Panangispal iti Daga Manipud Pannakadadael

NAMINSAN sakbay ti natauan a historia, inispal ti Dios ti daga manipud pannakadadael manipud im-ima dagiti tattao. Inaramidna dayta babaen iti sangalubongan a layus idi kaaldawan ni Noe. Awan rekordtayo a dagiti tattao daddadaelenda ti pisikal nga aglawlaw iti daydi a tiempo. Ngem ti daga nadadael iti sabali a pamay-an agingga a narikna ti Dios ti pannakasapul nga agtignay iti kasasaeman a pamay-an.

Kuna ti Biblia: “Ket ti daga nadadael iti sanguanan ti pudno a Dios ket napno ti daga iti ranggas. Gapuna nakita ti Dios iti daga, ket, adtoy! dayta ti nadadael, ta amin a lasag dinadaelda ti dalanda iti rabaw ti daga.” (Genesis 6:4, 11, 12) Wen, idi kaaldawan ni Noe minatmatan ti Dios ti daga kas nadadael gapu iti kinaranggas ken kinadakes ti sangatauan.

Kasta met, idi tagikuaenen ti kadaanan nga Israel ti Naikari a Daga, namakdaar ti Dios: “Dikayto mamulitan ti daga a pagyananyo; ta ti dara mulitanna ti daga . . . ket dikanto rugitan ti daga a pagnaedanyo.” (Numeros 35:33, 34) Gapuna, nadadael ti Canaan gapu iti panagbasol iti dara dagiti agtaeng kenkuana. Ti nakaap-aprang a pangarigan iti daytoy ket ti ugalida nga agidaton ti ub-ubbing kadagiti didiosda.

Dagiti Canaanita napalalot’ kina-imoralda, ket daytoy met ti nangapektar ti panangmatmat ti Dios iti daga. Pinakdaaranna ti Israel: “Dikay mulmulitan ti bagbagiyo iti uray ania kadagitoy [nga imoral nga aramid], ta amin kadagitoy namulitan dagiti nasnasion nga iyadayok iti sanguananyo. Ket ti daga namulitan, . . . ket ti daga isaruana dagiti agnaed kenkuana.” (Levitico 18:24, 25) Ti imoralidad ken panagibuyat ti dara dinadaelna ti Canaan agingga a ti Dios dinadaelna dagiti nasion a Canaanita.

Ti Panangdaddadael iti Daga

Kumusta met itatta? Ditay met aya agbibiag iti panawen ti di mamedmedmedan a kinaranggas, panagibuyat ti dara, ken imoralidad? Agpapan pay panangpadas ti tao a panangtarimaan kadagiti panangperperdina iti pisikal a daga, dinanto pulos maipasubli iti biag ti napattapatta a sangagasut a milion a natnatayen kadagiti gubgubatna bayat daytoy a siglo; ket dina metten maipasubli dagiti minilmilion a pinatpatay dagiti kriminal wenno dagiti di mabilangen a nakalkaldaang a biktima a matmatay gaput’ bisin. Siempre, saannan maipasubli ti napattapatta a 40 ingganat’ 60 milion a di naipasngay nga ub-ubbing a ti biagda ket kinettel ti aborsion kada tawen. Pagduaduaantayo aya a ti daga ket agdama a madaddadael iti imatang ti Dios babaen kadagita a bambanag​—malaksid pay iti imoralidad a nakasaksaknapen itatta?

Ibaga ti sentido komon kadatayo a ti Dios masapul nga agtignay iti mabiiten tapno ispalenna ti daga manipud panangdaddadael, ket ti padto ti Biblia patalgedanna daytoy. Ngem anianto ti aramidenna? Kuna ti Biblia nga “iyegna ti panangdadael kadagidiay mangdaddadael iti daga.” (Apocalipsis 11:18; idiligyo ti Mateo 24:3-14.) Kas ti agpapaabang pagtalawenna ti manangdadael nga agab-abang, kasta met ti Dios “pagtalawenna” dagidiay mangdaddadael iti napintas a parsuana, ti daga.

Kuna ti Biblia: “Ngem dagiti nadangkes, magudasdanto ditoy daga; ket dagiti nagulib maparutdanto kenkuana.” (Proverbio 2:22) Daytoy um-umay a nadiosan a panagtignay ket aw-awagan ti Biblia nga Armagedon. (Apocalipsis 16:16) Daytat’ inawagan met ni Jesus iti “dakkel a rigat a nanipud idi punganay ti lubong agingga ita, awan pay kasta a napasamak, ket awanto metten iti uray kaano.” (Mateo 24:21) Dakdakkelto pay dayta ngem iti Layus.

