Report dagiti Manangiwaragawag ti Pagarian
Rumangrang-ay ti Chile Gapu ti Umad-adu a Lawag
KAS ti nakaranraniag a silnag ti init a sumingsingising iti tapaw dagiti bambantay nga Andes iti parbangon, ti lawag ti kinapudno ti Biblia ti immuna a dimteng idiay Chile idi 1930. Iti dayta a tawen, maysa kadagiti dedikado nga adipen ni Jehova immay a naggaput’ Argentina nga addaan naimbag a damag. Itatta, ti lawag ti Sao ti Dios ti simmilnagen ken nakadanonen agingga kadagiti adayo a sulsuli ti daga.
Nupay ti immuna a sanga nga opisina idiay Chile ti naipasdek idi 1945, maysa a baro, dakdakkel a pasdek ti sanga ti naibangon idi 1970, idi ti bilang dagiti agibumbunannag ti Pagarian nakagteng iti 7,000. Iti sumaganad a sangapulo a tawen, ti immadu a pannakalawag manipud Sao ti Dios ti nangsagid ti adu a puspuso. Idi karrugi ti 1980’s ti kanayonan a panangpalawa iti sanga nga opisina ti kasapulan unay. Gapuna, idi Setiembre 1982 maysa a 17.5-acre (7 ha) a daga idiay ruar ti Santiago ti nagatang. Ket kalpasan ti adu a trabaho a panagsagana, nangrugi ti panagkali idi Hunio 1984.
Makaparagsak unay ti pannakakita no kasano a dagiti agtutubo ken natataengan a kakabsat a taga Chile, sinuportaranda ti proyekto babaen kadagiti nabulos a kontribusionda. Rinibo a dadduma indonarda ti panawen ken laingda. Dadduma nga addaan kadagiti teknikal a pannakasanay timmulongda iti enhenieria. Dadduma nagtrabahoda iti karpenteria, panagwelding, panagaramid ti kurtina, ken ti landscaping, wenno nangipaayda iti ar-aramid ti ayat babaen iti panagparutda kadagiti ruruot, panagiduron ti karretillia, ken panagkali kadagiti abut. Pudno unay, ti nadur-as a lawag ti Sao ti Dios ti nangsagid ti puspuso ti ilina ken nangtignay kadakuada a mangipaay a siayat kadagiti bagbagida.—Salmo 110:3.
Ti panagkaykaysa ken kinatulok ti saan a di nadlaw dagiti taga ruar. Adu nga ahente ken uray pay dagiti estudiante ken propesor iti unibersidad ti immay iti lugar a pagibangbangonan tapno agpaliiw ken makasursuro. Maysa a managbangon tarigagayanna koma a tangdanan ti intero a bunggoy dagiti managsemento tapno tumulong iti maysa a supermarket nga ibangbangonna. Nagkomento ti maysa nga ahente no kasano ti pannakaiduma dagiti trabahador—awan dagiti agsasao ti dakes, awan ti agpampamayan. Idi naibaga nga aminda ket Saksi ni Jehova ken boluntarioda, kinunana: “Saan a makita daytoy iti asinoman kadagiti dadduma a luglugar. Dakayo a tattao ti naggapu iti sabali a lubong.”
Kamaudiananna, idi Agosto 1986 immakar dagiti agtartrabaho iti sanga idiay Chile iti baro a pasdek idiay Puente Alto. Ket idi Oktubre 25, kabayatan ti kaadda ni A. D. Schroeder iti Bagi a Manarawidwid dagiti Saksi ni Jehova, maysa nga entusiastiko a bunggoy a 933 ti nangiyebkas ti naimpusuan a panangsuportarda iti panangidedikar kadagiti baro a pasdek iti serbisio ni Jehova. Iti sumaganad nga aldaw, naangay ti maysa a naisangsangayan a gimong iti arubayan nga stadium, ket 18,012 ti nagkuna ti sí iti resolusion.
Kasapulan kadi daytoy a panangpalawa? Bay-anyo a dagiti kinapudno ti sumungbat. Idi nagatang ti sanikua idi 1982, adda idi 17,500 nga agibumbunannag ti Pagarian idiay Chile. Itan addan nasurok a 29,000! Ket babaen iti ngangngani 40,000 a panangiyadal ti Biblia kadagiti pagtaengan, saan pay a makita ti pagpatinggaanna. Gapuna bay-anyo a ti lawag manipud Sao ti Dios ti sumilnag a nalawlawag pay iti daytoy nadam-eg a teritoria kadagiti sakaanan ti Andes, a pakaidayawan ni Jehova ken pakabendisionan ti ilina.—Daniel 12:3.