Report Dagiti Manangiwaragawag ti Pagarian

“Nasged iti Espiritu” Idiay Mexico

“TI INTERO a pagilian ket kasla nasged ken nakaregregta iti ar-aramid.” Kastat’ insurat ti sanga nga opisina ti Watch Tower Society idiay Mexico, ket anian a nagpudno dayta a komento! Ti kinaregta iti dayta a pagilian ket mapaneknekan ta idi Agosto, addan idi ti 70 nga agsasaruno a binulan a peak, nga immabut iti 277,436 nga agibumbunannag. Mainayon pay, nasurok a 400,000 a panangiyadal ti Biblia ti naireport, ket ti timmabuno iti Memorial idi napan a tawen dimmanonen iti 1,046,291. Anian a nagsayaat a paggapuan ti masanguanan nga idadakkel!

Ti tampok idi 1989 isut’ panagbalbaliw ti kasasaad dagiti Saksi ni Jehova idiay Mexico. Kas resultana, iti damdamo unay mabalinen nga usaren ti Biblia iti panangaskasabada iti binalaybalay, ket ti gimgimongda mabalinen a malukatan iti kararag. Daytoy ket addaanen ti madagdagus nga epekto. Iti dua a bulan, ti bilang dagiti agibumbunannag limmagto iti nasurok a 17,000.

Ti rag-o dagiti kakabsat iti daytoy a gapuanan ket makita iti komkomentoda. Maysa ti nagsurat: “Idi a naibasa ti surat iti kongregasion, daytat’ nasinga iti namindua babaen iti insigida a panagpalakpak. Daytat’ nakaragragsak!” Kuna pay ti sabali: “Dikam mamedmedan dagiti lua ti kinaragsak. Ti resultana naiparangarang babaen iti ad-adda pay a kinapuntualidad. Tunggal maysa kayatna ti addan no maipaay ti panglukat a kararag.”

“Iti teritoriami,” kunat’ sabali pay a Saksi, “maysa a babai nga aktibo iti programa ti panagadal ti Biblia iti Iglesia Katolika ti nagkomento: ‘No idi babaen laeng kadagiti komento ken dagiti magasinda, [dagiti Saksi] ditay makapagsaon wenno makatagari, itan ta luktandan dagiti Bibliada iti ruruangan, napukawtayon!’”

Ipagpaganetget met dagiti Saksi ni Jehova idiay Mexico ti di pormal a panangasaba babaen iti Biblia. Maysa a sister ti immasideg iti maysa a babai a nagsaludsod no aniat’ makunana maipapan ti aborsion. Simmungbat ti Saksi: “Ti maikunak ket saan a kas iti kinaimportante iti makuna ti Biblia.” Kalpasan ti panangbasana ti sumagmamano a kasuratan, inrason ti sister: “Iti Namarsua ti biag ket nakapatpateg, uray ti biag dagidiay di pay naiyanak.”

Kalpasanna impudno ti babai a dandaninan ipasngay ti umuna nga anakna, ngem isingasing dagiti klinikal nga eksaminasion nga agbalinto nga abnormal ti ubing. Kayat ti doktor nga iregregna dayta, ket immanamong ti lakayna, ngem ti mismo a babai saan a sigurado. Nakirinnason manen ti agibumbunannag kenkuana manipud Biblia, intednat’ naganna, sada nagsinan.

Lima a tawen kamaudiananna iti maysa a kumbension distrito, maysa a pagassawaan nga addaan uppat tawenna nga ubing kayatnat’ makipagkita iti sister ken ti lakayna. Daytat’ isu met laeng a babai! Aniat’ napasamak? Kalpasan ti pannakiumanna iti Saksi, naikeddeng ti babai nga ipasngay ti anakna. Ti doktorna madin a makipagkita kenkuana manen, ket ni lakayna ti namutbuteng pay kenkuana nga isut’ panawanna no ti ubing ket maiyanak a dispormado. Idi dimteng ti tiempon a panagpasngayna, isut’ napan lattan nagpatulong iti umuna a doktor a nasarakanna.

Dagdagus kalpasan a naipasngayen ti ubing, kuna ti doktor: “Kablaawanka! Nakapimpintas ti anakmo a babai.” Gapu ta kasla di mamati iti nangngeganna, kiniddawna a kitaen a naimbag ti doktor ti ubing. Kalpasanna insalaysay ti ina ti estoriana. Ti doktor mabalinna laeng a maikuna: “Milagro daytoy.” Maragsakan ti babai nga isut’ naaddaan ti tured a respetuen ti panangmatmat ni Jehova iti kinasagrado ti biag, ket pinanagananna ti napintas, nasalun-at nga anakna iti nagan ti sister. Idi isut’ napigsan, binirukna dagiti Saksi ket rinugiannan ti makipagadal ti Biblia kadakuada. Iti kurang pay ngem makatawen, isu ken ni lakayna nabautisarandan.

Indagadag ni apostol Pablo: “Nasgedkayo iti espiritu. Agserbikayo ken Jehova.” (Roma 12:11) Dagiti Saksi ni Jehova idiay Mexico, kas kadagiti pudno a Kristiano iti uray sadino, sumungsungbatda iti daytoy a pammagbaga iti amin a pusoda. Isut’ gapuna a ti intero a pagilian ket nasged ken nabiag kadagiti naespirituan nga ar-aramid. Anian a nagbaknang ti panangbendision ni Jehova kadagiti matalekna!