Dagiti Narelihiusuan a Tradision—Panagdayaw iti Dios iti Kinapudno?
“SALGA, salga, salga” (“Rummuarka, rummuarka, rummuarka”). Ti naladingit a panagpukkaw ti aggapgapu manipud nasipnget a kamposanto idiay isla ti Janitzio idiay Danaw Pátzcuaro, Mexico. Idiay ti maysa a napeklan a Tarascan Indian ti agpakpakaasi iti natay a kabagianna babaen iti tulong ti naisurat a kararag. “Bay-am a ti Santo Rosario ti mangpugsat kadagiti kadena a nangreppet kenka,” ipakpakaasina.
Dayta ti Aldaw dagiti Natay. Manipud nakasapsapa nga oras, dagiti babbai ken ub-ubbing ti nangarkosen kadagiti tantanem ti pamiliada iti petals ti sabsabong ken nadekorasionan a kukuadro a kayo. Nagiyatangda kadagiti prutas ken kankanen iti sanguanan ti tantanem. Ket ita inanduranda ti kinalam-ek ti rabii tapno aglualoda wenno agbantay a siuulimek iti nakudrep a silaw ti rinibo nga agandap-andap a nasindian a kankandila maipuon kadagiti natay.
Ti kasla karkarna wenno uray pay naidaddaduma unay iti managpaliiw a taga ruar ket para kadagitoy a tattao ti madaydayaw gaput’ kabayagnan a narelihiusuan a tradision: ti Katoliko a panangrambak ti Todos los Santos. Iti adu a Latin Americano a dagdaga, idiktar ti tradision a rinibribo kadagiti mammati ti umarak kadagiti tanem ken agiyatang kadagiti naisurat a lulualo ken sagsagut para kadagiti minatayda.
Ti met Latin America ti aduan kadagiti tradision maipapan kadagiti narelihiusuan nga imahen. Dagiti imahen ni Kristo ken ni Maria ket nakasaksaknapda, a nangadorno ti kaaduan a pagtataengan ken paglakuan. Aglugankayo iti bus ket awan duadua a makakitakayo ti babassit a retrato ni Maria a nakakabil iti ngato ti tugaw ti tsuper. Dagiti estatua ni Maria, a naadornuan ti rumimatrimat a de kolor a bombilia imbes a kankandila, ket nakakapetda pay a naipasango iti makintengnga a pagnaan iti uneg ti bus.
Idiay Colombia dagiti dadakkel a rebulto ni Kristo ken ni Maria ket kumitkitada manipud nangato a bambantay iti ngatuen ti adu a siudad. Ti nalatak a tuktok ti Monserrate ti nakaipatakderan ti maysa a simbaan a napunno kadagiti madaydayaw unay a ladladawan. Bayat dagiti naisangsangayan a semana santa, rinibribo kadagiti umili ti Bogotá sumang-atda iti daytoy tuktok a nabato, a dadduma kumarkarayamda iti sugat-sugat ken agdardaran a tumtumeng.
Dagiti imahen, krusipiho, pipiesta—paset dagitoy dagiti narelihiusuan a tradision a naipaugalin a wagas ti panagbiag dagiti tattao iti intero a lubong. Dagitoy a tradision ti maiyalallatiw kadagiti agsasaruno a kaputotan, ket matmatmatan dagiti tattao dagita kas sagrado.
Panagdaydayaw iti Kinapudno?
Nupay ti kaaduan ket nalabit kontentodan a sumursurot kadagiti tradision nga awan panagduadua, kadagiti adu nga agkunkuna a Kristiano dagitoy a tradision ti mangiparang ti makariribuk a parikut. Tutal, ni Jesu-Kristo mismo ti nagkuna: “Dagiti pudno nga agdaydayaw agdaydayawdanto iti Ama iti espiritu ken iti kinapudno.” (Juan 4:23) Kaskasdi, nagadu a narelihiusuan a tradision ti nabatad a naadaw manipud, wenno umarngi a nakaskasdaaw, kadagiti di Kristiano a narelihiusuan a seremonia. Kas pangarigan, ti Todos los Santos ti aktualmente a katupag ti Buddhista a piesta ti “Ullambana,” maysa nga aldaw a naikeddeng para “ti panangiyebkas ti nadungngo a debosion kadagiti natnatayen nga inapo ken pannakawayawaya dagiti espiritu manipud pannakaibalud iti daytoy a lubong.” (The New Encyclopædia Britannica, edision ti 1976, Micropædia, Tomo 1, panid 260) Dagiti kadi sumursurot kadagita a tradision ti pudno nga agdaydayaw iti kinapudno?
Ikalintegan ti dadduma a ti pannakaaseptar dagiti tradision iti simbaan ti basta mangpalinteg kadakuada. Kuna ti Maikadua a Konsilio ti Vaticana idi 1965: “Saan laeng a manipud sagrado a Kasuratan ti nangadawan ti Simbaan ti kinasiguradona maipapan iti aniaman a naipanayagen. Gapuna agpadpada a ti sagrado a tradision ken ti sagrado a kasuratan ti rebbeng a maawatan ken maidayaw iti isu met laeng a debosion ken panangipateg.”
Ngem, anian, no addada dagiti pamunganayan a pagsuppiatan ti aramid-tao a tradision ken ti impaltiing ti Dios a Kasuratan? Kas sungbat, ikkantay ti nainget a panangmatmat dagiti tradision sigun iti lawag ti balakad ti Biblia.