Dagiti Saksi ni Jehova iti Aglikmut ti Lubong—Zambia
AKABA, agallo-allon a katantanapan iti tapaw ti maysa a nalawa, 1,200 metro kangatona a patag a bantay—daytoy ti Zambia, maysa a pagilian iti tengnga ti makin-abagatan nga Africa. Iti amianan a daya, ag-2,100 metro ti kangato ti Muchinga Mountains. Ti nabileg a Zambezi River, a singangayed a dumaranudor nga agay-ayus iti Victoria Falls a nalatak iti lubong, ti mangbukel iti kaaduan a paset ti makin-abagatan a beddeng daytoy a pagilian a nalikmut iti dagdaga. Nadumaduma dagiti tattao, a buklen ti nasurok a 70 a nagduduma nga etniko a grupo. Walo a kangrunaan a pagsasao ti maar-aramat ditoy, ngem adda adu pay a sabsabali.
Idi 1911 maysa a naidumduma a pagsasao ti naipasdek ken nagsaknap idiay Zambia. Nangitugot dagiti sangaili kadagiti kopia ti Studies in the Scriptures, ket manipud idin inkagumaan dagiti Saksi ni Jehova nga isaknap ti “nadalus a pagsasao” ti kinapudno iti Biblia idiay Zambia. (Sofonias 3:9) Ti kangrunaan a karit isu dagiti di nainkasuratan a pammati maipapan iti kasasaad dagiti natay. No maammuan dagiti tattao ti kinapudno ken makitada no kasano nga inadipen ida dagiti an-anito, pannakawayawaya ti epektona!—Juan 8:32.
Kas pagarigan, ipadamag ti maysa a matalek a sister: “Idi natay a di napakpakadaan ni ulitegko, nariribukan ni nanangko, a maysa a napinget a kameng ti United Church of Zambia. Kalpasan ti makalawas a ritual iti panagipumpon, nagsubliak iti purok tapno ammuen no ania ti kasasaadna. Apagsangpetko, adda maysa a lakay iti balay, ket idi nakapanaw, sinaludsodko ken ni lelangko no siasino daydiay. Kinunana nga isut’ maysa a manggagamud. Panggep ni nanang a tangdanan daytoy a mangibales iti ipapatay ti kabsatna tapno makapaginana ti kararuana. Mamati nga ‘agkalkallautang laeng’ [ti kararua ni kabsatna] kas kinunana.
“Kinuna pay ni lelang nga apag-isu ti isasangpetko gapu ta agkasapulan ti pamilia iti kuarta a pangbayad iti manggagamud. Indawatna nga agkontribusionak, ngem sitataktika nga inlawlawagko a kas maysa a Kristiano, diak mabalin ti makiraman. Nakirinnasonak kenkuana manipud Salmo 146:4, a mangipakpakita nga awanen ti panunot dagiti natay—isu nga awan ti kararua nga ‘agkalkallautang.’ Inusigmi met ti Roma 12:19, nga agkuna a ni Jehova ti agibales ket saan a datayo. Kalpasanna, imbagak ken ni nanangko ti maipapan iti namnama a panagungar a dinakamat ni Jesus, kas nailanad iti Juan 5:28, 29. Naawis iti natibker a pammatik kadagiti kari ti Dios. Di nagbayag rinugianna ti nakipagadal iti maysa a Saksi ken napardas a rimmang-ay. Ginupedna ti amin a pannakainaig iti sigud a relihionna ken insimbolona ti dedikasionna iti Dios babaen ti bautismo. Maysa itan kadagiti Saksi ni Jehova.”
Maysa pay a sister ti mangipadamag: “Timmabunoak iti pumpon ti asawa ni ulitegko. Idi sumangpetak, nakitak a mabisbisin ti ulitegko ken ti kasinsinko. Pulos a saanda a nangan iti aniaman manipud idi natay ni ikitko. Idi sinaludsodko no apay, kinunada a sigun iti tradision, saanda a mapalubosan nga agpasged tapno agluto. Intukonko a siak ti agluto, ngem amken ti dadduma a kameng ti pamilia a no salungasingek daytoy a pinapagano a kaugalian, agmauyong la ketdi ti amin!
“Inlawlawagko a kas maysa kadagiti Saksi ni Jehova, raemek ti ibagbaga ti Biblia iti Levitico 18:30 ken saanak a sumursurot kadagiti di nainkasuratan a tradision. Kalpasanna, impakitak kadakuada ti broshur nga Espiritu Dagiti Natay. Timmanangda, ket rinugiakon ti agsagana iti taraon para ken ni ulitegko ken kadagiti dadduma pay a tattao. Natukay [ti rikna] dagiti kabagian ti natay gapu iti kinaturedko ket immanamongda nga agadal pay iti Biblia. Maysada itan a di bautisado nga agibumbunannag, ket mangnamnama ti sibubukel a pamilia a di agbayag agpabautisardanton.”
Anian a ragsaktayo no maparmek ti nadalus a pagsasao ti kinapudno ti panangtikaw dagiti narelihiusuan a kinaulbod, nangruna dagidiay nauneg-pannakairamutna a panagrasrason a mangad-adipen kadagiti inosente a tattao! Babaen ti pammendision ni Jehova, agsaksaknap ti nadalus a pagsasao idiay Zambia, kas met laeng iti maar-aramid iti intero a daga.—2 Corinto 10:4.
[Kahon iti panid 9]
KASASAAD TI PAGILIAN
1994 Tawen Serbisio
KANGATUAN A BILANG TI MANGASKASABA: 82,926
RATIO: 1 a Saksi iti 107
TIMMABUNO ITI MEMORIAL: 363,372
PROMEDIO A BILANG DAGITI AGIBUMBUNANNAG A PAYUNIR: 10,713
PROMEDIO A BILANG DAGITI PANAGADAL ITI BIBLIA: 108,948
BILANG TI NABAUTISARAN: 3,552
BILANG DAGITI KONGREGASION: 2,027
SANGA NGA OPISINA: LUSAKA
[Ladawan iti panid 9]
Dagiti pasilidad ti sanga ti Watch Tower iti deppaar ti Lusaka
[Ladawan iti panid 9]
Panangasaba idiay Shimabala, abagatan ti Lusaka