Ti Grande a Milenio Umasidegen

“Ket nakitak dagiti trono, ken dagiti nagtugaw kadakuada, ket naitalek kadakuada ti panangukom. Wen, nakitak dagiti karkararua dagiti naputolan gapu iti pammaneknek ken Jesus ken gapu iti sao ti Dios, ken dagup dagiti saan a nagdaydayaw idi animal ken iti ladawanna ken saan a namarkaan kadagiti mugmugingda ken iti imada. Ket nagbiagda ken nakipagarida ken Kristo iti sangaribo a tawen.” “Ket [ti Dios] punasennanto ti amin a lulua kadagiti matada [ti sangatauan] ket awanton ni patay, ket awanto metten ti sasaibbek wenno sangsangit wenno rigrigat. Ta dagiti immuna a bambanag napalabasdan.”​—Apocalipsis 20:4; 21:4.

BABAEN iti dayta impadles ti Biblia ti umad-adanin a grande a milenio​—ti Sangaribo a Tawen a Panagturay ni Jesu-Kristo ken ti naitimpuyog a bagi dagiti nailangitan nga ar-ari. Nalabit adda pagannayasanyo nga iwaksi daytoy a padto kas pagpagarup laeng, maysa nga arapaap. Nupay kasta, adda nawadwad a rason tapno matmatanyo daytoy a Milenio kas um-umayen a kinapudno!

Umuna, ti panagadal ti Biblia ipanayagna kadakayo a sinalaysayna dagiti napalabas nga innem a milenio ti natauan a historia iti nakaskasdaaw a mapagtalkan a pamay-an. Mainayon pay, ti Biblia ket maysa a libro ti padto, ket ti kadakkelan a bilang dagiti pammadlesna, wenno padpadtona, natungtungpalen iti tunggal detalyena.a Gapu iti dayta, apay ketdin a ti Biblia di mapagtalkan iti panangipadlesna iti umasidegen a Milenio a panagturay ni Kristo? Ngem, mabalin a pampanunotenyo no aniat’ ibagbaga ti Biblia kadatayo maipapan iti dayta a panawen. Aniat’ panggep a serbian dayta? Ken iti partikular a paginteresanyo, kasano nga apektaranna ti biagyo?

Tawid a Napukaw

Ipakita ti Biblia a ti Sangaribo a Tawen a Panagturay ni Kristo ket isut’ pamay-an a panangipasana ti kasusudian a patawid kadagiti “annakna.” Ngem ania a tawid? Ken ania nga “annak”? Ti tawid mabalin a depinaren kas banag a maipasa kadagiti annak ti maysa iti ipapatayna. Idi a ni inapotay nga Adan simmukir iti Dios, napukawna nga agpaay kenkuana ken amin nga annakna​—ti intero a natauan a rasa​—ti kalintegan nga agbiag nga agnanayon iti naindagaan a paraiso. Gapu itoy impasa ni Adan ti tawid ti basol, ipapatay, ken sensennaay kadagiti kapuonanna.​—Genesis 3:1-19; Roma 5:12.

Immay ni Jesus ditoy daga iti lasag tapno mapasublina iti sangatauan ti tawid a napukaw ni Adan. Inaramidna daytoy babaen ti panangpanekneknat’ kinamatalekna ken Jehova a Dios, a situtulok nga indatonnat’ biagna a maipaay iti sangatauan. (Juan 3:16) Babaen iti panagbiagna iti maysa a perpekto, awan basolna a biag, nagun-odan ni Jesus ti kalintegan iti agnanayon a perpekto a biag iti Paraiso ditoy daga​—ti mismo a banag a napukaw ni Adan. Nupay kasta, di pulos inalagad ni Jesus dayta a kalintegan; ken saanna met a napukaw dayta idi isut’ natay ken napagungar iti biag idiay langit. Ngarud mausarna dayta kas nasudi a tawid nga ipasa kadagiti “annakna.”​—Roma 5:18, 19.

Dagiti Agtawid​—“Annak” ni Kristo

Idiay Isaias 9:6 ni Jesus babaen iti padto ket naawagan “Agnanayon nga Ama.” Isut’ agbalinto kas ti Agnanayon nga Ama ti nasubboten a lubong ti sangatauan, nga addat’ posision a mangipasa ti tawid kadagitoy nasubboten, wenno kinupkopna nga annak. (Mateo 20:28; kitaenyo met ti Salmo 37:18, 29.) Daytoy ti nalawag a naipakita iti karina: “Umaykayo, bendito ni Amak, tawidenyo ti pagarian a naisagana kadakayo nanipud idi pannakabangon ti lubong.” Sana kinuna pay: “Naragsak dagiti naemma, ta tawidendanto ti daga.”​—Mateo 5:5; 25:34.

Tapnon ti daga agbalin a maikari a tawid, nupay kasta, masapul a nainget a mabalbaliwan dagiti kasasaad​—a maiyeg iti kinaperpekto! Daytat’ masapul nga agbalin a lubong a sadiay ti naan-anay a talna ken panagtutunos agturay iti amin a parsua ti Dios. (Isaias 11:6-9) Isuamin a pakakitaan ti natauan a kina-imperpekto ti rebbeng a maparmek, agraman ken patay. (1 Corinto 15:25, 26) Kaipapanan daytoy a dagiti natay, a paset ti nasubbot a sangatauan, masapul a mapagungarda. Iti daytoy laeng a pamay-an a maaddaandat’ gundaway nga agbalin nga agtawid ken Kristo!​—Juan 5:28, 29.

