Malagipyo Pay Aya?

Tinagiragsakyo aya a binasbasa dagiti nabiit pay a ruar Ti Pagwanawanan? No kasta, masarakanyo a makapainteres a lagipen dagiti sumaganad:

▫ Maragpat aya ti narelihiosuan a kinapudno?

Kinuna ni Jesu-Kristo: “Maammuanyonto ti kinapudno, ket ti kinapudno wayawayaannakayto.” (Juan 8:32) Saan laeng nga impamatmat ni Jesus a ti kinapudno ket maragpat no di ket impakitana a ti panangbirok iti dayta ket kasapulan iti panagserbitayo iti Dios. Imbagana iti Samaritana: “Dagiti pudno a managdaydayaw agdaydayawdanton iti Ama buyogen ti espiritu ken kinapudno.” (Juan 4:23)​—4/15, panid 5.

▫ Siasino ni Robert Estienne, ken kasano nga imbatina ti markana?

Ni Robert Estienne ket maysa a managimaldit a nagbiag idi maika-16 a siglo. Binusbosna ti biagna iti panagimaldit iti Nasantuan a Kasuratan ken inkagumaanna nga imbuksilan ti sasao iti Biblia a kas iti orihinal a pannakaisuratda. Ti sistemana a panangbingaybingay iti teksto ti Biblia kadagiti nanumeruan a bersikulo isut’ sistema a sapasap a maus-usar ita.​—4/15, pinanid 10, 14.

▫ Kasanotay a mabenepisiaran iti inaldaw a panagbasa iti Biblia?

Kanayon nga ipaayannatay ti Kasuratan iti nalawag a pannakaawat, ket dagiti padto maipapan iti maudi nga al-aldaw ad-adda a makaawis gapu iti makitkita, mangngeg, ken personal a mapaspasarantayo. Bayat nga umad-adu ti kapadasantayo iti biag ken mapagballigiantayo dagiti parikut, ad-adda nga apresiarentayo ti balakad ti Biblia. (Proverbio 4:18)​—5/1, panid 14.

▫ Kasano a malagip dagiti teksto iti Biblia?

Bayat a basaenyo ti Biblia, markaanyo dagiti napili a teksto a kayatyo a laglagipen, wenno sakarenyo ida kadagiti kard ket ikabilyo dagitoy a kard iti lugar a makitkitayo iti inaldaw. Bayat a padasenyo nga ikabesa dagiti bersikulo, mennamennaenyo ida ken aramatenyo ida. Saanyo a padpadasen ti agikabesa iti adu unay iti mamimpinsan, nalabit maysa laeng wenno dua iti kada lawas.​—5/1, pinanid 16, 17.

▫ Ania nga impormasion ti linaon ti Ebanghelio ni Lucas a mainayon iti impaay ti dadduma pay a mannurat iti Ebanghelio?

Nupay kaaduan iti inlanad ni Lucas ket umasping iti salaysay ni Mateo, 59 porsiento ti naiduma. Inlanad ni Lucas ti innem a milagro a naisangsangayan iti librona, ken nasurok a mamindua ti kaadu dagiti ilustrasion ni Jesus nga inlanadna a saan a dinakamat ti dadduma a nagsurat iti Ebanghelio.​—5/15, panid 12.

▫ Ania dagiti kangrunaan a rimat ti lawag ti kinapudno a naipalgak idi 1935?

Kadaydi a tawen, natarusan ti ili ni Jehova a ti dakkel a bunggoy a nadakamat iti Apocalipsis 7:9, 14 tinukoyna, saan a ti maikadua a nailangitan a klase, no di ket dagidiay addaan namnama ditoy daga. (Juan 10:16)​—5/15, panid 20.

▫ Kadagiti ania a praktikal a pamay-an a maliwliwatayo dagiti natayan?

