Ti Maika-101 a Klase ti Gilead​—Naregta iti Nasayaat nga Ar-aramid

TI Namarsua kadatayo, ni Jehova a Dios, ket naregta iti nasayaat nga ar-aramid, ken kasta met ti Anakna, ni Jesu-Kristo. Kas pagulidanantayo, impakita ni Jesus ti regtana babaen ti panangipatungpalna iti inted-Dios nga annongenna, a pakairamanan ti panangipaayna “iti bagina maipaay kadatayo tapno . . . dalusanna a maipaay iti bagina ti maysa nga ili a naisangsangayan a kukuana, naregta iti nasayaat nga ar-aramid.” (Tito 2:14) Di pagduaduaan nga impakita dagiti 48 a kameng ti maika-101 a klase ti Watchtower Bible School of Gilead ti regtada kadagiti nasayaat nga aramid. Naangay ti programa iti panagturpos dagitoy a misionero idi Setiembre 7, 1996, idiay Watchtower Educational Center idiay Patterson, New York.

Praktikal a Balakad Tapno Agtalinaed a Naregta

Ni Carey Barber, maysa a kameng ti Bagi a Manarawidwid, a nasuroken a 70 a tawen iti amin-tiempo a ministerio, ti tserman iti programa ti panagturpos. Iti panglukat a sasaona, dinakamat ni Kabsat Barber ti panangasaba ken panangisuro ni Jesus, nga isu “ti silaw ti lubong.” (Juan 8:12) Kinunana a saan a binukbukodan ni Jesus dayta a nadayaw nga akem no di ket indagadagna kadagiti adalanna nga isilnagda met ti silawda. (Mateo 5:14-16) Daytoy a pribilehio ti panagserbi parayrayenna ti biag ti maysa a Kristiano ken mangipabaklay iti nadagsen a responsabilidad kadagiti amin a “magna kas annak ti lawag.”​—Efeso 5:8.

Kalpasan dagidiay a panglukat a sasao, nayam-ammo ni Don Adams nga agserserbi iti Executive Offices idiay hedkuarter ti Brooklyn. Impalawagna ti tema nga “Umabante, Saan nga Umatras.” Dinakamat ni Kabsat Adams ti mismo nga Eskuelaan ti Gilead ken ti panggep daytoy​—ti panangpalawa iti pannakaikasaba ti naimbag a damag kadagiti sabsabali a pagilian. Dinakamatna ti panagrang-ay ti organisasion ti Dios, a nakaipablaaken kadagiti literatura ti Biblia iti intero a lubong iti nasurok a 300 a pagsasao. Ti libro a Pannakaammo a Mangiturong iti Biag nga Agnanayon, a naipablaak idi 1995, ket magun-odanen iti 111 a pagsasao ken nayurnos a maimaldit iti ad-adu pay. Nakapatpateg dayta nga alikamen iti panangtulong kadagiti kabbaro nga adalan ni Jesus tapno makapagdedikar ken mabautisaranda iti las-ud ti sumagmamano laeng a bulan. Gapuna mausar dagiti kabbaro a misionero ti kabaruanan a katulongan iti panangyadal iti Biblia para iti trabahoda.

Simmaganad, nagsarita ni Lyman Swingle, kameng ti Bagi a Manarawidwid, maipapan iti tema nga “Itultuloyyo nga Ipaay ken Jehova ti Sagrado a Panagserbiyo,” a naibatay iti Apocalipsis 7:15. Yantangay naragsak a Dios ni Jehova a mismo, ti agtultuloy a panagserbi kenkuana isut’ mangparagsak iti maysa. (1 Timoteo 1:11) Kas resulta daytoy naragsak a panagserbi, immay agdayaw kenkuana ti dakkel a bunggoy dagiti tattao manipud iti amin a paset ti daga. Kadagiti napalabas a tawen, dagidiay nasanay iti Eskuelaan ti Gilead nakiramanda iti panangtulong iti adu kadagitoy tapno dumtengda iti umiso a pannakaammo iti kinapudno. No kasta, addaantay iti amin a rason a mamati nga itultuloy a bendisionan ni Jehova dagidiay maibabaon a mangurnong iti ad-adu pay a kameng ti umad-adu a dakkel a bunggoy.

