Pudno a Kinatalged—Naatap a Kalat
PAGAAYAT ni ubing nga Arnold ti ay-ayamna a tigre. Sadinoman a papananna, itugtugotna dayta—iti pagay-ayaman, iti panganan, iti pagiddaanna. Para kenkuana, mangliwliwa, mangipaay talged ti tigre. Maysa nga aldaw, adda parikut. Napukaw ti tigre!
Bayat nga agsangsangit ni Arnold, sinukisok ni nanang, tatang, ken dagiti tallo a manongna ti dakkel a balayda tapno birokenda ti tigre. Maysa kadakuada ti nakabirok kamaudiananna iti maysa nga uyosen. Nalawag, inkabil dayta sadiay ni Arnold sa kalpasanna dagus a nalipatanna ti ayanna. Naisubli ti tigre, ket insardengen ni Arnold ti nagsangit. Naragsak ken natalged manen.
Anian a nagsayaat koma no silalaka a marisut iti kasta ti amin a parikut—kas ti kinasimple iti pannakabirok iti ay-ayam a tigre iti uyosen! Ngem, iti kaaduan a tattao, ad-adda a serioso ken narikrikut ngem iti dayta dagiti parikut maipanggep iti kinatalged. Iti gistay amin a lugar, agsalsaludsod dagiti tao, ‘Agbalinakto kadi a biktima ti krimen wenno kinaranggas? Agpegpeggadak kadi a mapukawan ti trabaho? Sigurado kadi a maaddaan iti umdas a taraon ti pamiliak? Liklikandakto kadi dagiti dadduma gapu iti relihionko wenno iti nalikudak a pulí?’
Adu dagiti tattao a di natalged. Sigun iti Naciones Unidas, gistay tallo a bilion ti di maipapaayan saan laeng a ti pannakaagas dagiti gagangay a sakit ngem kasta met kadagiti nesesita nga agas. Nasurok a sangabilion a tattao ti agsagsagaba iti nakaro a kinapanglaw. Gistay sangabilion, nupay kabaelandat’ agtrabaho, ti bassit ti masapsapulanda. Umad-adu dagiti refugee. Idi arinunos ti 1994, agarup 1 iti kada 115 a tattao ditoy daga ti inkapilitan a pimmanaw iti pagtaenganda. Riniwriw a biag ti nadadael gapu iti $500-bilion-iti-makatawen a negosio a narkotiko a nangibunga iti nagadu a krimen ken kinaranggas. Dinadael ti gubat ti riniwriw a biag. Idi laeng 1993, 42 a pagilian ti nairaman kadagiti dadakkel a panagdadangadang, bayat a 37 a sabsabali pay ti nagpasar iti napolitikaan a kinaranggas.
Agkakanaig ti gubat, kinapanglaw, krimen, ken dadduma pay a pangta iti natauan a kinatalged, ket umad-aduda. Awan dagiti nalaka a solusion iti kakasta a parikut. Kinapudnona, saanen a marisut dagiti tao dagitoy.
“Dika agkammatalek kadagiti prinsipe, ken iti anak ti tao, a kenkuana awan ti tulong,” mamakdaar ti Sao ti Dios, ti Biblia. Asino, ngarud, ti pagtalkantayo? Itultuloy daytoy a kasuratan: “Nagasat daydiay adda kenkuana ti Dios ni Jacob a badangna, a ti inanamana adda ken Jehova a Diosna, isu a Nangaramid iti langit ken daga, ti baybay, ken amin nga adda kadakuada.”—Salmo 146:3-6.
Apay a makapagtalektay ken Jehova a mangyeg iti kinatalged ditoy daga? Posible kadi a tagiragsaken ti natalged, naragsak a biag itan? Kasanot’ panangikkat ti Dios kadagiti lapped iti natauan a kinatalged?