Dagiti Agtutubo nga Agserserbi iti Dios

MAKITKITAYO aya a kasla karkarna a dagiti nasasayaat nga agtutubo busbusbosenda ti tiempoda, nga awan sueldoda, nga umay kadagiti balbalayyo a mangisarsarita ti maipapan iti Dios? Kasla aya nakaskasdaaw, nga iti panawen a kumarkaro ti kinaawan-pammati, ket dagiti ub-ubbing makikadkaduada kadagiti dadakkelda a mangisarsarita iti dadduma maipapan kadagiti nakaskasdaaw a karkari ti Biblia iti naragsak a masanguanan?a

Iti kaaduan kadagiti 60,000-ken-ad-adu pay a kongregasion dagiti Saksi ni Jehova iti intero a daga, makitayo ti nagadu nga agtutubo. Saanda a mapmapan kadagiti linawas nga eskuelaan Dominicana wenno klase ti katecismo. Imbes ketdi, dagitoy nga agtutubo magunggunggonaanda ken makiramramanda pay kadagiti panaggigimong ti kongregasion. Dagiti babassit mangmangtedda kadagiti simple a komento. Dagiti saan pay a tin-edyer makiramramanda iti Teokratiko nga Eskuelaan ti Panagministro. Adu a tin-edyer ti mangbusbusbos kadagiti bakasionda iti panangtulong kadagiti kakaarrubada a makaammo maipapan ti Dios ken kadagiti nakaskasdaaw a karkarina iti masanguanan.

Awan a talaga ti baro maipapan ti kasta nga aramid dagiti agtutubo. Saritaen ti Biblia maipapan kadagiti matalek a babbaro ken babbalasang, agraman dagiti agtutubo ken babassit nga ubbing, a nangipakita kadagiti nakaskasdaaw nga ulidan iti panagserbi iti Dios.

Ti Salmo a libro ti Biblia impadtona maipapan ti “bunggoy dagiti babbaro,” a makapabang-ar ken nakaad-adu kas “linnaaw,” iti nadiosan a serbisio. Sawenna met dagiti “babbaro” ken “babbalasang” a mangidaydayaw iti nagan ti Dios. (Salmo 110:3; 148:12, 13) Mabalbalin, addada met presente a sumagmamano nga agtutubo idi naiparukpok ti nasantuan nga espiritu ti Dios kadagiti manamati idi Pentecostes iti 33 K.P. Iti dayta nga aldaw agarup 3,000 ti nangabrasa ti Sao ket nabautisaran. Kuna ni apostol Pedro a daytoy nakaskasdaaw a pasamak ket kaitungpalan ti padto ni Joel: “Ket dagiti annakyo a lallaki ken babbai agipadtodanto ket dagiti babbaroyo makakitadanto kadagiti parparmata ket dagiti lallakayyo agtagainepdanto ti tagtagainep.”​—Aramid 2:4-8, 16, 17, 41.

Dagiti dadduma pay nga ulidan ti Biblia a nagserbi ken Jehova a Dios iti kina-agtutuboda ket ramanenna da Samuel, ni nalinteg nga Ari David, dagiti nalatak a mammadto ti Biblia a da Jeremias ken Daniel, agraman ken matalek a Timoteo. Daytoy a bilang ti naglaon ti tallo nga artikulo a mangsalaysay ti sumagmamano kadagitoy nga ulidan idiay Biblia. Makitayo manipud kadagiti artikulo no apay a dagiti agtutubo, agraman dagiti tattao a natataengan, serioso ti panagserbida iti Dios ken no apay a mangbusbusbosda ti adu a tiempo a tumultulong kadagiti kaarrubada a mangaramid met ti kasta.

[Dagiti Footnote]