Report dagiti Manangiwaragawag ti Pagarian
‘Ti Anien Natangkenanen’ Idiay Burma
◻ TI NAPINTAS a daga ti Burma ket addaan nasurok a 1,500 a manangiwaragawag ti naimbag a damag. Dagiti nabiit pay a kumbensionda ket naangay iti Burmese, Lushai, ken Haka Chin a pagsasao, nga addaan dagup a timmabuno a 2,273. Dagiti sumaganad a kapadasan ti mangipalgak ti adda nga interes dagiti kimmarnero a tattao iti mensahe ti Pagarian ken ipagpaganetgetna ti nakita ni Juan iti sirmata: “Ti anien ti daga natangkenanen.”—Apocalipsis 14:15.
Napasamak Idiay Dinam
◻ Bayat nga adda iti ministerio a panagbalaybalay idiay Matupi, maysa nga espesial payunir ti nakasarak ti maysa nga estudiante nga interesado a makaammo nangnangruna maipapan iti impierno. Idi nailawlawag kenkuana a ti impierno ti Biblia isut’ gagangay a tanem ti sangatauan, isut’ nasdaawan unay. Saanna a matngelan a bukodna no di ket kayatna nga ipakaammo dayta kadagiti kakabagianna idiay lugarda a Dinam. Bayat nga awan panagserrek ti eskuelaan, agsubli idiay lugarda ket isaknapna ti kinapudno maipapan iti impierno. Ti kayongna ket interesado unay a makaammo ti ad-adu pay, gapuna kinuyogna ti estudiante a nagsubli idiay Matupi tapno makasarita mismo ti payunir. Isut’ nagtalinaed idiay Matupi iti sumagmamano a lawas ket nakipagadal kadua ti payunir. Iti kamaudiananna, bayat iti maikadua nga isasarungkarna idiay Matupi, impapilitna a dagiti payunir ti sumarungkar idiay lugarda, ta, kinunana, nagadu ti interesado a tattao sadiay. Amin dagiti tallo a payunir ti siraragsak a nangakseptar iti imbitasion. Innalana ti 12 a narigat nga or-oras tapno madanonda ti Dinam.
Adda idi ti pumpon idiay Dinam iti aldaw nga isasangpet dagiti payunir, ket dagiti tattao manipud kadagiti kabangibang a purpurok addada met sadiay tapno makangngeg ti adu pay maipapan itoy impierno ti Biblia. Naggarasugasda amin a kumita kadagiti sangaili. Simmaruno ti maysa a diskusion ti Biblia a pimmaut manipud alas 7:00 t.r. ingganat’ alas 11:00 t.r. Maysa a mannakaawat a tao iti tallaong ti nangpasardeng ti diskusion iti alas 11:00 t.r., tapno maikkan dagiti payunir ti inana a maipaay iti sumaruno nga aldaw. Iti agsapa, rinugianda ti diskusion ti Biblia iti agarup alas siete ket nagtultuloy agingga iti alas dies iti rabii, nga adda laeng ababa nga inana para iti pannangan. Idi nagpakadan dagiti payunir iti purok, inkalikagum dagiti kimmarnero a tattao nga agsublida ken mangbusbos ti ad-adu pay a panawen kadakuada. Anian a pribilehio ti panangtulong ti kakasta a nalaka a masursuruan a tattao iti nasudi a naimbag a damag ti Pagarian. Pudno unay, ‘natangkenanen’ ti anien idiay Burma!
Pannakagun-od ti Kinapudno Manipud Naibellengen a Libro
◻ Maysa a lalaki idiay Burma ti sumarsarungkar iti gayyemna nga aglaklako kadagiti daanen a libro ken diario kas basura ket nakakita ti daanen a libro nga awan akkubna a nairaman kadagiti papel a basura. Pinidutna dayta ket rinugianna a basaen. Di nagbayag isut’ naigameren iti dayta. Naiparna a daytat’ libro ti Watch Tower Society a Panagimdeng iti Naindaklan a Mannursuro. Sinuratanna ti sanga nga opisina ti Sosiedad tapno makaala ti ad-adu pay a libro. Dagus a nangibaon ti sanga nga opisina ti payunir a sumarungkar kenkuana. Narugian ti panagadal kenkuana, ket kalpasan ti sumagmamano a panagadal, nabigbigna ti aweng ti kinapudno ket rinugianna metten a dalusan ti panagbiagna kadagiti dakes a bisyo ket iti kamaudiananna imbellengnan dagiti narelihiusuan a didiosenna a Hindu. Di nagbayag, isu ken ti inauna a balasangna ti nangidedikar ti bagbagida ken Jehova ket nabautisaranda. Isu itan ti maysa a regular payunir.
Pudno unay, “ti anien adu, ngem bassitda dagiti agani” idiay nabunga a tay-ak ti Burma.—Mateo 9:37, 38.