Nagpakumbabaak ket Nasarakak ti Kinaragsak

IDI 1970, agtawenak iti 23 ken ambisiosa. Iti asosasion ti lugan a nagtrabahuak idiay Ivrea, Italia, siak ti nagbalin a kangrunaan nga eskribiente. Determinadoak nga agbalin a maysa a nalatak a tao. Ngem napalalo ti liday ken sennaayko. Apay?

Binusbos ti asawak ti kaaduan a tiempona kadagiti pagiinuman a nakiayay-ayam iti baraha kadagiti gagayyemna, ket binaybay-annak a nangibaklay kadagiti kaaduan a pagrebbengan iti pamilia. Nangrugin a madadael ti relasionmi. Agsinnungbatkami no kua gapu laeng kadagiti babassit a banag. Kas banagna, nagdadalusonen dagiti negatibo a panunot iti isipko.

‘Awan ti pudno a maseknan kenka,’ kunkunak. ‘Kayatda laeng a gundawayan ti saadmo.’ Kunkunak iti bagik: ‘Awan ti Dios ngamin no adda, dina koma ipalubos ti nakaro a panagsagaba ken kinadakes. Ti biag ket maysa laeng a lumba nga agturong ken patay.’ Diak maawatan no apay a kasta.

Pangrugian ti Panagbalbaliw

Maysa nga aldaw idi 1977, nagtuktok ti dua a Saksi ni Jehova iti ruanganmi. Pinastrek ida ni lakayko, ni Giancarlo, ket napanda iti salas tapno agsaritada. Gandatna a pagbalinen ida nga ebolusionista a kas kenkuana, ngem isuda ti nangbalbaliw iti panagpampanunotna!

Di nagbayag nangaramid metten ni Giancarlo kadagiti panagbalbaliw iti biagna. Immanusen, ken ad-adun a panawen ken atension ti impaayna kaniak ken iti balasangmi. Pinadpadasna ti nakisarita kaniak maipapan kadagiti maad-adalna, ngem isardengko no kua ti saritaan buyogen nagubsang a kumento.

Kalpasanna maysa nga aldaw simmarungkar dagiti Saksi, nagtugawak, ken talaga a dimngegak. Nagsaoda maipapan iti panungpalan daytoy sistema dagiti banag ken maipapan iti Pagarian ti Dios, Paraiso a daga, ken ti panagungar dagiti natay. Napamulenglengak! Diak naturog iti sumaganad a tallo a rabii! Tinarigagayak ti makasursuro iti ad-adu pay, ngem ti kinatangsit linapdannak nga agimtuod iti asawak. Kalpasanna maysa nga aldaw nainget a kunana kaniak: “Ita dumngegka. Sungbatak amin a saludsodmo.” Ket indissuorna kaniak dagiti kinapudno ti Biblia.

Kinuna kaniak ni Giancarlo a Jehova ti nagan ti Namarsua, a ti kangrunaan a galadna ket ayat, nga imbaonna ti Anakna kas maysa a subbot tapno maaddaantayo iti biag nga agnanayon, ken kalpasan ti pannakadadael dagiti nadangkes iti Armagedon, pagungarento ni Jesu-Kristo dagiti natay bayat ti Sangaribo a Tawen a Panagturayna. Kinunana nga agin-inutto nga agbalin a perpekto dagiti napagungar iti mental ken pisikal ken maaddaandanto iti gundaway nga agbiag nga agnanayon iti Paraiso ditoy daga.

Iti sumaganad nga aldaw, kinuyogko ni lakayko idiay Kingdom Hall iti kaunaan a gundaway. Kalpasanna kunak kenkuana: “Dagitoy a tao agayan-ayatda iti maysa ken maysa. Kayatko nga itultuloy ti umay ditoy gapu ta talaga a naragsakda.” Rinugiak ti timmabuno a regular kadagiti gimong, ken nakipagadalak iti Biblia. Inut-utobko dagiti maad-adalko ket di nagbayag nakumbinsirak a nasarakakon ti pudno nga ili ti Dios. Idi 1979 siak ken ni lakayko ti nangisimbolo ti dedikasionmi ken Jehova babaen ti panagpabautisar.

