Report Dagiti Manangiwaragawag ti Pagarian
Tulong Kadagiti “Mawaw” Idiay Russia
“NARAGSAK dagidiay mabisbisin ken mawaw iti kinalinteg, yantangay mapennekdanto,” kinuna ni Jesus. (Mateo 5:6) Ipakita dagiti sumaganad a kapadasan no kasano a tumultulong dagiti Saksi ni Jehova a mangpennek iti naespirituan a pannakawaw ti adu idiay Russia, a sadiay napawilan ti narelihiosuan a wayawaya iti nasurok a 70 a tawen.
▪ Maysa a babai nga agnagan Valentina ti naaddaan kadagiti napapateg a saludsod iti Biblia a di nasungbatan iti adu a tawen. Kas pagarigan, pinampanunotna: ‘Siasino ti nagkararagan ni Jesus?’ Inkalinteganna nga adda la ketdi nangatngato a nagkararagan ni Jesus ket pinampanunotna no aniat’ nagan daytoy a Maysa.
Sinarungkaranna ti Russian Orthodox Church. Nupay kasta, saan a nakasarak iti dayta a relihion ti sungbat kadagiti saludsodna. Gapu ta di napnek, napan iti maysa a Protestante a simbaan ngem manen di nakasarak kadagiti nalawag a sungbat. Yantangay dina ammo no sadinot’ papananna, rinugian ni Valentina a basaen ti Biblia, a pinadasna a mismo ti agbirok kadagiti sungbat—ngem napaay. Nagkararag maipaay iti tulong.
Idi agangay nagtuktok dagiti Saksi ni Jehova iti ruanganna. Impakitada kenkuana manipud iti Biblia a Jehova ti nagan ti Dios. Kamaudiananna, naammuanna no siasino ti nagkararagan ni Jesus! Rinugianna ti makipagadal a regular iti Biblia kadagiti Saksi. Masansan a rinabii nga agbasa kadagiti literatura nga impablaak ti Watch Tower Society ken agsukimat kadagiti teksto ti Biblia. Di nagbayag maikunan ni Valentina a nasarakannan ti kinapudno. Iti las-ud ti tallo a bulan rinugiannan ti makiraman iti trabaho a panangasaba, ken dua a bulan kalpasanna, nabautisaranen. Nasupapakan ti nainkararagan a panagbirokna iti kinapudno.
▪ Naglugan iti bus ti maysa a Saksi tapno mangasaba iti maysa a nasulinek a lugar. Kabayatan ti panagbiahe nakisarita iti maysa nga agkabannuag a babai maipapan kadagiti kari iti Biblia, ngem saan nga interesado ti agkabannuag a babai. Dua a bulan kalpasanna napan manen sadiay ti Saksi tapno mangipaay iti palawag publiko. Kalpasan ti palawag inasitganna ti maysa a bisita sa nagsaludsod: “Adda kadin nangisarita kenka maipapan iti naimbag a damag manipud iti Biblia?” Insungbat ti lalaki, “Wen, sika.” Impagarup ti Saksi nga agang-angaw. Ngem inlawlawag ti lalaki a dua a bulanen ti napalabas a nangngegna ti panagsarita ti Saksi ken ti agkabannuag a babai, kabayatan ti panagbiahe. “Adu pay ti kayatko a maammuan, ngem dimsaagkan, ket impagarupko a pulos a saanakton a makasarak manen kadagiti Saksi ni Jehova. Kalpasanna iti pagtrabahuak naam-ammok ti maysa a lalaki a makipagad-adal iti Biblia kadagiti Saksi. Isu nga addaak ditoy!”
Nangrugi a makipagadal iti Biblia ti lalaki ken ti asawana. Kalpasan ti apagbiit a panawen, makitana a maikaniwas ti trabahona kadagiti prinsipio ti Biblia. Tangay kayatna a salimetmetan ti nasayaat a konsiensia iti imatang ti Dios, simmarak iti sabali a pagtrabahuan. Ita isarsaritanan kadagiti sabsabali ti maipapan iti Pagarian ti Dios iti tunggal gundaway. Rumangrang-ay metten ni baketna iti panagadalna iti Biblia.
Maragsakan dagiti Saksi ni Jehova iti nakalawlawa a teritoria ti Russia a makiraman iti panangibaga kadagiti amin a napasnek a tattao: “‘Umayka!’ Ket ti asinoman a mawaw umay koma; ti asinoman a mayat awatenna koma ti danum ti biag nga awan bayadna.”—Apocalipsis 22:17.