Intampok ni Daniel Sydlik, kameng met ti Bagi a Manarawidwid, ti tema a “Panangyanninaw iti Rag-o ni Jehova.” Impakitana nga amin nga adipen ti Dios, a pakairamanan dagiti baro a misionero, pribilehioda nga isuro kadagiti tattao ti dalan nga agturong iti biag nga agnanayon ken ti pananggun-od iti kasayaatan a panagbiag ita. “Ti panangisuro,” kinuna ni Kabsat Sydlik, “ket makagunggona a propesion. Mayanninaw dayta iti rupa dagiti tattao a mangisursuro ken iti rupa dagiti tattao a makasursuro.” (Salmo 16:8-11) Dinakamatna ti maysa a misionero idiay Estonia a nangikuna, “Adda kadatayo ti katan-okan a mensahe iti intero a daga, ket ti rupatayo ti mangipakita iti dayta.” Ti ebkas ti rupatayo mabalin a lukatanna ti adu a ruangan ken gutugotenna ti interes. Kayat a maammuan dagiti tattao no aniat’ mangparparagsak kadagiti adipen ni Jehova. “Gapuna maseknankayo iti rupayo,” imbalakad ni Kabsat Sydlik. “Maragsakan dagiti tattao a makakitkita kadagiti naragsak a tattao.”

Ni Ulysses Glass, a nakiramanen iti panangisuro kadagiti estudiante ti Gilead manipud pay iti maika-12 a klase idi 1949, impalawagna iti tallaong ti tema a “Buyogen ti Kinaanus, Aywananyo ti Kararuayo.” Ania ti kinaanus? Ipasimudaagna ti naanat a pananguray iti banag, nga ipakita ti panagteppel iti sidong ti pakarurodan wenno pakariribukan. Agtalinaed a natanang ti naanus a tao; nadarasudos ken nalaka nga agpungtot ti di makaan-anus a tao. “Adu ti mangipagarup a ti kinaanus ipasimudaagna ti kinakapuy wenno panagpangadua,” kinuna ni Kabsat Glass, ngem “para ken Jehova pagilasinan dayta iti kinapigsa ken panggep.” (Proverbio 16:32) Ania dagiti magunggona iti kinaanus? “Ti panaganus iti kanito ti pungtot pabang-arennakanto iti sangagasut nga aldaw a panagtuok,” kuna ti maysa a pagsasao dagiti Insik. “Ti kinaanus parayrayenna ti personalidad ti maysa,” kinuna ni Kabsat Glass. “Kayariganna, rutapanna ti dadduma pay a nasasayaat a galad babaen ti barnis ti kinapermanente. Pagbalinenna a makaay-ayo ti pammati, taginayonenna ti talna, ken patibkerenna ti ayat.”

“Maysa a pribilehio ti umawat iti annongen manipud ken Jehova a Dios babaen ti organisasionna,” kinuna ni Mark Noumair, a nagserbi kas misionero idiay Kenya iti 11 a tawen ken instruktor itan iti Gilead. Bayat a pinalawana ti tema a “Malaksid no Addaankayo iti Pammati, Saankayto a Makapagpaut,” dinakamat ni Kabsat Noumair ti ehemplo ni Ari Acaz ti Juda. Impatalged ni Isaias iti ari ti tulong ni Jehova iti annongenna, ngem kaskasdi a di nagtalek ni Acaz Kenkuana. (Isaias 7:2-9) Kalpasanna dinakamat ni Kabsat Noumair a dagiti misionero​—wen, datayo amin​—masapul a maaddaan iti pammati ken Jehova tapno makapagpaut kadagiti teokratiko nga annongenda. Dagiti partikular a karit iti pakaitudingan kas misionero kalikagumanna ti nabileg a pammati. “Kanayon a laglagipenyo nga awan perpekto a kasasaad iti daytoy a sistema dagiti bambanag,” kinuna ni Kabsat Noumair.

