Mabalin Kadi nga Adda Kaipapanan Kadakayo Daytoy a Pangrabii?
NALAWAG ti aglawlaw agsipud ta kabus. Iti akingngato a kuarto ti maysa a balay idiay kadaanan a Jerusalem, nakasango ti 12 a lallaki iti panganan. Kasta unay ti panangimutektek dagiti 11 bayat ti panangiyusuat ti Mannursuroda iti nagpateg a pasken ken panangisaona kadagiti agkakapateg a balikas. Kinuna ti maysa a salaysay:
“Ni Jesus [Kristo] nangala iti maysa a tinapay ket, kalpasan a binendisionanna, pinisina, ket intedna kadagiti adalanna, ket kinunana: ‘Alaenyo, kanenyo. Daytoy kaipapananna ti bagik.’ Nangala met iti kopa ket, kalpasan a nagyaman, intedna kadakuada, a kunkunana: ‘Uminumkayo amin iti daytoy; ta daytoy kaipapananna ti “dara[k] iti tulag,” isu a maibuyat gapu kadagiti adu a maipaay iti pannakapakawan dagiti basol. Ngem kunak kadakayo, a manipud ita diakto uminumen itoy bunga ti ubas agingga iti aldaw a pannakiinumko kadakayo iti baro idiay pagarian ni Amak.’ Kamaudiananna, kalpasan ti panagkantada iti panangidaydayaw, rimmuarda nga agturong idiay Bantay ti Olivo.”—Mateo 26:26-30.
Naangay daytoy kalpasan ti ilelennek ti init iti maika-14 nga aldaw ti bulan dagiti Judio a Nisan idi tawen 33 iti Kadawyan a Panawentayo. Kalkalpas a rinambakan da Jesus ken dagiti apostolna ti Paskua a kas panglaglagip iti pannakaispal ti Israel iti pannakaadipen idiay Egipto idi maika-16 a siglo K.K.P. Pinapanaw ni Kristo ni Judas Iscariote, a mangliputto kenkuana. Gapuna, ni Jesus ken dagiti 11 a nasungdo nga apostolna laeng ti presente.
Saan a tuloy ti Paskua dagiti Judio daytoy a pangrabii. Naisangsangayan daytoy a naawagan iti Pangrabii ti Apo. Maipapan itoy a pasken, binilin ni Jesus dagiti pasurotna: “Itultuloyyo nga aramiden daytoy a panglaglagip kaniak.” (Lucas 22:19, 20; 1 Corinto 11:24-26) Apay nga imbagana daytoy? Ken kasano a maaddaan iti kaipapanan kadakayo daytoy a pasken a sinigsiglon ti kaundayna?