Ti Kinamapagpiaran ti Kasayaatan a Pagalagadan
TI KINAMAPAGPIARAN ket makomendaran unay iti Biblia ket isut’ maysa a pagannurotan agpaay kadagiti pudno a Kristiano. (Mateo 22:39; 2 Corinto 8:21) Nupay kasta, ti kinamapagpiaran isut’ pudpudno a kasayaatan a pagalagadan, kas naidemostra iti panagbiag dagiti adu itatta a ti puspuso ken isi-sipda ti binaliwanen ti umiso a pannakaammo iti Biblia. Maysa a pangarigan iti daytoy ti naggaput’ Liberia.
Kalpasan ti adu a panagkarkararag, maysa a panglakayen a Kristiano ken ti asawana ti nangiserran ti sastreriada. Apay? Ngamin ta ibusenna ti adu a tiempoda ken laplapdanna ida kadagiti ministerial nga ar-aramidda ken personal a panagadalda. Nagnummuanda a mapnekda laengen manipud bassit a pamastrekanda manipud panaglako kadagiti pagkolor ti tela. Dagus kalpasan panangalada itoy nga addang, nupay kasta, ti presio dagiti pagkolor ti bimmaba kadagiti paglakuan. Itan ti pamastrekanda ket saanen nga umanay a mangsustento ti pamiliada. Ania itan ti aramidenda?
Indawatda iti kompania nga agsupsuplay ti pagkolor nga ibabadat’ presioda, tapno maaddaanda met ti ganansia. Daytoy ti di naipalubos. Nupay kasta, intukon ti kompania nga isudat’ mangipatulod ti dua a resibo, maysa a mangipakpakita ti aktual a presio ken daydiay maysa ti naipababa a presio nga isuntot’ iparangda idiay Aduana tapno basbassit ti bayadanda a buis. Daytoy ti mangipalubos iti panglakayen a maaddaan ti $2,000 a saan a legal a ganansia iti tunggal angkatenda.
Nagmadi ti kabsat a makipaset iti negosio a sinisuitik ken pakalugian ti gobierno. Nagsiddaaw dagiti opisiales ti kompania. Nagsuratda: “Respetuenmi ti konsensiayo,” ket insaadda ti panglakayen kas solo nga ahente ti produktoda idiay Liberia. Itan ta ti material a pagkasapulan ti pamilia ti supisiente a maipapaayen, ti panglakayen ken ti asawana ti nakapag-auxiliary payunir, a sisisinged a makipagtartrabahoda kadagiti kakabsat a mangpabileg ti kongregasion. Pudno unay, ti kinamapagpiaranda nagbalin a bendision kadakuada.
Ni Alfonso, sadi España, natakkuatanna met a ti kinamapagpiaran ti kasaayatan a pagalagadan. Daytoy nga agtutubo ti pimmanaw idiay balayda iti agtawen ti 12, ket di nagbayag isut’ aglaklakon ti droga, agraman panagtakawna kadagiti kotse, pagtaengan, ken kadagiti paglaklakuan. No maminsan isut’ agtakaw manipud sangapulo nga tiendaan iti maysa nga aldaw. Idi agtawen ti 21, uppat kadagiti kakaduana ti nangkabkabil kenkuana, tinakawda ti intero nga abastona ti droga, ket binutbutengda nga isut’ papatayenda no agidarum kadagiti polisia. Gapu ta isut’ am-ammo dagiti polis, isut’ agbuteng a mapan ospital nga agpaagas.
Bayat nga in-inut nga umim-imbag dagiti sugatna, pinampanunot a nauneg ni Alfonso ti wagas ti panagbiagna. Nalagipna dagiti bambanag maipapan iti Biblia ken dagiti Nakristianuan a prinsipio nga insursuro ni nanangna idi isut’ ubing pay. Idi, saanna nga inkankano dagiti sasao ni nanangna, ngem itan dimmawat ti panagadal ti Biblia kadagiti Saksi ni Jehova. Kadagiti innem a bulan binalbaliwanna a naan-anay ti kababalinna ken personalidadna ket nakakualipikar para iti bautismo.
Nupay kasta, iti aldaw sakbay ti bautismona, isut’ nakaawat ti pakaammo nga agparang iti korte tapno sanguenna ti darum maipapan ti armado a panagtakaw. Isut’ krimen a naaramidanna a nabayag metten. Nupay kasta, impudno ni Alfonso ti basolna ket isut’ nabalud a naguray ti pannakabistana. Isut’ pinilit ti abogadona a kunaenna nga awan aniaman a tinaktakawna ken isut’ saan nga agaw-awit ti paltog. Ngem impapilit latta ni Alfonso ti panagsaona ti pudno. Gapu iti basolna ken ti dakes a rekordna iti polisia, ti hues ti nangikeddeng ti sentensia a 13 tawen. Ngem gaput’ nasayaat a konduktana ken mapagpiaran a kababalinna, isut’ naikkan ti innem a bulan, a dayta a panawen ti naserbiannan bayat panagur-urayna ti pannakabistana.
Itan ni Alfonso ken ti asawana agserserbidan a simamatalek ken Jehova, a maragsakan ta nasarakanda ti pudpudno a panggep ti panagbiag ken napaneknekanda babaen ti bukodda a kapadasan a ti kinamapagpiaran ti kasayaatan a pagalagadan.