Ti Amin-Tiempo a Ministerio

Iti maysa nga asamblea sirkito iti naladaw a paset dayta a tawen, naipaay ti maysa a diskurso a mangiparparegta iti amin-tiempo a trabaho a panangasaba. Natignayak a makiraman iti dayta a serbisio, ket inkararagko ken Jehova dayta a banag. Ngem nagsikogak, ket naitantan dagiti planok. Iti las-ud ti uppat a tawen, naaddaankami iti tallo nga annak. Dua kadakuada, iti nagduma a gundaway, ti naaddaan kadagiti mamagpeggad-biag a pisikal a depekto. Agyamankami ta naimbaganda met laeng.

Ita nariknak a diak maitantanen dagiti planok iti amin-tiempo a ministerio. Immikkatak iti sekular a trabahok tapno maipamaysak a nasaysayaat dagiti pagrebbengak kas maysa nga asawa ken ina. Implanomi ken ni lakayko ti agbiag iti maysa laeng a sueldo, a kaipapanannat’ panangibbat kadagiti di nasken a banag. Kaskasdi, sibabaknang a binendisionannakami ni Jehova, a dinakam pulos binaybay-an nga agpanglaw wenno agkurang.

Idi 1984 ti balasangko, nga agedad idin iti 15 ken nabiit pay a nabautisaran, inrugina ti amin-tiempo a ministerio kas maysa a payunir. Maigiddato iti dayta, nadutokan ni lakayko kas maysa a panglakayen. Ket siak? Gapu ta mariknak a diak pay mabalinan ti agpayunir, inkeddengko a gaw-aten ti kalat a 30 nga oras iti makabulan iti trabaho a panangasaba. Nagaw-atko dayta ket kunak iti bagik: ‘Nasayaat ti inaramidmo! Adut’ magapgapuanam.’

Nupay kasta, naminsan pay a nagbalin a parikutko ti kinatangsit. (Proverbio 16:18) Pinampanunotko a nagsayaat dagiti gapuanak ket diak kasapulanen ti rumang-ay pay iti naespirituan. Nangrugi a kimmapuy ti espiritualidadko, ken mapukpukawko payen dagiti naimbag a galad a nagun-odko. Ket naawatko ti disiplina a kinasapulak.

Idi 1985 sinangailimi ti dua nga agdaldaliasat a manangaywan agraman dagiti asawada bayat ti panagbisitada iti kongregasionmi. Ti panangpaliiw kadagitoy a napakumbaba, managsakripisio a Kristiano ti pudno a nangtignay kaniak a mangmennamenna kadagiti bambanag. Sinukimatko ti tema maipapan iti kinapakumbaba nga inusarko dagiti publikasion ti Watch Tower Society. Inut-utobko ti naindaklan a kinapakumbaba nga ipakpakita ni Jehova iti pannakilangenna kadatayo a managbasol a tao. (Salmo 18:35) Ammok a masapul a balbaliwak ti panagpampanunotko.

Nagpakpakaasiak ken Jehova a tulongannak koma a mangsukay iti kinapakumbaba tapno makapagserbiak kenkuana iti pamay-an nga anamonganna ken tapno iwanwannak iti panangusarko kadagiti saguday nga ik-ikutak maipaay iti dayawna. Sinuratak ti aplikasion para iti serbisio kas payunir, ket rinugiak ti agserbi kenkuana iti amin-tiempo a ministerio idi Marso 1989.

Makunak itan a pudno a naragsakak ket ti panagpakumbabak ti nangyeg ti kinaragsakko. Nasarakak ti napaypayso a pamkuatan nga agbiag​—ti panangtulong kadagiti makasapul a mangammo a ni Jehova, ti pudno a Dios, ket saan nga adayo kadagidiay mangsapsapul kenkuana.​—Kas insalaysay ni Vera Brandolini.