Inaramidda ti Pagayatan ni Jehova

Maysa a Balasitang a Nagsao Buyogen ti Kinatured

KABAYATAN ti maikasangapulo a siglo K.K.P., nainget ti relasion ti Israel ken Siria. Gagangay unay dagiti panagdadangadang ta idi adda napalabas a tallo a tawen nga awan ti napasamak a kinaranggas, nairekord daytoy iti historia.​—1 Ar-ari 22:1.

Nangnangruna a napeggad kadagidi a tiempo ti buyot dagiti manangraut a Siriano, a dadduma ti buklen dagiti ginasut a soldado. Darupen ken rauten dagitoy a mannakigubat dagiti Israelita, nga agawen ken adipenenda ti adu​—uray dagiti ubbing.

Kabayatan ti maysa nga iraraut, “maysa a balasitang” ti awanan asi a naitalaw manipud iti managbuteng-Dios a pamiliana. (2 Ar-ari 5:2) Tangay naipan idiay Siria, napilitan a makipagnaed kadagidiay nakabutbuteng ken dina am-ammo​—tattao a nagdaydayaw iti init, bulan, bitbituen, kaykayo, mulmula, ken uray kadagiti bato. Anian a pannakaidumada iti pamilia ken gagayyemna, nga agdaydayaw iti maymaysa a pudno a Dios, ni Jehova! Ngem, uray iti daytoy karkarna nga aglawlawna, nangipakita daytoy a balasitang iti naisangsangayan a tured maipanggep iti panagdaydayaw ken Jehova. Kas bungana, binalbaliwanna ti kabibiag ti maysa a prominente nga opisial nga agserserbi iti sidong ti ari ti Siria. Kitaentayo no kasano.

Ti Kinatured nga Agsao

Saan a nainaganan ti balasitang iti salaysay ti Biblia. Nagserbi kas katulong ti asawa ni Naaman, maysa a maingel a hepe ti armada ni Ari Ben-hadad II. (2 Kings 5:1) Nupay mararaem unay, adda idi nakarimrimon a sakit ni Naaman a kukutel.

Nalabit a ti nadayaw a kababalin ti balasitang ti nangtignay iti asawa ni Naaman nga agpudno kenkuana. Mabalin nga insaludsod ti babai iti balasitang, ‘Aniat’ maar-aramid kadagiti agkukutel idiay Israel?’ Saan a nagbain daytoy balasitang nga Israelita a situtured a nangibaga: “Amangan koma no ni apok adda iti mammadto nga adda idiay Samaria! No kasta immimbag koma iti kukutelna.”​—2 Ar-ari 5:3.

Saan a naibilang ti sasao daytoy a balasitang a kas kettay inuubing nga arapaap. Imbes ketdi, naipadamagda ken ni Ari Ben-hadad, a nangibaon ken ni Naaman ken ti sabsabali pay iti 150-kilometro a panagdaliasat nga agturong idiay Samaria tapno sapulenda daytoy a mammadto.​—2 Ar-ari 5:4, 5.

Ti Pannakapaimbag ni Naaman

Nagturong da Naaman ken dagiti tattaona ken ni Ari Jehoram ti Israel, nga awitda ti surat iti pannakiam-ammo manipud ken ni Ben-hadad ken ti maysa a kalalaingannat’ kadakkel a sagut a pirak. Di pagduaduaan a di nangipakita ti pammati ni managdaydayaw iti urbon a baka nga Ari Jehoram iti mammadto ti Dios a kas ti inaramid ti adipen a balasitang. Imbes ketdi, impagarupna nga immay ni Naaman tapno mangpataud iti riri. Idi nangngeg ti mammadto ti Dios a ni Eliseo ti panagdanag ni Jehoram, nangipatulod a dagus iti mensahe a mangidawdawat nga ibaon ti ari ni Naaman iti balayna.​—2 Ar-ari 5:6-8.

Idi nakagteng ni Naaman iti balay ni Eliseo, nangibaon ti mammadto iti mensahero a mangibaga kenkuana: “Inka ket agdigoska iti mamimpito a daras idiay Jordan ket ti lasagmo mabaliwanto kenka ket nadaluskanto.” (2 Ar-ari 5:9, 10) Nakaluksaw ni Naaman. Iti panangnamnamana iti namilagruan ken makapasiddaaw a pannakapaimbagna, insaludsodna: “Ti Abana ken ti Farfar a karkarayan ti Damasco, saanda aya a nasaysayaat ngem kadagiti isuamin a dandanum ti Israel? Diak mabalin aya ti agdigos kadakuada, ken madalusan?” Siluluksaw a pimmanaw ni Naaman iti balay ni Eliseo. Ngem idi nakirinnason dagiti adipen ni Naaman kenkuana, timmulok met laeng. Kalpasan a nagdigos iti namimpito a daras idiay Karayan Jordan, “ti lasagna nabaliwan a kas lasag ti ubing a bassit ket isu nadalusan.”​—2 Ar-ari 5:11-14.

Idi nagsubli ken ni Eliseo, kinuna ni Naaman: “Adtoy, ita, a maammuak nga awan ti Dios iti isuamin a daga, no di laeng iti Israel.” Nagsapata ni Naaman a “dinto agidatag iti mapuoran a daton wenno sakripisio kadagiti sabsabali a didios no di laeng ken ni Jehova.”​—2 Ar-ari 5:15-17.

Dagiti Leksion Agpaay Kadatayo

Saan koma a nakapan ni Naaman ken ni mammadto Eliseo no saan a situtured a nagsao ti adipen a balasitang. Ita, adu nga agtutubo ti mangar-aramid iti kasta. Idiay eskuelaan, mabalin a nalikmutda kadagiti estudiante nga awanan interes iti panagserbi iti Dios. Nupay kasta, saritaenda ti maipapan iti patpatienda. Dadduma kadakuada ti mangaramid ti kasta bayat ti kinaubingda.

Usigenyo ni Alexandra, balasitang nga agtawen iti lima idiay Australia. Idi nangrugi nga ageskuela, nakitulag ni nanangna iti mannursuro tapno ilawlawagna ti pammati dagiti Saksi ni Jehova. Ngem naklaat laengen ti ina ni Alexandra idi addan sadiay. “Adun ti ammok iti pammatiyo, kasta met iti mabalin ken di mabalin nga aramiden ni Alexandra iti eskuelaan,” kinuna ti mannursuro. Nasdaaw ti ina ni Alexandra, tangay awan sabali a Saksi nga ubbing iti eskuelaan. “Imbagan ni Alexandra kadakami,” inlawlawag ti mannursuro. Wen, sitataktika a nakisaritan daytoy a balasitang iti mannursurona.

Situtured a nagsao ti kakasta nga agtutubo. Iti kasta agtignayda a maitunos iti Salmo 148:12, 13: “Babbaro man ken babbalasang, lallakay ken ub-ubbing. Idaydayawda koma ti nagan ni Jehova, ta ti naganna laeng ti maitan-ok. Ti dayagna naringringbaw ngem ti daga ken ti langit.”