Report Dagiti Manangiwaragawag ti Pagarian
Ti Sao ti Dios Adda Bilegna
“TI SAO ti Dios nabiag ken adda bilegna.” (Hebreo 4:12) Napaneknekan a pudno dagitoy a sasao iti adun a daras no dagiti tao a maal-allilaw iti ulbod a relihion ket maipasangoda kadagiti kinapudno ti Biblia. Kas ipakita ti sumaganad a kapadasan manipud iti Dominican Republic, ti bileg ti Biblia mabalbaliwanna ti biag dagiti tattao ken mangipaay daytoy iti namnama.
Sinarungkaran dagiti Saksi ni Jehova ti maysa a prominente a babai a Katoliko a nabiit pay a nagminatay iti dua a babassit nga annakna. Kasta unay ti ladingitna ken inaldaw a sinangsangitanna ti nasaem a napagteng kenkuana. Impakita dagiti Saksi kenkuana no ania ti kunaen ti Biblia iti Juan 5:28, 29 maipapan iti namnama iti panagungar. Kalpasan ti kanayonan a pannakisarsaritana kadagiti Saksi, saan laeng a naliwliwa iti namnama iti panagungar no di pay ket nabigbigna nga isut’ al-allilawen dagiti relihiuso a papangulo a Katoliko.
Pulos a saan a nagtantan a naglusulos iti Iglesia Katolika, ket inawatna ti maysa a regular a pannakipagadal ti Biblia kadagiti Saksi ni Jehova. Nupay kasta, saan nga immanamong ni lakayna kadagiti panangmatmatna. Yantangay maysa met [ni lakayna] a prominente unay a Katoliko, inyurnosna a ni baketna ket sarungkaran dagiti nalatak a politiko ken relihiuso a gagayyem tapno padasenda a pagbaw-ingen iti nasurotna a daná ken isublida iti Katolisismo. Kalpasanna impangta ti lalaki a makidiborsio, a naminsan impakaammona pay ketdi kadagiti kakabagianna ken kadagiti kapammatianna nga agdiborsiodan.
Ngem napaay dagiti pamay-anna. Iti kasunganina, ad-adda ketdi a nagbalin a determinado ti babai a mangitultuloy iti panagadalna iti Biblia. Gapu iti panagrang-ayna iti naespirituan ken panangpatanorna kadagiti nasudi a Nakristianuan a kababalin, inkeddeng ni lakayna ti agtalinaed kenkuana imbes a makidiborsio. Maysa nga aldaw immanamong pay ketdi a mangsukimat kadagiti literatura ti Biblia nga ad-adalen ni baketna—ngem iti maysa a kondision. Kayatna nga usaren ti bukodna a bersion ti Biblia a Katoliko.
Iti siddaawna, babaen ti tulong dagiti literatura manipud kadagiti Saksi ni Jehova, adu a baro a banag ti naammuanna iti mismo a Bibliana. Nabigbigna nga umiso ti daná a napili ni baketna, ket di nagbayag sisasagana metten a mangsurot iti ulidanna. Kinapudnona, naamirisna a rumbeng a balbaliwanna ti kabibiagna. Ti maysa a narikut a karit isut’ panangisardengna iti bisiona nga agsigarilio. Kalpasan a mabasana ti Hulio 8, 1989, a ruar ti magasin nga Agriingkayo! nga addaan paulo iti akkub a “Mailaklako ni Patay—Sangapulo a Pamay-an ti Saanen a Panagsigarilio,” determinadon a mangisardeng iti daytoy di Nainkasuratan a bisio. Kas sandi ti nakayugalianna a sangapakete a sigarilio a masansan nga adda iti bulsana, rinugianna nga itugot dayta a ruar ti Agriingkayo! Tunggal mariknana ti panagtarigagay nga agsigarilio, basaenna dagiti artikulo maipapan iti panagsigarilio. Nagkurri daytoy a pamay-an! Kalpasan a mabasana dagiti artikulo iti adu a daras, nabaelanna nga insardeng ti nagsigarilio.
Itatta, agserserbi ti agassawa ken Jehova kas bautisado a ministro. No ipalubos dagiti kasasaad, agserserbi ti lalaki kas maysa nga amin-tiempo a ministro, a busbusbosenna ti kaaduan a tiempona iti panangikaskasaba iti naimbag a damag ti Pagarian ti Dios, ken agserserbi kas maysa a ministerial nga adipen iti lokal a kongregasion dagiti Saksi ni Jehova. Mangnamnamada nga agassawa iti panagungar inton sabtenda dagiti annakda a mapagungar iti maysa a baro a lubong. Wen, ti Sao ti Dios, ti Biblia, ket nabiag ken adda bilegna!