No Apay Agusarda Kadagiti Relikia iti Panagdayaw
NAPLES, Italia. Panunotenyo nga addakayo sadiay kadagidi immuna a tawtawen ti maika-18 a siglo iti Kadawyan a Panawentayo. Idiay simbaanna, ni taga Ireland a pilosopo a George Berkeley agtaktakder iti sango ti maysa a nalatak a relihiuso a relikia. Matmatmatanna buyogen panagduadua ti naminar a pannakalunag ti dara ni “San Gennaro,” ti Katoliko a “santo” a ni Januarius.
Nagbaliw bassiten ti Naples iti daytoy a banag. Kas pangarigan, naminsan agpapan pay dakes a panniempona kadagiti kallabes a tawen, napuspusek manen ti simbaan kadagiti tao, ket maysa a naminar a milagro ti napasamak. Ti relikia ken maysa a panaglibot nga indauluan ti arsobispo a kardinal ket nakablaawan ti nabara a panagpalakpak. Wen, maysa manen daytoy kadagiti adun a daras a ti dara ni “San Gennaro” kasla malunag. Dagiti milagro a manginaig iti daytoy a relihiuso a relikia ti maipadpadamag a mapaspasamak sipud pay maika-14 siglo.
Sigun iti Katoliko a sursuro, ti maysa a relikia (manipud iti Latin a relinquere, kaipapananna “ibati”) ket maysa a banag nga imbati ti maysa a tao a maibilbilang a santo. Kas ipabatad ti Dizionario Ecclesiastico, dagiti relikia ket “adda iti nainget a masinunuo a kaipapanan kas, ti bagi wenno paset ti bagi ken dagiti dapo ti Santo, iti nalawlawa a pannakaawat ti banag a naisagid iti bagi ti santo ket maikari ngarud dayta iti debosion.”
Panangkanunong dagiti Papa
Nalablabit, adut’ mangipaay ti pammadayaw kadagiti relihiuso a relikia gapu kadagiti nabatad a milagro a naitimpuyog kadakuada. Ti panangkanunong dagiti papa ket agparang a sabali pay a makagapu iti kinalatakda.
Di kumurang ngem uppat a papa iti napalabas a 70 a tawen ti nangipaay ti naisangsangayan a panangasikaso kadagiti relikia. Ipanayag ti maysa a pagiwarnakan a Katoliko a kas ken sinandianna a Pio XI, ni Papa Pio XII “tinaginayonna ti relikia ti santa ti Lisieux iti kinataona.” Ni Paolo VI “tinaginayonna ti ramay ni apostol [Tomas] iti lamisaan idiay silid a pagadalanna,” ket ni Juan Paolo II “iduldulinna, iti bukodna a pagtaengan, dagiti paset ti . . . dapdapo ni “San Benedicto” ken “San Andres.” —30 giorni, Marso 1990, panid 50.
Gapu iti kasta a panangkanunong dagiti papa, saan a nakaskasdaaw a dumakdakkel ti pakasapulan kadagiti relikia agpada para iti pribado ken publiko a debosion. Ngem ti kadi debosion kadagiti relikia ay-aywenna ti Dios?
[Ladawan iti panid 3]
Pagikabilan kadagiti relikia, pagkargaan a nakaidulinan dagiti relihiuso a relikia
[Credit Line]
Impaay ti The British Museum