“Napategak ken Jehova!”

KADAGITOY “napeggad a tiempo a narigat a pakilangenan,” adu a matalek nga adipen ni Jehova ti agib-ibtur iti agtultuloy a pannakidangadang kadagiti rikna ti kinaawan-pateg. (2 Timoteo 3:1) Saan a pakasdaawan daytoy, ta maysa kadagiti “nasikap nga aramid” ni Satanas isut’ panangipariknana kadatayo a saantayo a maipatpateg, uray ti Namarsua kadatayo! (Efeso 6:11, footnote) Mayanatup la unay, ti Abril 1, 1995, a ruar ti Pagwanawanan naglaon iti dua nga artikulo para iti panagadal iti kongregasion a napauluan “Napategkayo iti Imatang ti Dios!” ken “Panaggiginnutugot iti Ayat ken Nasayaat nga Ar-aramid​—Kasano?” Nairanta dagitoy nga artikulo a mangipalagip kadatayo nga ipatpateg ni Jehova ti panagreggettayo. Ti sumaganad ket sumagmamano a komento ti panangapresiar a naawat:

“Ita laeng iti 27 a tawenkon kas maysa kadagiti Saksi ni Jehova a naapektarannak unay iti maysa a magasin. Diak magawidan ti agsangit​—binang-arandak iti kasta unay dagitoy nga artikulo. Mariknak itan a pudno nga ipatpategnak ni Jehova. Kas man la maysa a nadagsen nga awit ti naikkat kadagiti abagak.”​—C. H.

“Namimpat a binasak daytoy a magasin iti agmalem. Naragsakanak iti pamay-an a panangikuna ti artikulo a kinaulbod ti naisuro kadakayo no mamatikayo nga awan pategyo. Aramatek daytoy nga artikulo iti panangipastor ken panangasaba iti binalaybalay.”​—M. P.

“Nasikap ni Satanas iti panangipariknana uray kadagiti mangay-ayat ken Jehova nga awan serserbida ken saanda a maipatpateg. Ti panangipalagip ti klase ‘matalek nga adipen’ nga ipatpategnatay unay ni Jehova ken apresiarenna amin dagiti babassit a banag nga aramidentayo maipaay kenkuana ti maysa kadagiti makaparegta unay a nabasak. Adu a tawenen a marikriknak ti kas dagiti dinakamatyo kadagitoy nga artikulo. Pulos a diak narikna a maikariak iti ayat ni Jehova, isut’ gapuna nga inkagumaak ti agaramid iti ad-adu pay iti panagserbi kenkuana tapno magun-odko dayta nga ayat. Ngem inaramidko dayta gapu ta maburibor ken mabainak. Gapuna uray kasano kaadu ti oras a mabusbosko iti ministerio, wenno uray kasano kaadu dagiti tao a natulongak, nariknak a di umdas dayta. Ti pagkurangak laeng ti nakitak. Ita no agserbiak ken Jehova gapu iti ayat, mailadawak nga isut’ umis-isem ken maipagpannakkelnak. Daytoy ti ad-adda a mangpadakkel iti ayatko kenkuana ken mangtignay kaniak nga agaramid iti ad-adu pay. Ita kasta laengen ti rag-ok iti panagserbik ken Jehova.”​—R. M.

“Pudno a dagitoy ti kasasayaatan, makapabileg unay, wen, naisangsangayan nga artikulo a mangtukay iti pusotayo a nabasak pay laeng! Limapulo ket lima a tawenen nga agbasbasaak iti Pagwanawanan, ken nakaad-adun a ruar ti naidumduma. Ngem artapan daytoy a ruar ti aniaman nga adda kadatayo a mangikkat iti panagduadua, danag, ken buteng nga ‘awan serserbi’ ken ‘saantayo a maipatpateg’ ken pulos a di umdas ti maar-aramidantayo tapno ‘magun-od’ ti ayat ni Jehova. Naglaon daytoy a Pagwanawanan iti kita ti naespirituan a tulong a kasapulan unay dagiti kakabsattayo. Rantak nga usaren dagitoy nga artikulo a maulit-ulit iti panangipastor.”​—F. K.

“Kadatayo a makidangdangadang iti nababa a panagraem iti bagi, wenno pananggura pay ketdi iti bagi, nagrigat nga urnongen ti pigsatayo tapno makapagtultuloy iti kinapudno. Kasta la unay ti kinauneg ti pannakipagrikna ken pannakaawat a maanninaw iti daytoy nga artikulo, arignat’ panangyapros iti mangpabang-ar, mangpaimbag a sapsapo, iti mismo a puso. Anian a makaliwliwa ti pannakabasa iti kasta a sasao iti Pagwanawanan ken maammuan nga awan panagduadua a maawatannatay ni Jehova! Pagyamanan iti panangipalagipyo kadakami a saan a tignayen ni Jehova ti tattaona babaen ti pannakaburibor, bain, wenno buteng. Nupay nalimitaran itay nabiit ti maaramidak iti trabaho a panangasaba gapu iti parikut iti pinansial ken salun-at ti pamiliami, makariknaak pay laeng iti pannakapnek iti maaramidak. Naragragsakak iti panagserbi no ayat ti mangtignay kaniak.”​—D. M.

