Dagiti Patarus ti Biblia iti Africa

Dagiti kaunaan a patarus ti intero a Biblia iti pagsasao ti Africa ket naaramid idiay Egipto. Pagaammo kas dagiti patarus a Coptic, mapapati a napetsaanda manipud idi maikatlo wenno maikapat a siglo K.P. Agarup tallo a siglo kamaudiananna, ti Biblia ket naipatarus iti Ethiopic.

Dagiti ginasut a di naisurat a lenguahe a naaramat idiay abagatan ti Ethiopia ken ti Sahara ti naguray ti isasangpet dagiti misionero idi maika-19 a siglo. Idi 1857 dimteng ti maysa a napateg a pasamak idi a nairingpas ni Robert Moffat ti maysa a patarus ti Biblia iti Tswana, maysa a lenguahe ti makin-abagatan nga Africa. Inmalditna pay dayta a binennebenneg iti handpress. Daytoy ti immuna a kompleto a Biblia a naimaldit idiay Africa ken kasta met ti immuna a kompleto a patarus iti dati a di naisurat a lenguahe ti Africa. Makapainteres ta inusar ni Moffat ti nadibinuan a nagan a Yehova iti patarusna. Iti 1872 a patarus nga impablaak ti British and Foreign Bible Society, ti nagan a Yehova ket nausar kadagiti napateg a sasao ni Jesus a nairekord idiay Mateo 4:10 ken Marcos 12:29, 30.

Idi 1990 naipatarusen ti intero a Biblia iti 119 a lenguahe ti Africa, a dagiti dadduma a pasetna ti magun-odanen iti kanayonan a 434.