Dagiti Saksi ni Jehova iti Aglikmut ti Lubong—Brazil
TI Brazil ket maysa a dakkel a pagilian iti adu a pamay-an. Iti kadakkel ken populasionna, isut’ maikalima a kadaklan a pagilian iti lubong. Gistay saknapanna ti kagudua ti daga ti Sud America ken dakdakkel ti populasionna ngem iti isuamin a napagtitipon a sabsabali pay a pagilian iti dayta a kontinente. Addaan met ti Brazil iti kadaklan a rain forest. Agayus iti dayta a kabakiran ti kabibilgan a karayan iti lubong—ti Amazon.
Higante met ti Brazil iti sabali pay a kaipapanan. Ti bilang dagiti agibumbunannagna iti naimbag a damag ti Pagarian ti Dios ket umabuten iti 400,000, ken idi napan a tawen nasurok a 1,000,000 ti timmabuno iti Pananglaglagip iti ipapatay ni Kristo. Gapuna, nangnangruna a nalatak daytoy a pagilian no maipapan iti trabaho a panangikasaba iti Pagarian. Dagiti nabiit pay a kapadasan ti mangyilustrar iti daytoy a punto.
Panagserbi no Sadino ti Dakdakkel ti Pakasapulan
Nangaramid ni Antonio ken ti asawana iti narigat a pangngeddeng a mangpanaw kadagiti kabagianda ken ti natalged, nangato-ti-sueldona a pagtrabahuan idiay São Paulo tapno agserbi no sadino ti dakdakkel ti pakasapulan kadagiti manangiwaragawag iti Pagarian iti estado ti Minas Gerais. Ti teritoriada ramanenna ti maysa a lugar a pagnanaedan dagiti trabahador iti maysa a pagaramidan iti asukar. Iti immuna nga aldaw a panangasabada sadiay, nakairugida iti siam a panangyadal iti Biblia. Iti las-ud ti 18 a bulan, nangidadaulodan iti nasurok nga 40 a panangyadal [iti Biblia]!
Idi damo, naangay dagiti gimong idiay mismo a pagaramidan iti asukar. Nupay kasta, kayat dagiti kabbaro nga agibumbunannag ti makakita iti pudpudno a Kingdom Hall. Gapuna, naarkila ti maysa a bus a pagluganan ti 75 a tattao a mapan iti kaasitgan a kongregasion. Kalpasanna, naangay ti maysa a kombension; timmabuno ken napagsaludsodan ti 45 kadagiti baro nga estudiante ti Biblia. Sangapulo ket lima kadagitoy ti nabautisaran iti dayta nga okasion. Siempre, nagarubos a sibubulos dagiti lua ti ragsak!
Naaramat ti isu met laeng a kompania ti bus kadagiti umasping a panagbiahe, ket nangipaay dagiti opisial iti nababbaba a singir. Kas panangapresiar, indatag ni Antonio ti maysa a katulongan iti panagadal iti Biblia iti akinkukua iti kompania. Isut’ immanamong a makipagadal iti Biblia iti dayta met laeng a rabii ket nabautisaran kalpasan ti sumagmamano a bulan ti napinget a panagadal. Idi damo, bimmusor ni baketna iti panagadal, ngem idi agangay, limmukneng ti kababalinna. Itatta, isut’ bautisado metten a Saksi ni Jehova.
Idi Pebrero 1992, nabuangay ti maysa a kongregasion nga addaan iti 22 nga aktibo nga agibumbunannag. Idi 1994, ngimmato daytoy a bilang iti 42, nga addaan iti 4 a regular pioneer, wenno amin-tiempo a manangaskasaba iti naimbag a damag. Kas banagna, kinuna ni Antonio: “Nakitami ken ni baketko a no ‘padasentay ni Jehova,’ kas kunaen ti Malakias 3:10, ‘ibuyat[nanto] kadatayo ti bendision nga awanto ti lugar a makalaon.’”
Panagitukon iti Literatura ti Biblia
Nalabit a ti sabali pay a makagapu iti kasta unay nga irarang-ay ti trabaho a panangasaba idiay Brazil isut’ panagitukon dagiti Saksi iti literatura ti Biblia iti tunggal gundaway. Kas pagarigan, nagsurat ti maysa a kongregasion iti sanga nga opisina ti Watch Tower Society nga agkidkiddaw iti 250 a kopia ti libro a Dagiti Saludsod nga Iyimtuod ti Agtutubo—Dagiti Sungbat nga Epektibo. Apay a kastat’ kaadu ti pedido?
Inlawlawag ti surat: ‘Inkeddeng ti maysa kadagiti eskuelaan iti ili nga aramatenda daytoy a libro kas material a pangisuro iti maysa kadagiti klase. Ti pangngeddeng dagiti autoridad ti eskuelaan ket maigapu iti impormal a panangasaba dagiti nagannak dagiti estudiante a Saksi ni Jehova ken ti maysa kadagiti superbisor iti eskuelaan. Sapay koma ta itultuloy ni Jehova a bendisionan dagiti adipenna bayat nga ipaayda dagiti nasayaat nga instruksion babaen itoy a libro.’ Wen, ket sapay koma ta itultuloy a bendisionan ni Jehova ti nasayaat nga irarang-ay ti trabaho a panangikasaba iti Pagarian iti dakkel a pagilian ti Brazil.
[Kahon iti panid 8]
KASASAAD TI PAGILIAN
1994 Tawen Serbisio
KANGATUAN A BILANG TI MANGASKASABA: 385,099
RATIO: 1 a Saksi iti 404
TIMMABUNO ITI MEMORIAL: 1,018,210
PROMEDIO A BILANG DAGITI AGIBUMBUNANNAG A PAYUNIR: 38,348
PROMEDIO A BILANG DAGITI PANAGADAL ITI BIBLIA: 461,343
BILANG TI NABAUTISARAN: 24,634
BILANG DAGITI KONGREGASION: 5,928
SANGA NGA OPISINA: CESÁRIO LANGE
[Ladawan iti panid 9]
Ti sound car a maar-aramat idiay São Paulo idi 1940
[Ladawan iti panid 9]
Panangasaba iti Botanical Garden idiay Rio de Janeiro
[Ladawan iti panid 9]
Sanga nga opisina idiay Cesário Lange