Daytoy kadit’ aglablabes wenno di nainkalintegan a solusion? Saan, ti Dios, kas ti Namarsua iti daga, addaan kalintegan a mangikeddeng no asino dagiti agtaeng iti dayta. Isut’ addaan kalintegan met a pagsungbaten ti tao kadagiti ar-aramidna. Mainayon pay, no palubosan ti Dios ti tao nga agtultuloy iti kursona a di masitsitar, madadaelton ti daga para iti tunggal maysa, ket agbalinton nga imposible ti biag. Iti kasumbangirna, babaen ‘panangiyegna ti panangdadael kadagidiay mangdaddadael iti daga,’ italtalimeng ti Dios ti naindagaan a tawidtayo para kadagidiay manangipateg. Ti Biblia inkarina: “Ta ti nalinteg agtalinaedto ditoy daga ket ti napnuan-imbag agtaengto kenkuana.”​—Proverbio 2:21.

Babaen iti tulong ti Dios, minilmilion dagiti nakasarak ti bileg a mangiparang ti bagida a nalinteg gapu ta kayatdat’ agbati a mangtagiragsak iti sangaparsuaan ti Dios. Sursurotenda met dagiti nangato a moral a pagalagadan ti Dios ken likliklikanda ti kinaranggas ken uray pay indirekta a panagbasol iti dara. Gapuna, saanda a manangdadael iti daga iti daytoy nasken a kaiyuloganna.

Ti Daga a Naispal Manipud Panangdadael

Dagita itatta ti addaan naragsak a namnama a makakita iti daga a mabaliwan manipud agdama a nadadael a kasasaadna nga agbalin a nasalun-at a paraiso. Ay ket, uray dagiti bagida madalusanton, mapasin-aw kadagiti makadadael nga epekto ti basol. Ti maudi a libro ti Biblia iladawanna ti sagana ti Dios a mamagbalin kadagitoy amin a posible kas simboliko a “karayan ti danum ti biag.” Iti agsumbangir daytoy a karayan, “adda dagiti kayo ti biag nga adda sangapulo ket dua a kita ti bungada, nga agbunga iti binulan. Ket dagiti bulbulong dagiti kayo maipaayda iti pannakaagas dagiti nasnasion.”​—Apocalipsis 22:1, 2.

Daytoy naipaltiing a sirmata ket garantia a ti Dios ispalenna ti daga ken ti agnaed a sangatauan manipud iti pannakadadael. Dadduma a padpadto mangtedda pay kadagiti nasapa a panirpatan iti dayta naipasublin a daga. Panunotenyo, kas pangarigan, ti kas bumiberso nga antimano a panangmatmat ni Isaias: “Ti let-ang ken ti namaga a daga naragsakdanto, ket ti tay-ak a langalang agragrag-onto ken agsabongto a kas iti rosa. Isu agsabongto iti nawadwad, ken agrag-onto a buyogan pay ti ragsak ken kankanta.” (Isaias 35:1, 2) Iti dayta awanton dagiti namulitan a baybay, nadaddadael a pagmulaan a daga, wenno nasabidongan nga atmospera.

Kangrunaanna, ti daga saanton a madadael iti kinaranggas, panagibukbok ti dara, wenno imoralidad. Dagidiay laeng agraem iti Dios, kadagiti pagannurotanna, ken ti sangaparsuaanna ti addanto idiay. (Apocalipsis 21:7, 8) Denggenyo itan dagiti nadayag a resulta amin dagitoy a bambanag: “[Ti Dios] punasennanto ti amin a lulua kadagiti matada, ket awanton ni patay, ket awanto metten ti sasaibbek wenno sangsangit wenno rigrigat. Ta dagidi immuna a bambanag napalabasdan. . . . ‘Adtoy! Pagbalinek a baro dagiti isuamin a bambanag.’”​—Apocalipsis 21:4, 5.

Anian a nagragsak a resulta! Anian a ragsaktayo nga iti mabiiten ti Dios “iyegna iti panangdadael dagidiay mangdaddadael iti daga”! Ket anian a nagdakkel ti panangtignay dagitoy naipaltiing a karkari kadatayo nga agtarigagay nga agserbi iti Dios a mangispal iti daga manipud pannakadadael ket pagbalinen dayta a naparaisuan a pagtaengan para kadagiti nalinteg panagpuspusona a tattao!

[Blurb iti panid 6]

Kuna ti Biblia a ti Dios “iyegna ti panangdadael kadagidiay mangdaddadael iti daga.”​—Apocalipsis 11:18