Aborsion—Pannakaammo Mangyeg Rebbengen
KANAYON kadi nga agsaokayo no ammoyo ti maysa a banag nga umiso? Naimbag ti mangaramid iti kasta, nangnangruna no naipusta ti pagimbagan dagiti dadduma. Kalpasan ti panangbasa iti maysa nga artikulo maipapan iti tema iti aborsion iti immun-una a ruar daytoy a magasin, maysa nga ina idiay Inglatera ti nagsurat iti sumaganad:
“Kabasbasak pay laeng ti ‘Surat Manipud ti Ina ti Di Naipasngay a Ubing’ iti Hulio 22 [1986] a ruar iti Awake! (Nobiembre 22, 1986 iti Iloko) ket pinagladingitnak.
“Diak pay napadpadasan ti aborsion, ngem idi uppat a bulanen ti sikogko iti umuna nga anakko, ti ipagko ti dua a bulan met ti sikognan iti maikatlo nga anakna. Kalkalpasna pay laeng nga intulod dagiti dua a babassit nga annakna a babbai idiay eskuelaan ket nakasarak iti nangato ti pangsueldona a trabaho. Adda bambanag a tarigagayanna: muebles, videos, baro a kotse, mulmula a maipaay iti hardin. Ngem ti ubing ti mangipatingga iti trabaho ken kasta met iti sueldo tapno makagatang kadagitoy amin a bambanag. Gapuna inkeddengna ti maaddaan iti aborsion.
“Bayat ti iyaadani ti aldaw ti aborsion, isut’ maragsakan. Ngem kumarkaro ti ladingitko no mapanunotko dayta. Iti daytoy a tiempo mangrugin a mariknak ti panagkugtar ti ubing iti tianko, ket kankanayon a pampanunotek ti ubing iti tian ti ipagko a dumakdakkel met.
“Dimtengen ti rabii a maipaay iti aborsion, ket kanayon nga in-inanamaek nga agbaliw ti panunot ti ipagko. Kasla makitkitak ti anakna, naimeng ken natalged iti aanakanna nga umim-imdeng iti naalumamay ken makagin-awa a bitik ti puso ti inana. Kalpasanna maipangeten ti isipko iti panunot a dayta bassit nga ubing ti maikkat iti natalged a bassit a lubongna ket madadael. Agsangitak iti kasta unay no mapanunotko. Naaramid ti aborsion. Ti bassit nga anakko a babai pulos a dinanto maam-ammo ti kasinsinna a kataebna, ta bassit laeng ti baetda iti edad.
“Ket ti ngay ipagko? Napukawna ti trabahona ngem nakasarak iti sabali ket naaddaan iti sumagmamano nanipud idi. Nakagatang kadagiti videos, baro a kotsena, dagiti mulmulana, baro a kawkawes, kdp., ngem isut’ nagsagaba iti panagliday ket pinanawanna ti asawana ken dagiti annakna, kalpasanna nagawid iti sumagmamano nga al-aldaw. Ngem isut’ saan a naragsak. No sarungkarannak, dagiti dua a babassit nga annakna a babbai makiay-ayamda iti anakko a babai ken ti anakko a lalaki nga 11 a bulan, ket kunaenda maipapan iti anakko a babai: ‘Saan kadi nga isut’ nagpintas, Mummy? Kayatko koma ti maaddaan iti bassit a kabsat a babai wenno lalaki.’ Kadagitoy a sasao a taliawek a nalimed ti panagtignayna. Mariknak ti tarigagayko a mangliwliwa kenkuana agsipud ta idi panawen ti aborsion pudno a dina ammo ti ar-aramidenna. Ngem ti ipagko pinilina ti kuarta a nangnangruna ngem ti biag ti anakna, ket gapu itoy a rason mariknak nga isut’ agbabbabawin iti dayta.
“Nupay kasta, daytoy ti mangiturong iti panangimtuodko iti bagik iti nakapatpateg unay a saludsod. Pampanunotek ti bagik kas maysa a Saksi ni Jehova nupay diak pay nabautisaran. Ngem makitak nga adu pay ti masapul a paglasatak, ta dagiti pudno a Saksi ket kasda ken Jesus, a makarikna iti ayat ken kinamanangngaasi kadagiti amin, aniaman ti kasasaad dagiti dadduma wenno aniaman ti naaramidanda. Inanamaek ti aldaw inton pudno a makunakon a ti rikriknada kadagiti dadduma ken awitekon a buyogen ti panagpannakkel ti nagan ni Jehova. Nalabit no diak nagmayeng iti nakabaybayag, mabalin a naaddaanak koma iti tured a nangasaba iti ipagko, ket mabalin a naispal koma ti ubing.”
Ti napasnek a tarigagay dagiti manangipablaak ti Agriingkayo! a ta daytoy agdama a serie dagiti artikulo mabalin nga agserbida iti dayta a panggep.