Aniat’ Napasamaken iti Kababalin ti Tao?
“Apay ngata nga addaantayo ti kinaulpit iti ubing itoy a panawen? Apay ngata nga addaantayo ti kinaulpit iti animal? Apay ngata nga addaantayo ti kinaranggas? . . . Apay ngata a dagiti tattao agturongda iti terorismo? Apay ngata a dagiti tattao agturongda iti droga? . . . Apay, idinto nga addankay ti isuamin, dadduma a tattao agturongda kadagitoy pamunganayan a bambanag a mangpakapuy iti intero a sibilisasion?”
DAGITA ti insaludsod a sipipigsa ti primero ministro ti Britania. Nalabit naiyim-imtuodyo metten dagita iti adun a daras. Nasarakanyon aya ti aniaman a makapnek a sungbatda?
Iti panangilawlawagna iti salsaludsodna, ti primero ministro kunana: “Iti adu a tawtawen idi ubingak pay ken addan iti politika buyogen ti amin a namnamak ken ar-arapaap ken ambisionko, agparang kaniak ken iti adu kadagiti kapatadak a no maaddaantay ti panawen a sadiay addaantayo kadagiti nasayaat a balbalay, nasayaat nga edukasion, ken rasonable nga estandarte ti panagbiag, iti kasta nakasaganan ti isuamin ket rebbeng nga addaantayonton ti kalalainganna ken nalaklaka a masanguanan. Ammotay itan a daytat’ saan nga agpayso. Naipasangotayon kadagiti pudpudno a problema ti kababalin ti tao.”—Kukuami ti italiko.
Ti nakaisigudan ti tao mabalin a madepinar kas “ti sistema dagiti pamunganayan a kapampanunotan ken kababalin dagiti natauan a biag.” Kaawatan, dagiti agsusuppiat a kapampanunotan ken kababalin pataudenda dagiti parikut iti personal, nasional, wenno uray pay iti internasional a tukad. Ngem kasanot’ kasaknapna a talaga a mapabasol ti natauan a kababalin kadagiti napeggad a pagannayasan itatta iti kinaranggas, terorismo, panaglako ti droga, ken ti umas-asping kadagita?
Ti kadi kababalin laeng ti tao ti mapabasol kadagiti kasasaad a mangipangpangta a “mangpakapuy iti intero a sibilisasion”? Wenno addada kadi dadduma pay a banag a rebbeng nga ikuentatayo a mangilawlawag no apay a dagiti tattao nakalaklakada nga agtinnag kadagiti makaipababa, naagum nga ar-aramid idinto ta mabalinda koma ti mangtarigagay ti nangatngato, natantan-ok a raragpaten? Kitaentayo.