Report Dagiti Manangiwaragawag Ti Pagarian
Naammuan ti Maysa nga Agtutubo a Managrayo iti Tren ti Kinapudno
NO AGDUYOS ti puso ti maysa a tao iti kinalinteg, ngarud ni Jehova a Dios, iti panangaramatna ken Kristo Jesus ken dagiti nailangitan nga anghel, siguraduenna a ti kasta a marakarnero a tao ket maammuanna ti naimbag a damag ti Pagarian kas banagna. Mabalin a maitipon dayta a tao iti makannawan a dasig ni Jesus a naanamongan iti naikeddeng a tiempo. (Mateo 25:31-33) Pudno daytoy iti maysa nga agtutubo a taga-Austria a kaay-ayona ti aglugan iti tren. Naidumduma a wagas ti pannakaammona iti kinapudno.
Ti kararagsakan unay a paset ti pagay-ayat nga aramiden daytoy agtutubo a lalaki isu ti panaglugan iti sango ti tren, iti pammalubos ti administrasion ti tren. Inrekordna ti tunggal biahena iti video kamerana tapno mabuyananto manen dayta idiay balayda. Iti panagbiahena manipud Vienna nga agturong idiay Salzburg, ti makinista iti tren ket maysa kadagiti Saksi ni Jehova. No adda iti tren, gundawayanna no kua nga isarsarita iti nasao nga agtutubo ti maipapan iti Pagarian. Nasdaaw idi damo ti agtutubo a lalaki a makangngeg iti ibagbaga ti makinista maipapan iti Dios ken ti Biblia, ngem kabayatan ti biahe, impangrunana dagiti mabuya imbes a ti ibagbaga ti makinista kenkuana.
Idi nakaawid manen, binuya daytoy nga agtutubo ti nairekord iti videona, saan laeng a naminsan no di ket naminsangapulo a daras, gapu ta nagustuanna unay daytoy a biahe. Yantangay inrekordna met ti uni, namin-ano a nangngegna ti imbaga ti Saksi kenkuana. Bayat ti panangulit-ulitna a panangbuya iti video, ad-adda a nakabesadona ti naibaga kenkuana. Pinampanunotna a naimbag dayta, ket kamaudiananna naay-ayo iti makaparagsak nga impormasion manipud Biblia. Kayatna a maammuan ti ad-adu pay.
Nalagipna ti nagan ti makinista ken ammona nga agnanaed iti paset ti Vienna. Gapuna, napan idiay post office ket rinugianna ti ag-dial ti adu a numero iti telepono a nailista iti babaen dayta a nagan idiay direktorio. Kastoy ti saludsodna kadagidiay simmungbat iti telepono: “Maysaka kadi a makinista iti tren?” No saan ti sungbat, ag-dial manen iti sabali a numero. Kamaudiananna, nasarakanna met laeng ti makinista. Insalaysayna kenkuana ti pakasaritaanna ket imbagana nga interesado iti mensahe ti Biblia a nangngeganna iti video.
Kiniddaw ti Saksi iti sanga nga opisina a mangibaonda iti maysa a kabsat nga agnanaed iti asideg ti pagtaengan ti agtutubo a lalaki a sumarungkar kenkuana. Nairana nga adda maysa a Saksi a makinista met laeng iti tren iti lokal a kongregasion. Sinarungkaran daytoy maikadua a makinista ti managrayo iti tren, ket narugian ti panagadal iti Biblia. Idi kalgaw ti 1991, nabautisaran ti agkabanuag a lalaki.
Ni Jehova, a mangsuksukimat ti amin a puso, nakitana la ketdi nga adda nasged a panagayat iti kinalinteg daytoy a tao. Iti kasta, inturongna iti kinapudno iti Biblia—nupay iti naidumduma a wagas.—1 Cronicas 28:9; Juan 10:27.
[Picture Credit Line iti panid 9]
Iti pammalubos ti Austrian Railways