Ti Kaiyulogan dagiti Damdamag

“Saan a Babaen ti Panagkita”

Dagiti nabiit pay a panangsubok dagiti sientista ti nangpaneknek a ti Shroud of Turin (lupot a mangbalkot iti bangkay) ket maysa a maika-14-siglo a kinaulbod. Kaskasdi, “dagiti Katoliko maparegtada a mangitultuloy iti panagdayawda iti lupot kas iti ladawan ni Kristo, a kaskasdi a makabael a mangaramid kadagiti milagro,” kuna ti The New York Times. Ni Anastasio Ballestrero, ti arsobispo iti Turin, kinunana: “Ti naisangsangayan a pannakabalin ti ladawan ni Jesu-Kristo a mangguyugoy maitalimeng koma.”

Ania ti kayat a sawen daytoy? Dayta kaipapananna a nupay no inamin ti iglesia a ti naimantsa a ladawan ti bagi ti maysa a tao iti lupot ket saan a ladawan ni Jesu-Kristo, dagiti matalek a Katoliko masapul pay laeng ti panangitultuloyda a mangmatmat iti dayta a kas ti ladawan ni Kristo ket ngarud dayta maysa a banag a nasantuan. Apay? Sigun ken Adam Otterbein, maysa a padi a Romano Katoliko a mangay-aywan iti Holy Shroud Guild, dagiti ladawan a pakalaglagipan a kas ti lupot ket makatulong kadagiti manamati a mangipaay iti dayaw iti iladladawan ti ladawan.

Saan ngarud a nakaskasdaaw a, nupay dayta ket awan ti kinapudnona, ti lupot ket agtalinaed a nabileg a simbolo iti pammati para iti Iglesia Katolika. “Dagiti estatua, paintings ken icons . . . maidaydayawda iti panagdaydayaw dagiti Katoliko,” kuna ti The New York Times.

Suportaran kadi ti Biblia ti kasta a panagusar iti ladladawan iti panagdayaw? Saan! Nalawag ti panangibaga ti Sao ti Dios: “Umadayokayo iti panagrukbab kadagiti ladladawan.” (1 Corinto 10:14; idiligyo iti Exodo 20:4-6.) Dagiti Kristiano nabalakadanda a mangdayaw iti Dios “iti espiritu ken kinapudno,” saan a babaen iti tulong dagiti dadduma a ladawan wenno ladawan a pakalaglagipan. (Juan 4:24) Maitutop ngarud, nagsurat ni Pablo a dagiti pudno a Kristiano ‘magmagnada babaen iti pammati, saan a babaen iti panagkita.’​—2 Corinto 5:7.

Di Umiso a Panagpampanunot

Tapno masalimetmetan ti nalawagen a pagannayasan a palukayan dagiti pagalagadan ti Biblia kadagiti relihionista, “irasrason dagiti umad-adu a bilang dagiti teologo idiay E.U. a dagiti iglesia a Kristiano kasapulanda ti seksual a panagbalbaliw,” kuna ti Star Tribune. Daytoy a pagiwarnak iti Minnesota isitarna dagiti kapanunotan nga inlawlawagen dagiti natatan-ok a kas kada John Spong, ti obispo iti Newark a maipaay iti Episcopal Church of America, ken ni James Nelson, ti eksperto iti kababalin iti sekso idiay United Theological Seminary idiay New Brighton. Kunaen ti pagiwarnak a dagitoy ken dagiti dadduma a teologo mariknada a dagiti ig-iglesia masapul a “bendisionanda koma dagiti homoseksual nga agasawa iti seremonia iti simbaan, a bigbigenda dagiti panagtulagda iti maysa ken maysa iti naayat, moral a relasion; . . . nga ipaay kadagiti nagtulag nga agtutubo nga adulto ti bendision ti simbaan no agbiagda iti naayat, nagtulag a relasion, nupay no saanda a nagkasar”; ken “palubosanda no dagiti nataenganen nga adulto ket aktibo iti seksual a pamay-an, nupay no saanda a nagkasar.” Apay a mamati dagitoy a teologo a ti kasta a panagbalbaliw ket kasapulan? Kuna ni Spong a “mangipaaytayo iti pammalubos iti nalulok a panagbiag” no dagiti kasta a panagtipon ket saan a nabendisionan.

Ti saan a mabigbig ni Spong ken dagiti dadduma, nupay kasta, ket ti mismo a bendision kadagita a panagtipon ti mangipasdek iti pammalubos ti iglesia iti kasta a “nalulok a panagbiag.” Nalawag ti Sao ti Dios. “Uray dagiti mannakiabig, . . . uray dagiti mannakikamalala, . . . uray dagiti tumulad kadagiti taga Sodoma . . . saandanto a tawiden ti pagarian ti Dios.” Dagiti paspasurot ni Kristo saanda laeng a nabilin a “saan a makikadua” kadagita no di ket naibaga met kadakuada nga “ikkatenda ti dakes a tao” iti tengngada met laeng.​—1 Corinto 5:11, 13; 6:9-11.

Kangrunaan a Kasapulan

Iti daytoy a tawen, ti report ti estadistika iti Free Church Federal Council iti Britania impalgakna ti panagpababa kadagiti 15 a naikameng a denominasionna. Iti damdamo unay, bimmaba dagiti miembro iti nababbaba pay ngem maysa a milion, kuna ti Church Times, maysa a pagiwarnak ti Iglesia iti Inglatera. Ti rason? Nupay no dagiti ig-iglesia kunaenda a naitulagda “iti kaaduan . . . a ti kangrunaan a kasapulanda isu ti pannakasubbot,” kunaen ti artikulo a “dagiti Free Churches intultuloyda ti nangipaay iti adu unay a tiempo ken pigsa iti . . . pannakikadkadua.” Sigun iti Church Times, “no agpabpababa dagiti Ig-iglesia, saan a gapu ta dagiti bazaar[da] ket bimmaba wenno dagiti produksion ti dramatiko a kagimonganda ket saan a masupsuportaran: ti makagapu ket saanda nga impaspasnek ti ministerioda iti pannakasubbot.”

Dagiti relihiuso a papangulo idi kaaldawan ni Jesus saanda met nga impaspasnek ti ministerioda. Siuumiso a binabalaw ida ni Jesus gapu ta inaramidda “ti sao ti Dios nga awan ti mamaayna” gapu kadagiti tradisionda. Kinunana a managinsisingpetda, a ‘dayawenda ti Dios kadagiti bibigda ngem dagiti puspusoda adayo kenkuana.’​—Marcos 7:6, 7, 13.

Dagiti pudno a ministro ni Jehova a Dios, nupay kasta, ket napasnekda “iti ministerio ti sao.” Impaspasnekda ti bilin ni Jesus a “mangaramid kadagiti ad-adalan,” ken surotenda ti ulidan dagiti apostoles, a “nangitultuloy nga awan sardayna ti panangisursuro ken panangiwarwaragawag iti naimbag a damag maipapan ken Kristo.” Kadagiti pudno a Kristiano, daytoy a trabaho ket napateg unay.​—Aramid 5:42; 6:4; Mateo 28:19, 20.