Report Dagiti Manangiwaragawag ti Pagarian

Nagkaykaysa iti Panagserbi ken Jehova Dagiti Dati nga Agkakabusor

“TI DAMO a pannakangngegko maipapan kadagiti Saksi ni Jehova ket idi agserserbiak kas maysa nga armado a guardia idiay Bosnia,” ilawlawag ni Branko.a

Agbambantay idi ni Branko iti maysa nga ospital a pakaag-agasan dagiti nasugatan. Maysa kadagiti doktor ti makipagad-adal iti Biblia kadagiti Saksi, ket kabayatan ti panagtrabahona iti rabii, inlawlawagna ken Branko ti adu a naadalna maipapan iti Biblia.

Natignay unay ni Branko kadagiti nangngegna iti dayta a rabii ta dagus nga insukona dagiti armasna. Binirokna dagiti Saksi, ta kayatna ti makaadal iti ad-adu pay. Naminsan, kalpasan ti iyaakarna iti sabali pay a pagilian ti Europa, nagbirok ni Branko iti Kingdom Hall ket timmabuno iti maysa a gimong ti Yugoslavian a kongregasion dagiti Saksi ni Jehova. Sadiay a naam-ammo ni Branko ni Slobodan.

Naggapu met ni Slobodan idiay Bosnia ken nagserbi kas boluntario iti isu met laeng a gubat a nakiramanan ni Branko​—ngem ti kabusor a dasig. Nakidangadang ni Slobodan maipaay kadagiti Serbs maibusor kadagiti Croats. Idi nagam-ammo dagitoy a dua, nabautisaranen ni Slobodan kas maysa a Saksi ni Jehova. Intukonna nga iyadalan ti Biblia ni Branko, ti dati a kabusorna. Bayat a rimmang-ay ti panagadal, ad-adu pay ti nasursuro ni Branko maipapan ken Jehova, ket dimmakkel ti panagayatna iti Dios. Daytoy ti nangtignay ken Branko a mangidedikar iti biagna iti Namarsua. Idi Oktubre 1993, insimbolona ti dedikasionna babaen ti pannakabautisar iti danum.

Kasano a nagbalin ni Slobodan a maysa kadagiti Saksi ni Jehova? Saan pay a nabayag idi a pinanawanna ti paggugubatan idiay Bosnia. Nabasanan ti sumagmamano a publikasion dagiti Saksi, ngem dimmakkel laeng ti interesna iti Sao ti Dios idi simmarungkar ti dua a Saksi iti pagtaenganna idi kattapog ti 1992. Siasino ti simmarungkar ken ni Slobodan, a nangitukon iti panagadal iti Biblia kenkuana? Ni Mujo, a naggapu met idiay Bosnia ngem napadakkel kas maysa a Muslim. Bayat a rimmang-ay ti panagadal iti Biblia, nangbusbos da Mujo ken Slobodan, a dati nga agkabusor, iti sumagmamano a tiempo iti inaldaw tapno agpinnabilegda iti pammati.

Ginasut a ribu a tattao ti natay iti gubat idiay dati a Yugoslavia. Ngem agserserbi itan da Branko, Slobodan, ken Mujo kas amin-tiempo a manangaskasaba iti naimbag a damag iti isu met laeng a kongregasion dagiti Saksi ni Jehova. Napagballigianda dagiti dangadang iti etniko ken pulí, ket birbirokenda ita ti tarigagayanda a talna bayat nga agpaspasakupda iti Namarsua, ni Jehova.

Ngem aniat’ nangyeg kadagiti kasta a panagbalbaliw? Ti ayatda ken Jehova, ti panagraemda iti Biblia, ken ti gagarda a mangyaplikar iti kinapudno ti Biblia iti biagda. Kas kuna ti Nasantuan a Kasuratan, “ti sao ti Dios nabiag ken adda bilegna . . . ket kabaelanna a lasinen dagiti panunot ken dagiti panagem ti puso.”​—Hebreo 4:12.

[Footnote]