Dagiti Saludsod Manipud Kadagiti Managbasa
Umiso kadi ti agpabakuna wenno agpaitudok iti agas a naglaon iti ‘albumin’ manipud iti dara ti tao?
Iti kinapudnona, ti tunggal Kristiano ti personal a mangikeddeng iti daytoy.
Siuumiso la unay a tarigagayan dagiti adipen ti Dios a suroten ti bilin a masarakan iti Aramid 15:28, 29, nga umadayo iti dara. Ngarud, saan nga agsida dagiti Kristiano iti karne a di napadara wenno dagiti produkto kas ti longanisa nga addaan dara. Ngem agaplikar met ti linteg ti Dios iti tay-ak ti medisina. Itugtugot dagiti Saksi ni Jehova ti maysa a dokumento a mangibagbaga a laksidenda ‘dagiti panangyalison ti dara, interamente a dara, nalabaga a selula, puraw a selula, platelet, wenno plasma ti dara.’ Ngem, ti ngay maipapan iti panangitudok iti serum a naglaon iti sangkabassit a protina ti dara?
Nabayagen nga ammo dagiti Saksi a daytoy a banag ket maysa a personal a pangngeddeng ti maysa a maitunos iti konsiensia a nasanay iti Biblia. Nailawlawag daytoy iti “Dagiti Saludsod Manipud Kadagiti Managbasa” iti Pagwanawanan a Hunio 1, 1990, a nangsalaysay iti panagitudok iti serum a mabalin nga irekomenda ti maysa a mangngagas no nakaptan ti maysa iti sumagmamano a kita ti sakit. Dagiti aktibo a sangkap ti kakasta nga ineksion ket saan a ti plasma ti dara a mismo, no di ket antibodies manipud iti plasma ti dara dagidiay natibker ti resistansiada. Napaliiw dagiti dadduma a Kristiano a makarikna buyogen ti nadalus a konsiensia a mabalinda nga awaten ti kakasta nga ineksion a dagiti antibody manipud iti dara ti maysa a babai a masikog ket umallatiw iti dara ti sikog iti aanakanna. Dinakamat daytoy ti “Dagiti Saludsod Manipud Kadagiti Managbasa,” kasta met ti kinapudno a ti sumagmamano nga albumin ket lumasat iti maysa a babai a masikog nga agturong iti sikogna.
Adu ti nakadlaw iti daytoy, yantangay dagiti dadduma a bakuna a saan a naggapu iti dara ket mabalin a naglaon iti sangkabassit a plasma ti albumin a nausar wenno nainayon tapno mapagtalinaed dagiti ramen iti pannakaisagana dagitoy. Itatta maus-usar met ti sangkabassit nga albumin kadagiti panangitudok iti sintetiko a hormone nga EPO (erythropoietin). Agpapaitudok dagiti dadduma a Saksi iti EPO gapu ta papardasen daytoy ti produksion ti nalabaga a selula ti dara ket iti kasta mawayawayaan ti maysa a mangngagas iti pannakarikna a mabalin a kasapulan ti panangyalison iti dara.
Mabalin a maaramat iti masanguanan dagiti dadduma pay nga agas a naglaon iti sangkabassit nga albumin, tangay agpatpataud dagiti kompania ti agas kadagiti baro a produkto wenno balbaliwanda ti pormula dagiti maar-aramaten. No kasta, mabalin a kayat dagiti Kristiano nga usigen no ti albumin ket paset ti maysa a bakuna wenno dadduma pay nga ineksion nga irekrekomendar ti doktor. No agduadua wenno adda rasonda a mamati a ti albumin ket maysa a sangkap, mabalinda ti agimtuod iti mangngagasda.
Kas nadakamaten, adu a Saksi ti saan nga agkedked nga agpaitudok [iti agas] a naglaon iti sangkabassit nga albumin. Kaskasdi, rumbeng a repasuen ti siasinoman nga agtarigagay a mangadal a naimbag iti daytoy a banag sakbay a mangaramid iti personal a pangngeddeng ti impormasion a naidatag iti “Dagiti Saludsod Manipud Kadagiti Managbasa” iti Pagwanawanan a Hunio 1, 1990.