Sadino ti Papananyo Maipaay iti Patigmaan?
ADDA aya nangteden ti kuarta a bogus kadakayo? Nalabit awan pay, ngem kasanot’ panagriknayo no adda mangibaga kadakayo nga addadan bogus a kuarta a pagbaybayadda? Masaktan aya ti riknayo? Siempre saan! Ad-adda ketdi nga agyamankayo ta napakdaarankayo ket agannadkayo a dikay basta it-ited ti nagbannoganyo unay, ken pudpudno a kuarta a para iti bogus.
Kaaduan kadatayo ti umaw-awat ti patigmaan wenno pakdaar sagpaminsan. Pudno, dadduma a pakdaar ket naus-usarda ngem ti dadduma. Ngem uray no ditay makita ti personal a pateg ti dadduma a patigmaan wenno balakad, rason kadi a masairtayo no maitukon dayta?
Ti kinapudnona ket, tunggal maysa kasapulantay ti tulong ken pammagbaga sagpaminsan. Awan asinoman nga addaan kadagiti amin a sungbat. Gapu kadagiti panagpangpangadua iti ekonomia ken politika a nanglawlaw kadatayo, tunggal maysa kasapulanna ti natibker a namnama iti masanguanan. Iti lubong a sadiay ngangngani kagudua kadagiti panagasawa ti agpatpatingga iti diborsio, a nagsaknap ti panagsikog dagiti tin-edyer, ken sadiay a dagiti sakit a maiyak-akar babaen iti seksual a panagdenna ket naglawat’ sinaknapanda, adda naganat a panagkasapulan ti natanang, praktikal a pannakaiwanwan. Kasapulan dagiti nagannak ti tulong a mangdeterminar ti kasayaatan a pamay-an a panangpadakkel kadagiti annakda iti daytoy nagulo a sistema ti bambanag. Kasapulan dagiti tin-edyer ti tulong a mangusig kadagiti agsusuppiat nga emosion ken pannakapilpilit a kasla mangringbaw. Tunggal maysa kasapulanna ti tulong a mangpatanor kadagiti praktikal a moral nga ipatpateg iti maysa a lubong a sadiay ti kinasuitik, imoralidad, ken kinaranggas ket ad-addan a maawat.
Sadinot’ pakasarakan ti kasta a tulong? Agingga ita ti kasasayaatan a gubuayan ti patigmaan maipapan iti panagbiag ket isu ti Biblia, ti naipaltiing a Sao ti Dios. Insurat ti salmista idi ugma: “Ti saom pagsilawan kadagiti saksakak, ket silaw iti danak.” (Salmo 119:105) Dagidiay agbasbasa ken mangiyap-aplikar iti Sao ti Dios maliklikanda ti kaaduan kadagiti palab-og nga adda itatta. Daytat’ maysa a rason no apay a dagiti Saksi ni Jehova busbosenda ti ginasgasut a milion nga oras kada tawen a mangsarsarungkar kadagiti kaarrubada ken isalsalaysay ti Biblia kadakuada. Kaskasdi, adu a tattao ti di umim-imdeng, ken dadduma masairda pay. Apay a kastoy?
Serrado nga Is-isip—Apay?
Ngamin, adu a tattao ti arsagidda unay maipapan iti panangawat ti patigmaan, nangnangruna maipapan iti relihion. Uray dagiti mismo a miembro ti simbaan saanda a kanayon sisasagana a dumngeg iti balakad nga ipapaay dagiti papanguloda. Maysa a klero a Briton ti nagsennaay: “Tunggal maysa addaan iti kabukbukodanna nga ideya ket maibilbilang nga agkakasayaatda iti ideya ti mannursuroda.” Gapuna, saanen a nakaskasdaaw no apay a dagiti tattao dida kayat ti dumngeg iti maysa a ganggannaet nga adda iti ruanganda.
Mainayon pay, uray no agbibiagtayon iti panawen ti panagduadua, kaskasdi nga adu pay laeng dagiti addaan kadagiti natibker, emosional a singgalut iti simbaanda. Kas kinuna ti maysa nga enciclopedia, “ti relihion tignayenna dagiti kaunggan a rikrikna ti di mabilbilangen a tattao.” Dagita a tattao mabalin saanda a makita ti pannakasapul a makisao iti maysa a naidumat’ relihionna maipapan iti Biblia, uray no dayta koma a panagpatang ket maipapan ti panangsapul ti solusion kadagiti parparikutda.
Dadduma dida kayat a pakisaritaan ti Biblia agsipud ta adun ti nakitkitada a kinamanaginsisingpet ken kinadakes iti relihion. Masaktanda a dadduma kadagiti pangulo ti relihion konsintirenda ti imoralidad, wenno makarurodda kadagiti awan bainna a kinaagum dagiti adu a manag-ebanghelio iti telebision. Nalabit makapungtotda no ti maysa a klero usarenna ti autoridadna a mangsuportar ti maysa a dasig a kontra iti sabali iti panagdadangadang iti politika. Kadakuada, ti relihion ket kasla mangpatpataud ti ad-adu a problema ngem ti solsolbarenna.
Dagiti problema a pagrekreklamuan dagita ket pudnoda. Iti narelihiusuan a panagsao, nagadu a “bogus a kuarta” ti maiwarwaras. Ngem ti kinaagpaysuanna, ti panagkedked a mangawat ti napateg a tulong manipud iti Biblia gapu itoy a rason ket saan a nainkalintegan kas ti di panangawat iti pudpudno a kuarta gapu laeng ta agsaksaknap dagiti bogus a papel de banko!
Ken kas naibagan, kasapulantay amin ti balakad iti daytoy a lubong dagiti narikut a pagpilian ken napepeggad a kasasaad. Adda aya aniaman a pamay-an tapno nainsiriban a maiturong iti panangakseptar ti pammagbaga? Saanen aya a kasapulan wenno dakes pay ketdi aya ti makisao iti maysa a naidumat’ relihionda maipapan iti Biblia? Posible kadi ti panagbalin a silulukat ti isipna tapno umawat ti nasayaat a balakad ket kaskasdi a di maallilaw iti bogus a patigmaan? Aniat’ maikuna ti Biblia maipapan iti daytoy?