“Kalkalpasko laeng a binasa ti ‘Napategkayo iti Imatang ti Dios!’ Nakaluaak iti tunggal parapo. Naggapuak iti pamilia a kurang ti panagiinnayat. Tinagibassit, inuyaw, ken kinatkatawaandak. Gapuna, idi ubingak pay laeng nariknak nga awan ti serserbik. Adda pay laeng kaniak ti lagip ti napalabas a mangparparigat kaniak no agsagabaak iti nakaro a parikut. Idi nagsardengak nga agserbi kas maysa a panglakayen iti kongregasion, nariknak a napaayak kas iti sigud​—iti Dios, iti pamiliak, ken kadagiti kakabsatko iti kongregasion. Saan a dagus a maikkat dagitoy a rikna, ngem tinulongannak daytoy naintiempuan nga artikulo tapno agbalin manen a natimbeng. Linawaganna ti panangmatmatko.”​—D. L.

“Pagyamanan iti artikulo a ‘Napategkayo iti Imatang ti Dios!’ Makidangdangadangak iti nakaro a gura iti bagi ken rikrikna iti kinaawan-pateg, a nairamut iti pannakaabusok idi ubingak. Maitutop unay a matmatan daytoy killo a kapanunotan kas nasikap nga aramid ni Satanas a mismo. Mangdadael pay ketdi daytoy iti tarigagay ti maysa nga agbiag. Talaga a masapul nga agreggetak iti inaldaw tapno masarangetko ti kinaulbod a saanak a maipatpateg. Ad-adda pay ti pateg daytoy nga artikulo kaniak ngem iti mabalinyo a pagarupen.”​—C. F.

“Ita nangnangruna nga agtignay dagiti kakabsat iti kapanunotan nga apresiaren ni Jehova dagiti aramid a tinignay ti ayat imbes a babaen ti panangpilit. Makapabang-ar ken makagutugot ti panangusig iti nabara ken naayat a personalidad ni Jehova, ti pannakaseknanna kadagiti tattaona kas indibidual, ken ti naayat a pamay-an a panangipaayna iti bagina met laeng. Gapu iti daytoy, adu ti nangyebkas iti panangapresiar idi apaman a naawatmi ti artikulo a ‘Napategkayo iti Imatang ti Dios!’ Agparang a daytoy ti nanglukat iti dalan para iti adu a mangparang-ay iti ad-adda a personal a relasion ken Jehova. Kayatmi ken ni baketko ti agyaman iti pamay-an ti panangisurat ken kinasensitibo a nayebkas kadagiti napalabas a magasin a Pagwanawanan. Ikagkagumaanmi nga ipakat ti adu kadagitoy a punto iti isasarungkarmi kadagiti kongregasion.”​—Manipud iti maysa nga agdaldaliasat a manangaywan.

“Maysaak a naregta a managbasa iti agarup 30 a tawenen, ngem ita laeng a nakabasaak iti kastoy a makapabileg ken makaliwliwa unay [nga artikulo]. Tinulongannak dagiti nabileg, nasayaat pannakayaplikarna a kasuratan a mangpataud kadagiti kinaulbod a naimula kadagiti riknak, a nangyadani nga ad-adda kaniak ken Jehova. Adu a tawen nga agserserbiak ken Jehova gapu iti pannakaburibor. Iti laeng panunotko ti pannakaawat iti subbot ken ayat ti Dios. Pagyamanan iti kakasta nga addaan nauneg a pannakaawat ken maseknan nga artikulo. Mangnamnamaak a makabasa pay iti adu a kas kadagitoy.”​—M. S.

“Iti 29 a tawen a kaaddak iti kinapudno, diak malagip no kaano a pinatanor kaniak ti maysa nga artikulo ti kasta a panangbigbig iti naimbag a nakem ken nasged a rikna. Nupay napadakkelak iti ayat ken [iti sidong ti] manangipateg a pamilia, pulos a diak narikna a maikariak nga agbiag, malaksid pay iti panagserbi ken Jehova. Kalpasan daytoy nga artikulo, nagparintumengak, ken buyogen ti nakaro a saibbek a nagyamanak ken Jehova. Ipategkonto iti agnanayon daytoy nga artikulo. Baliwakon ti panangmatmatko iti bagik gapu ta maawatak itan a napategak ken Jehova.”​—D. B.