Umimdeng. Mangipaay iti pammatalged. Ipaayyo ti bagiyo. No maitutop dakay ti umunan nga agtignay. Agsurat wenno mangipatulod iti makaliwliwa a kard. Makipagkararag kadakuada. (Santiago 5:16) Itultuloyyo a tulongan ida.​—6/1 pinanid 13, 14.

▫ Aniat’ maitulong dagiti naespirituan a kakabsat kadagidiay kameng iti pamilia a di agkakapammatian tapno makapagibturda?

Kanayon nga agsaokayo iti makapabileg, positibo, ken makaliwliwa kadakuada. (1 Tesalonica 5:14) Makapabang-ar daytoy iti isip ken bagida. No praktikal ken maitutop, iramanyo ida kadagiti teokratiko ken sosial nga aramidyo. Iramanyo ida kadagiti kararagyo. (Roma 1:9; Efeso 1:16)​—6/1, panid 29.

▫ Aniada a gunggona ti magun-od iti panagbalin a naanus bayat a makiramraman iti tay-ak ti ministerio?

Ti kinaanus tumulong iti agibumbunannag ti Pagarian nga agibtur iti kinaaleng-aleng wenno ibubusor. Imbes a makisupiat kadagiti makaunget a bumalay, makaisawang dagiti naanus a ministro iti naalumamay a sungbat wenno siuulimek a pumanaw, iti kasta mataginayon ti talna ken rag-oda. (Mateo 10:12, 13) Maysa pay, maawis dagiti marakarnero a tattao iti mensahe ti Pagarian.​—6/15, panid 12.

▫ Apay a napateg unay ti panangammo iti kinapudno ti Biblia?

Ti panangammo iti kinapudno wayawayaannatayo iti kinaulbod, panagarapaap, ken an-anito. No agbiagtayo a mayannurot iti dayta, patibkerennatay ti kinapudno nga agandur kadagiti rigat ken ikkannatay iti namnama a tumulong kadatayo a mangibtur iti suot.​—7/1, panid 8.

▫ Ania ti kangrunaan a rebbengen a sinublat ti napulotan a kongregasion Kristiano manipud iti natural nga Israel?

Ti pribilehio a panangpaneknek iti kinanaindaklan ni Jehova kadagiti nasion. (Isaias 43:21; 1 Pedro 2:9)​—7/1, panid 19.

▫ Aniat’ ipasimudaag dagiti sasao ni apostol Pedro a ti asawa a lalaki rumbeng a ‘padayawanna’ ti asawana? (1 Pedro 3:7)

Ti asawa a lalaki a mangpadayaw ken ni baketna saan a mangtagibassit wenno mangipababa kenkuana. Imbes ketdi, iparangarangna iti sasao ken aramidna​—iti pribado ken iti publiko​—nga isut’ patpatgenna. (Proverbio 31:10-31)​—7/15, panid 19.

▫ Apay a maikuna a kinamanagayat ti panangilaksid iti maysa a di agbabawi a managbasol manipud iti kongregasion Kristiano?

Ti panangilaksid ket ebkas ti panagayat ken Jehova ken kadagiti danana. (Salmo 97:10) Ipakitana ti ayat kadagidiay mangsursurot iti dana ti kinalinteg gapu ta ikkatenna iti tengngada ti maysa a mabalin a mangimpluensia kadakuada; salakniban met daytoy ti kinadalus ti kongregasion. (1 Corinto 5:1-13)​—7/15, panid 25.

▫ Kasano a mailasin ita “ti matalek ken masirib nga adipen,” a tinukoy ni Jesus iti Mateo 24:45-47?

Nangnangruna a mailasin ida babaen ti trabaho nga ar-aramidenda iti panangipaay kadagiti naibatay-Biblia a publikasion, iti panangisuro ken panangikasaba ti “naimbag a damag ti pagarian,” ken iti nainget a panangtungpalda iti Sao ti Dios, ti Biblia. (Mateo 24:14; 28:19, 20)​—8/1, panid 16.