Panangiparang ti Naimbag a Damag—Kadagiti Agtutubo
1 Napaneknekan a daytoy moderno a panawen ket narikut unay a tiempo nga agpaay kadagiti kaaduan nga agtutubo. Agpapan kasta, iti siniglon a napalabas insurat ti maysa a tao a pinaltiingan iti Dios: “Kasano a madalusan ti maysa nga agtutubo iti dalanna? Babaen ti panagannadna a maitunos iti saom.” (Sal. 119:9) Ngarud, ti panangidalan a naibasar iti Sao ni Jehova isut’ makagunggona kadagiti rinibo nga agtutubo kadagitoy nga aldaw.
2 Itan dagiti agtutubo ket nalakadan a makagteng kadagiti napateg a gubuayan iti Nainkasuratan nga impormasion babaen ti naipablaak iti porma ti maysa a baro a libro nga, Dagiti Saludsod nga Iyimtuod ti Agtutubo—Dagiti Sungbat nga Epektibo. Ania ti maaramidyo tapno maadda daytoy kadagiti agtutubo idiay teritoriayo wenno kadagiti agtutubo iti pagadalan?
INTERESADOKAYO KOMA KADAGITI AGTUTUBO
3 Ti panangguyugoy kadagiti agtutubo a mangipateg iti Sao ni Jehova isut’ maysa a karit. (Kitaenyo ti Proverbio 22:15.) Nupay kasta, kinuna ni apostol Pablo: “Kadagiti Judio nagbalinak a kasla Judio, tapno magun-odak dagiti Judio.” (1 Cor. 9:20) Umasping iti daytoy, ti panangtulong kadagiti agtutubo a mangsarak ken mangipateg iti espiritual a panangidalan kasapulanna iti pannakaawat kadagiti agtutubo ken dagiti problemada. Kasapulan a panunoten ida iti termino nga no ania ti paginteresan dagiti agtutubo ken no ania dagiti problemada idiay pagadalan ken iti pagnaedan wenno pagtrabahuanda. No mangasabakayo kadagiti agtutubo, daytoy a pannakaawat ti isarming dagiti introduksion, komento, ken dagiti saludsodyo. Iti listaan dagiti linaon daytoy baro a libro nga Iyimtuod ti Agtutubo isut’ ekselente a gubuayan iti ideya no ania a banag iti pagsaritaan. Babaen ti panangkabisado kadagitoy a suheto, addaankayo ti pannakaawat no ania iti kapanunotan dagiti agtutubo kadagitoy nga aldaw.
NO ANIA ITI SAWENYO
4 No makisaokayo iti agtutubo, masapul a nagayyem ken tratuenyo ida a natakneng. Kalpasan iti panangablaaw, mabalinyo a kunaen, “Makipaspasetak iti serbisio ti publiko a tumulong iti agtutubo a tattao a kas kenka a mangparukma kadagiti problema a naipasango kadakuada iti komunidad. Naisagmakka kadin a mangaramid iti maysa a banag nga iti kinapudnona ket saanmo a kayat nga aramiden? Wenno maipasuboka aya a mangaramid kadagiti bambanag no dadduma agsipud ta ar-aramiden dayta iti sabsabali ngem saanmo a bukod a pagayatan? Napanunotmo kadin no kasano a maparukmam iti panangpuersa dagiti kapatadam?” Kalpasan ti isusungbatna, luktanyo ti libro iti kapitulo 9. Sa kunaenyo: “Pangaasim ta kitaem no ania ti kunaen daytoy baro a publikasion iti panid 77. [Basaen ti maitutop a parapo.] Mamatika kadi a ti panagadal iti Biblia ket tumulong iti agtutubo a mangparukma iti daytoy a problema? [Palubosan nga agkomento.] Siputam no ania iti makuna ti Biblia ditoy Salmo 119:9. [Mabasa.] Ipakita daytoy a libro no kasano a ti Biblia ket matulonganna dagiti agtutubo a mangparukma kadagiti napeggad a kasasaad, a kas kadagidiay nailista a linaonna. [Ipaima kenkuana ti libro.] Kukuam daytan babaen ti kontribusionmo a ₱21.00.”
5 Ni Jehova “saanna a kayat iti siasinoman a madadael.” (2 Ped. 3:9) Ramanenna daytoy dagiti agtutubo. Nupay kasta, adu dagiti agtutubo ti saan a makalasat iti Armagedon. Sapay koma ta ti pingettayo a mangasaba kadagiti agtutubo a siiepektibo ket agresulta iti pannakaisalakan iti nawadwad a bilang dagiti agtutubo a tattao, iti dayaw ni Jehova.