Iti kasta, ti Sangaribo a Tawen a Panagturay ni Kristo agbalinto a naragsak a tiempo a sadiay ti sangatauan agin-inut a “maluk-atanto iti pannakaadipen ti panagrupsa” ket makagtengto iti kinaperpekto. (Roma 8:21) Makapainteres, ta uray dagiti nailubongan a gubuayan bigbigenda daytoy kas ti panggep ti milenio. Ti Webster’s Ninth New Collegiate Dictionary (edision ti 1985) depinarenna ti “milenio” kas “ti panawen ti dakkel a ragsak wenno natauan a kinaperpekto.”

Lab-awanna ti Panagturay ni Salomon

Daytoy nadayag a Milenio ket maiyasping iti natalna ken narang-ay a 40-años a panagturay ni Ari Salomon iti kadaanan nga Israel. (1 Ar-ari 4:24, 25, 29) Idi a ti reina ti Seba sinarungkaranna ni Ari Salomon, kunana: “Napudno a damag ti nangngegak iti dagak met laeng a maipaay kadagiti ar-aramidmo ken iti kinasiribmo. Nupay kasta diak pinati dagiti sasao agingga nga immayak tapno makita dagiti matak; ket, adtoy! ti kagudua saan a naibaga kaniak. Ti kinasiribmo ken ti kinarang-aymo labsanda ti dayaw a nangngegak. Naragsak dagiti lallakim; naragsak dagiti ad-adipenmo, a tumakder a kankanayon iti sangom, ken makangkangngeg iti kinasiribmo!”​—1 Ar-ari 10:6-8.

No ti kinatalna, kinarang-ay, ken kinasirib ti 40-años a panagturay ni Ari Salomon ket nalab-awanna, wen, a nadoblena pay a nasursurok, dagiti dakkel a ninamnama ti reina ti Seba, ngarud ti Sangaribo a Tawen a Panagturay ti dakdakkel, a nailangitan nga Ari Salomon, a ni Jesu-Kristo, sigurado a lab-awanna ti natauan nga ar-arapaap! Kadagiti sasao a mismo ni Jesus, isu ti “nangnangruna ngem ni Salomon.” (Mateo 12:42) Padasenyo nga iladawan iti panunotyo ti kasasalun-atan, kararang-ayan, katalnaan, kalilintegan, ken kararagsakan a kasasaad ditoy daga a mabalinyo a panunoten, ket dikayto pay napanunot uray sangkabassit no aniat’ adda nga isagsagana ti Milenio ni Kristo.

Maigiddanto Aya iti Maikatlo a Milenio?

Dagiti sangalubongan a pasamak nanipud pay 1914 ipakpakitana nga agbibiagtayon “iti panungpalan ti sistema dagiti bambanag.” Innayon pay a kinuna ni Jesus a ti kaputotan a nakainaigan dagitoy naipadto a paspasamak ket “dinto pay lumabas . . . agingga a maaramidton amin dagitoy a banag.” Kayat kadi a sawen daytoy, a ti Milenial a Panagturay ni Kristo ket maigiddan iti maikatlo a milenio?​—Mateo 24:3-21, 34.

Pinakdaaran ni Jesus dagiti adalanna a saanda a mangpugpugto. Kinunana: “Saan a maibatang kadakayo ti panangammo kadagiti aldaw wenno kadagiti tiempo nga intalimeng ti Ama iti pannakabalinna a bukbukod.” (Aramid 1:7) Ket no maipapan iti eksakto nga “aldaw ken oras” inton mapasamak dagitoy a bambanag, kuna ni Jesus a ti laeng Ama, ni Jehova a Dios, ti makaammo. (Mateo 24:36) Gapuna, ti Biblia ket saan a mangsupsuportar ti asinoman kadagiti dumakdakkel a bilang itan dagiti mammadto ken movimiento ti panagpatingga ti lubong a mangitudtudo iti panagpatit ti tengngat’ rabii iti Bisperas ti Baro Tawen, ti 1999, kas ti panungpalan ti lubong.

Nupay kasta, ipakita a silalawag dagiti paspasamak ti agdama a lubong a ti tiempo ti panungpalan daytoy nasipngeten, a nadangkes a sistema dagiti bambanag ket “lumabasen” ket ti Milenio ni Kristo “umasidegen.” (Roma 13:12) Imbes a pugpugtuan ti eksakto nga aldaw ken oras ti iyaay daytoy, tiempo itan ti panangammo kadagiti pagannurotan ti Dios a maipaay ti pannakailasat. (Juan 17:3) Iti daytoy a pamay-an maammuanyo no kasanot’ panagbalin a maysa kadagidiay pangikunaan ni Jesus: “Umaykayo, bendito ni Amak, tawidenyo ti pagarian a naisagana kadakayo nanipud idi pannakabangon ti lubong.” (Mateo 25:34) Dagiti Saksi ni Jehova situtulokda a tumulong kadakayo a mairaman kadagidiay mangtagiragsakto kadagiti bembendision iti um-umayen a grande a Milenio.b

[Dagiti Footnote]

[Blurb iti panid 6]

“Umaykayo, bendito ni Amak, tawidenyo ti pagarian a naisagana kadakayo nanipud idi pannakabangon ti lubong”