Dagiti Kapadasan a Manggutugot iti Naregta a Trabaho

Kabayatan ti panagsanayda idiay Gilead, kada ngudo ti lawas a makiraman dagiti estudiante iti ministerio iti publiko, nga isunto ti kangrunaan a pakaseknan kadagiti pakaitudinganda kas misionero. Ni Wallace Liverance, maysa a kameng ti faculty ti Gilead, ininterbiuna ti 15 nga estudiante, a nangisalaysay kadagiti kapadasanda. Kalpasanna ininterbiu da Leon Weaver iti Service Department Committee ken ni Lon Schilling iti Bethel Operations Committee dagiti kameng ti branch committee manipud Africa ken Latin America, a nangisalaysay kadagiti kapadasan iti tay-ak ti panagmisionero ken addaan iti sumagmamano a nasasayaat a pammagbaga kadagiti agturpos a misionero. Nadakamat nga idiay Sierra Leone, agarup 90 porsiento kadagidiay nabautisaran kabayatan ti 1995 a tawen serbisio ket tinulongan dagiti misionero. Anian a nagsayaat a rekord ti naregta a trabaho!

Kamaudiananna, ti presidente ti Sosiedad a ni Milton Henschel, nagpalawag kadagiti 2,734 nga agdengdengngeg iti tema a “Naisalsalumina ti Makitkita nga Organisasion ni Jehova.” Aniat’ mamagbalin iti organisasion ti Dios kas awan kapadana? Saan a ti kadakkel wenno bilegna no di ket gapu ta idaldalan dayta dagiti nalinteg a pagannurotan ken hudisial a pangngeddeng ti Dios. Idi un-unana naitalek iti ili ni Jehova, ti nasion ti Israel, dagiti sagrado nga ebkasna, a nangisalsalumina iti dayta a nasion. (Roma 3:1, 2) Ita, agkaykaysa ti organisasion ni Jehova bayat nga agan-andar iti sidong ti panangiwanwan ni Jesu-Kristo. (Mateo 28:19, 20) Rumangrang-ay, dumakdakkel daytoy. Adda kadi sabali pay nga organisasion ditoy daga a ti Bagi a Manarawidwidna ket agkonsulta iti Sao ti Dios, ti Biblia, sakbay a mangaramid kadagiti napapateg a pangngeddeng? Kadagitoy ken iti dadduma pay a pamay-an, pudno a naisalsalumina ti makitkita nga organisasion ni Jehova. Nagngudo ti makaparagsak a programa babaen ti pannakayawat dagiti diploma ken ti pannakaibasa ti maysa a surat manipud iti klase a mangyeb-ebkas iti panangapresiar iti naisangsangayan a pannakasanay.

[Kahon iti panid 22]

Estadistika ti Klase

Bilang dagiti pagilian a nairepresentar: 9

Bilang dagiti pagilian a nakaitudingan: 12

Bilang dagiti estudiante: 48

Promedio nga edad: 31.7

Promedio a tawen iti kinapudno: 13.8

Promedio a tawen iti amin-tiempo a ministerio: 9.8

[Ladawan iti panid 23]

Ti Maika-101 a Nagturpos a Klase ti Watchtower Bible School of Gilead

Iti listaan ditoy baba, nanumeruan dagiti intar manipud sango nga agpalikud, ket nailista dagiti nagan manipud iti kannigid nga agpakannawan iti kada intar.

(1) Swint, H.; Zezenski, A.; Highfield, L.; Mercado, S.; Diehl, A.; Chavez, V.; Smith, J.; Selenius, S. (2) Kurtz, D.; Clark, C.; Leisborn, J.; Mortensen, W.; Bromiley, A.; Toikka, L.; Marten, A.; Smith, D. (3) Zezenski, D.; Bjerregaard, L.; Garafalo, B.; Kaldal, L.; Chavez, E.; Fröding, S.; Khan, R.; Selenius, R. (4) Swint, B.; Bjerregaard, M.; Garafalo, P.; Holmblad, L.; Keyzer, M.; Fröding, T.; Palfreyman, J.; Palfreyman, D. (5) Minguez, L.; Leisborn, M.; Mercado, M.; Kurtz, M.; Diehl, H.; Toikka, J.; Clark, S.; Khan, A. (6) Minguez, F.; Marten, B.; Highfield, L.; Holmblad, B.; Bromiley, K.; Kaldal, H.; Mortensen, P.; Keyzer, R.