Dagiti Saksi ni Jehova iti Aglikmut ti Lubong​—Polandia

IDI otonio ti 1989, nangrugi a marpuog dagiti Komunista a gobierno iti Baltic agingga iti Black Sea. Bayat a masinasina ti maaw-awagan a Kurtina a Landok, nangrugi nga agtignay dagiti nasion idiay Makindaya nga Europa nga agturong iti panagwaywayasda. Karaman kadagitoy ti Polandia, maysa a pagilian a katurturodan, katantanapan, ken kabambantayan.a

Nagaget a tattao dagiti Polako, ket ti Polandia ti nagtaudan ti sumagmamano kadagiti nalatak a pintor ken sientista iti lubong. Nupay kasta, malaksid iti dayta, adda itan ti dumakdakkel a buyot dagiti manangiwaragawag iti naimbag a damag ti Pagarian ti Dios.

Natured iti Panangibutaktak iti Kinaulbod

Idiay Polandia, adu dagiti agtarigagay a makasursuro iti kinapudno manipud Biblia. Ngem dagiti dadduma ket up-upayen ti kakabagian wenno kaarrubada. Kas pagarigan, iti kabangibang ti Wrocław, nagsardeng ti maysa nga interesado a babai a makipagadal ti Biblia kadagiti Saksi ni Jehova idi a binusor ti pamilia ken dagiti gagayyemna. Nupay kasta, nabasa ti agtutubo nga anakna a babai ti serye dagiti artikulo ti Pagwanawanan a mangibutbutaktak iti ulbod a relihion. Dagitoy ti nangtukay iti interesna iti kinapudno.

Kalpasan ti innem a bulan a panagadalna iti Biblia, inkeddeng daytoy nga agtutubo a gupden ti amin a pannakainaigna iti ulbod a relihion. Sinarungkaranna ti klero ti iglesia a nakaikamenganna tapno ipakaammona kenkuana ti pangngeddengna. Imbagana kenkuana nga isuratna ti sumaganad: “Siak, ni K​—​— P​—​—, laksidekon ti pammati a Katoliko.”

Iti sumaruno a Domingo, naibasa daytoy a surat idiay simbaan. Natalimudaw ni apongna a lakay, ket nagsangsangit ni apongna a baket. Nupay kasta, isut’ rinaem dagiti dadduma a parokiano ket kinunada: “Kamaudiananna, adda met laeng nakaitured a nangibaga nga adu ti kinaulbod iti iglesiatayo.” Daytoy natured nga agtutubo ket maysa itan a bautisado a kabsat iti naespirituan ken nakairugi iti pito a panagadal iti Biblia iti purokda.

‘Babaen Kadagiti Bungada’

Impablaak ti linawas a Kujawy i Pomorze ti damag a “Mailasinyonto Ida Babaen Kadagiti Bungada.” Iti pasetna, kinuna ti artikulo a dagiti managdaydayaw iti Kakristianuan “iti kinaagpaysona, saanda a sipapasnek nga an-annuroten dagiti narelihiusuan a pagalagadan nga inawatda. Dakkel ti nakaidumaanda kadagiti Saksi ni Jehova a mangar-aramid iti ikaskasabada, ken mangibagbaga iti ibilbilin ti Biblia.”

Kalpasan ti panangidiligna iti langa dagiti Saksi kadagiti maaw-awagan a Kristiano iti nagan laeng, intuloy ti report: “Ti naud-udi nalabit a dida ammo, ken masansan a dida ipakpakat, dagiti napapateg a kinapudno ken pagalagadan ti pammatida. . . . Babaen ti kababalinda, iparparangarang dagiti Saksi ni Jehova ti panagtunos dagiti sasao ken ar-aramidda, iti kasta mangipampaneknek a saan nga isuda ti ‘ulbod a mammadto,’ imbes ketdi, mailasinda babaen kadagiti bungada. ‘Saan aya a di pulos agburas dagiti tattao kadagiti ubas manipud kadagiti sisiitan wenno kadagiti higos manipud kadagiti kalunay?’ (Mateo 7:15-20).”

Maysa a babai ti nagsurat iti linawas a Przyjaciółka, nga inyebkasna ti panagladingitna agsipud ta pinanawanen ti anakna a lalaki ti Iglesia Katolika ket nagbalin a maysa kadagiti Saksi ni Jehova. Aniat’ imbalakad ti editor? “No makitimtimpuyog ti anakyo kadagiti Saksi ni Jehova, nasursuro ken inawatna ti pammatida, bukodna a pangngeddeng dayta, a masapul a bigbigen ken raemen. . . . Pagaammo daytoy a relihiuso a grupo gapu iti adu a napintas ken makaay-ayo a kababalin iti kagimongan, kas iti naisangsangayan a panagtutunos ken nadekket a panagpipinnategda, kinamapagtalkan ken nasinged a panangsurot kadagiti paglintegan iti kagimongan, ken kamaudiananna, panagbiag a maitunos iti kinapudno nga adda kadakuada, nga an-annurotenda dagiti prinsipioda. Napateg dagitoy a kababalin.”

[Footnote]

[Kahon iti panid 9]

KASASAAD TI PAGILIAN

1993 Tawen Serbisio

KANGATUAN A BILANG TI MANGASKASABA: 113,551

RATIO: 1 a Saksi iti 339

TIMMABUNO ITI MEMORIAL: 235,642

PROMEDIO A BILANG DAGITI AGIBUMBUNANNAG A PAYUNIR: 7,961

PROMEDIO A BILANG DAGITI PANAGADAL ITI BIBLIA: 79,131

BILANG TI NABAUTISARAN: 8,164

BILANG DAGITI KONGREGASION: 1,397

SANGA NGA OPISINA: Nadarzyn

[Ladawan iti panid 9]

Sanga nga opisina ti Polandia idiay Lodz idi 1948

[Ladawan iti panid 9]

Panangpaneknek babaen kadagiti plakard, Hunio 1948, idiay sigud a Makindaya a Prussia

[Ladawan iti panid 9]

Pitopulo ket dua a kameng ti Bethel idiay Polandia, Enero 1993

[Ladawan iti panid 9]

Ti baro a sanga idiay Nadarzyn