Report Dagiti Manangiwaragawag ti Pagarian
◻ TI “dakkel a pannakaidadanes” a maibusor iti immuna a kongregasion Kristiano nagserbi a nangiwaras kadagiti adu nga adalan ni Kristo. (Aramid 8:1) Nupay kasta daytoy a pannakaidadanes ket nagballatek agsipud ta dagidiay naiwarawara “napanda kadagiti amin a luglugar nga inkaskasabada ti naimbag a damag ti sao.” (Aramid 8:4) Intultuloy ni Felipe ti nangaskasaba, ket “dagiti adu a tattao nagmaymaysada a nangipangag.” (Aramid 8:6) No kasano a ti pannakaidadanes nagballatek idi umuna a siglo, kasta met idiay maysa a purok ti umamianan a Thailand.
Maysa nga espesial payunir dagiti Saksi ni Jehova ti nangrugi a nangaskasaba iti daytoy a purok, ngem idi damo dagiti lumugar madida a dumngeg. Idi nakisao iti lokal a manangaskasaba, nupay kasta, naguurnong dagiti tattao tapno dumngegda. Nailasin dagiti dadduma a ti Saksi kabisadona ti Biblia a nasaysayaat ngem ti ministroda, gapuna nangrugida a makipagadal ti Biblia iti payunir nupay dadduma ti manglaplapped kadakuada. Sumagmamano kadagiti patoda ti napapatay, ti biag ti payunir agpegpeggad, ken ti balay ti maysa nga interesado a lalaki ti pinuoranda. Kuna ti lalaki: “Mapuoranda ti balayko, ngem saanda mapuoran ti pusok.” Dagidiay makipagad-adal iti Saksi agluganda ti nakaad-adayo babaen iti bisikleta tapno makigimongda idiay Kingdom Hall. Uppat kadakuada ti nabautisaranen, ken innem a sabsabali pay ti makigimgimongen a kaduada.
Ti Gunggona ti Kinamapagpiaran
◻ Dagiti kakabsat idiay Zambia ti nakaibangon ti nagsayaat a reputasion iti kinamapagpiaran, ket daytoy ti nangted bendision kadakuada, agraman pannakatulongna kadagiti dadduma a nakabigbig ti kinapudno. Maysa a panglakayen, a regular payunir, ti agbibiahe iti maysa a bus ket nangngeganna ti maysa a Saksi iti bus a makisasao kadagiti dadduma maipapan iti panagungar. Maysa a pasahero ti nagsaludsod iti babai: “Apay a dakayo a Saksi kunayo a ti relihionyo laeng ti pudno a relihion?” Ti kabsat a lalaki nakiraman iti tongtongan ket kunana iti pasahero a ni Jehova gunggonaanna dagiti Saksina agsipud ta isursuroda ti kinapudno manipud iti Biblia.
Kalpasan ti tengngat’ rabii iti daytoy naunday a panagdaliasat, nakagteng ti bus iti maysa a bangen. Napigsat’ tudona. Maysa a soldado ti simrek iti bus ket insaludsodna no addada nakalugan a Saksi ni Jehova. Addada tallo. Sana kinuna: “Sige, agtalinaed a situtugaw dagiti Saksi, dagiti dadduma rummuarkayo agraman dagiti bagyo.” Amin a sabsabali rimmuarda iti katuduan, ket kalpasan ti inspeksion, nagsublida agraman maletada ken narusep a badoda.
Idi nakasublidan iti bus, kuna ti soldado: “Ti rason a pinagbatik dagiti Saksi a ta mapagpiaranda a tattao. Nagadut’ kapadasanmin ket nakitami nga isuda laeng dagiti mapagpiaran; no saludsodenmi no aniat’ adda kadagiti bagda, ibagada ti pudno kadakami.” Idi nagtuloyen nga agtaray ti bus, insaludsod ti kabsat a lalaki: “Aniat’ pudno a relihion?” Maysat’ simmungbat: “Daydiay saan a narusep iti katuduan.”
Wen, ti kinamapagpiaran tumulong a mangilasin ti pudno a relihion, ket pudno nga addaan kadagiti gunggona!