiti 24 a kababaknangan a tattao ditoy daga!”​—Proverbio 10:22.

Iti malem, simmaruno iti napaababa a Panagadal iti Pagwanawanan, nangiparang dagiti estudiante iti nakaragragsak a programa. Dayta ti nagserra babaen kadagiti sasao iti naimpusuan a panangapresiar kadagiti dadakkelda, a ti kinaawan agumda ken panangsuportarda ti nangipalubos kadagiti annakda a pumanaw ket agbalin a misionero.

Ti programa dagiti estudiante ti sinaruno ti pannakaiparang ti maysa a naintiempuan a drama, a kalpasan dayta ti tsirman, ni Theodore Jaracz, nangited iti maudi a komentona. Ket anian a pakasdaawan ti insagana ti Sosiedad a maipaay kadagitoy a maudi a kanito! Inyanunsio ti nagpalawag a di agbayag malukatanto ti maysa a baro nga eskuelaan, ti “Ministerial Training School,” a maipaay iti panangsanay nga umuna kadagiti agsolsolo a papanglakayen ken ministerial nga ad-adipen. Dagiti amin immimdengda a naimbag idi inyanunsio ti tsirman ti maysa kadagiti kasapulan iti panagatender iti baro nga eskuelaan: ti situtulok a “panagserbi iti aniaman a lugar nga addaan ti pakasapulan iti sangalubongan a tay-ak.”

Ti nagagar unay a panagpalakpak ti nangkablaaw iti damag maipapan iti daytoy baro nga eskuelaan. (Ti ad-adu pay a detalye maipapan iti daytoy ti naipaay iti sumaganad nga artikulo.) Ngarud ti programa nagserra babaen iti kanta ken kararag iti panagyaman ken Jehova. Ti isuamin rimmuar iti naulep a rabii iti New Jersey. Adda pay bassit a tudo iti law-ang, ngem di inkankano ti sumagmamano dayta. Agragrag-o dagiti amin a puspuso a kadua ti maika-82 a klase dagiti nagraduar iti Gilead,

[Ladawan iti panid 26]

Dagiti Nagraduar iti Maika-82 a Klase iti Watchtower Bible School of Gilead

Iti listaan iti baba, dagiti linea nanumeruanda manipud sango nga agpalikud, ket nailista dagiti nagnagan manipud kannigid nga agpakannawan.

(1) Gish, L.; Evans, E.; Dean, S.; Hanson, R.; Suomalainen, A.; DuBose, D.

(2) Wallenberg, P.; Wallenberg, M.; Bauer, O.; Suomalainen, H.; Taylor, B.; DiStefano, G.

(3) Scott, K.; Evans, M.; Taylor, A., Jr.; Lindby, J.; Hanson, C.; Holmkvist, M.

(4) Sampson, T.; Gish, T.; Ball, D.; DuBose, J.; Dean, T.; Scott, D.