Report dagiti Manangiwaragawag ti Pagarian
Dagiti Agtutubo Idiay Italia Mangpataudda kadagiti Gundaway a Mangasaba
DAGIDIAY mangipateg kadagiti nakaskasdaaw a panggep ti Dios ket maragsakanda a tumulong kadagiti dadduma a mangammo iti nakaskasdaaw a namnama iti Pagarian. Masansan nga iraman daytoy ti pananggundaway kadagiti oportunidad a bumangon, kas iti ipakita ti sumaganad a report manipud idiay Sardinia.
◻ “Maysa nga agibumbunannag a 12 ti tawenna ti nakalugan iti bus nga agawiden manipud iti panagserbi iti tay-ak. Adda met iti bus ti dua nga agtutubo a lallaki ken maysa a babai, aminda ket agarup a 18 ti tawenda. Ti agtutubo nga agibumbunannag nagtugaw iti abay ti babai ket inrugina ti nagbasa iti Agriingkayo! a magasin, iti pananginanamana a matignay ti kinamanagusisana. Nakitana ti magasin ket inimtuodna no ania ti basbasaenna. Inlawlawagna a basbasaenna ti artikulo a maipapan iti sungbat kadagiti problema a masapul a sarangten dagiti agtutubo. Kinunana a nagunggonaan unay manipud iti daytoy a material ket mabalin a makatulong met dayta kenkuana. Siraragsak a nangawat kadagiti magasin.
“Iti pannakangngegda iti panagpatpatangda, dagiti dua pay nga agtutubo nangkiddawda met iti magasin. Bayat nga al-alaenda ti kontribusion, imbaga ti agmammaneho kadakuada a saanda a saysayangen ti kuartada kadagita nga awan kaes-eskanna a bambanag. Dagiti agtutubo simmungbatda a mamasiribda, ket dagiti magasin makapainteresda. Iti kasta ti tsuper impaigidna ti bus iti kalsada, pinasardengna ti bus, ket kayatna a makita no ania ti makapainteres unay kadagitoy a magasin. Nangala met kadagiti kopia.
“Ti agtutubo a babai a nangisalaysay iti daytoy a kapadasan kinunana: ‘Pudno a maragsakanak unay ta nangirugiak iti panangasaba iti uneg ti bus.’”
◻ Maysa pay nga agtutubo a Saksi ginundawayanna ti maysa a situasion idiay eskuelaan. Daytoy nga agtutubo isalaysayna: “Ti maestrami iti eskuelaan insuronakami iti wagas ti panagadal a naigidgiddiat unay iti maysa a nakaugalianen. Kalpasan iti panangusig iti material, kasapulan a mangaramidkami iti balabala a mangiraman kadagiti kangrunaan a punto ken dagiti segundario a punto ket kalpasanna mangited iti extemporaneous wenno di insagsagana a palawag iti dayta a suheto.
“‘Kabesadok daytoy a pamay-an,’ kinuna ti Saksi. ‘Daytoy ti insingasing ti Giya iti Teokratiko nga Eskuelaan iti Panagministro.’ Di nagbayag napaliiw ti mannursuro a siak laeng ti naballigi iti panangiyaplikar iti daytoy a pamay-an. Inimtuodna no apay nga adda ti dakkel a naggidiatan ti trabahona no maidilig kadagiti dadduma. Inlawlawagko a naadalko daytoy a pamay-an iti Eskuelaan ti Teokratiko a Panagministro. Naragsakan unay ket inawisnak a mangiyilustrar iti dayta iti klase, babaen iti panangusar iti Giya iti Teokratiko nga Eskuelaan iti Panagministro. Inaramidko dayta.
“Idi nagawidak, imbagak iti pamiliak no aniat’ napasamak. Ni tatangko, a saan a Saksi, kanayonna nga ibaga a ti panagbalin a Saksi ni Jehova ket maysa a lapped iti eskuelaan, ngem kalpasan ti pannakangngegna iti kapadasak, napilitan a nangbalbaliw iti panunotna.”
Anian a naindaklan a pribilehio ti adda kadakayo nga agtutubo, kasta met kadakayo a nataenganen, iti panangitandudo ken panangipakaammo iti nagan ni Jehova!—Salmo 148:12, 13.