Panangtulong iti Agtutubo a Mangliklik iti Kalamidad
1 Kayat ni Jehova a pagragsakantayo iti biag. Tapno maragpat dayta, impalubosna kadatayo iti maysa a rukod ti wayawaya tapno maaramid iti tarigagay ti pusotayo. Ngem kakuyog dayta a wayawaya, umiso ti panagkuna ni Jehova a sungsungbatantayo no ania iti aramidentayo.—Ecl. 11:9.
2 Agsipud ta imperpektotayo, kasanotayo a maliklikan iti kalamidad wenno didigra? (Ecl. 11:10) Posible kadi uray kadagiti awan kapadasanda nga agtutubo a maliklikanda iti kalamidad? Wen. Siaayat nga impaay ni Jehova dagiti pammagbaga ken giya a tumulong nga agpadpada kadagiti agtutubo ken nataengan a lumasat a sitatalged kadagiti sangagabsuon a pakarigatan kadagitoy maudi nga al-aldaw.—Sal. 19:7; 119:9; 2 Tim. 3:1.
RESPONSABILIDAD ITI NAGANNAK
3 No dumteng iti riribok, kasapulan dagiti agtutubo iti responsable a nagannak a ‘mangpalinteg kadagiti ima a napaksoyan tapno ti nabullo ket maisubli iti suopna, ket iti kasta maimbagan.’ (Heb. 12:12, 13) Tapno matulongan dagiti annakda, kanayon koma nga ihusto dagiti nagannak iti pampanunot dagiti ubbingda. Kasapulanna daytoy iti anus ken laing.
4 Saan a maan-anay a masaluadan dagiti nagannak iti annakda manipud iti dakes nga impluensia. Ngem kasano a masalakniban iti panunot ti maysa nga ubing? Babaen ti ‘panangpadakkel kadakuada iti makaiwanwan ti panunot ni Jehova.’ (Efe. 6:4) Ramanenna daytoy iti napamiliaan a panagadal, espiritual ken moral a giya, maitutop a disiplina, ken naimbag nga ehemplo dagiti nagannak.
5 Ti libro a Dagiti Saludsod nga Iyimtuod ti Agtutubo—Dagiti Sungbat nga Epektibo isut’ nadisenio a tumulong kadagiti agtutubo. Tumulong met kadagiti nagannak a makirinnason iti annakda maipapan kadagiti nalinteg a pagalagadan. No dagiti linteg ti Dios ket maimaldit iti panunot ken puso ti ubing, daytoy ti agserbi a kas makaiwardas nga impluensia. Ti napamiliaan a diskusion iti daytoy a baro a publikasion isut’ mangsaluad kadagiti agtutubo a mangliklik iti kalamidad.
6 Idi a nairuar daytoy a libro kadagiti kombension, naparegta dagiti nagannak nga usarenda daytoy a kas basaran iti napamiliaan a diskusion. Iti konklusion ti kada kapitulo adda dagiti “Salsaludsod a Pagsasaritaan.” Saan a nadisenio dagitoy a maipaay iti parapo por parapo a panagadal. Ti kada saludsod ket saklawenna iti maysa wenno ad-adu pay a subpaulo. Dadduma kadagiti ulo ti pamilia iti nalabit a pilienda nga usigen dagiti saludsod kalpasan ti panangbasa iti intero a kapitulo. Nalabit nga isaludsod iti dadduma dagiti saludsod bayat a mawanas dagiti material iti sidong dagiti subpaulo a mabasa.
PANANGTULONG ITI AGTUTUBO IDIAY TERITORIATAYO
7 Adu dagiti agtutubo idiay teritoriatayo ti addaan iti salsaludsod a kaasping dagiti nailawlawag iti daytoy baro a libro. Gapuna a bayat iti Hunio dakamatentayo daytoy Iyimtuod ti Agtutubo a libro idiay tay-ak. Nalabit a kayatyo a sawen dagiti bambanag a kas sumaganad:
8 “Masansan a panunotentayo a ti kinaagtutubo isut’ karagsakan a periodo iti biagtayo. Ngem daksangasat a makita nga adu dagiti naliday nga agtutubo kadagitoy nga aldaw. Saan kadi a kasta? [Palubosan a sumungbat.] Ti panagbalbaliw dagiti pagalagadan isut’ namataud ti riribok ditoy lubong agraman iti nagadu a problema a nangapektar kadagiti agtutubo a nangagaw iti ragsakda. Sadino ti pakasarakanda iti mapagtalkan a direksion? [Palubosan nga agkomento.] Siputan no ania iti irekomenda ti Salmo 119:9. [Mabasa.] Ilawlawag ti Biblia iti naamaan ken nainaan a responsabilidad a mangisuro iti umiso ken mangtedda iti instruksion sigun iti Proverbio 1:8. [Mabasa.] Maitunos iti daytoy, ti libro a Dagiti Saludsod nga Iyimtuod ti Agtutubo—Dagiti Sungbat nga Epektibo isut’ napno kadagiti praktikal a giya a naibatay iti Biblia. Addaan met kadagiti pudno iti biag a kapadasan a tumulong iti agtutubo a mangsango iti masakbayan a sibaballigi. [Itudo dagiti adu a titulo dagiti kapitulo a makatukay iti interes.] Pagragsakanyo daytoy a libro iti kontribusionyo a ₱21.00.”
9 Sigurado a daytoy a baro a libro ket itudona dagiti adu a gubuayan iti di marukod a sirib—ti Biblia. Anian a nagpateg a kagawaan a mangiwanwan kadagiti agtutubo iti makapnek a biag itan ken iti natalged a masakbayan!—Ecl. 12:1.