Apay nga Amintayo Idaydayawtay Koma ti Dios?

ALELUYA! Nalatak daytoy a sao iti kaaduan kadagiti mannakimisa iti Kakristianuan. Ipukpukkaw daytoy ti sumagmamano kadakuada kadagiti misada iti Domingo. Nupay kasta, mano ti talaga a makaammo iti kaipapanan ti sao? Kinapudnona, dayta ti Hebreo a sao agpaay iti “Idaydayawyo ni Jah!” Maysa dayta a makaparag-o, natbag a pammadayaw iti Namarsua, a Jehova ti naganna.a

Naynay nga agparang iti Biblia ti sao nga “Aleluya.” Apay? Gapu ta adu ti makagapu tapno idaydayaw ti Dios. Ni Jah (Jehova) ti Namarsua ken Mangsupsuporta iti nalawa nga uniberso. (Salmo 147:4, 5; 148:3-6) Pinataudna ti sistema ti ekolohia a mamagbalin a posible ti kaadda ti biag ditoy daga. (Salmo 147:8, 9; 148:7-10) Ken maseknan unay iti sangatauan. No aramidentayo ti pagayatanna, paraburan ken tulongannatayo iti daytoy a biag ken itukonna kadatayo ti sigurado a namnama a nasaysayaat pay a biag a dumteng. (Salmo 148:11-14) Ni Jah (Jehova) ti nangipaltiing iti sasao: “Ti sililinteg tawidennanto ti daga, ket agtaengto kenkuana nga agnanayon.”​—Salmo 37:29.

Gapuna, agpaay iti amin ti nainget a balakad: “Aleluya!” “Idaydayawyo ni Jah!” (Salmo 104:35; footnote iti Ingles) Ngem nakalkaldaang, saan nga amin ket mangipangpangag. Ita, agsagsagaba dagiti tao. Adu ti mabisbisinan, agsaksakit, wenno mairurrurumen. Adu ti agib-ibtur iti nakaro a ladingit gapu iti panangabuso iti droga wenno inumen a de alkohol wenno bunga ti imoralidad wenno iyaalsada. Adda kadi aniaman a makagapu tapno dagitoy a tattao idaydayawda ti Dios?

‘Ni Jehova Laeng ti Makaited Kaniak iti Namnama’

Wen, adda makagapu. Aw-awisen ni Jehova ti amin nga awan panangidumduma tapno isu ket am-ammuenda, sursuruenda nga aramiden ti pagayatanna, ken sagrapenda dagiti bendision a mangtigtignay kadagiti tao a mangidayaw kenkuana. Ket adu ti mangipangag. Alaentay a pagarigan ni Adriana idiay Guatemala. Idi agtawen iti pito ni Adriana, natay ni nanangna. Di nagbayag kalpasanna binaybay-an ni tatangna. Idi sangapulo ti tawenna, rinugiannan ti mangged. Tangay imbaga kenkuana ni nanangna nga agserbi iti Dios ken iti simbaan, nakitimpuyog ni Adriana iti nadumaduma a grupo ti Katoliko, ngem idi agtawen iti 12, naupay ket nakitipon iti maysa a barkada iti lansangan. Nangrugi nga agsigarilio, agdroga, ken agtakaw. Apay a tarigagayan ti maysa a balasitang a kas kenkuana nga idayaw ti Dios?

Ti kabsat a babai ni Adriana nangrugi a makipagadal iti Biblia kadagiti Saksi ni Jehova, ngem kinatkatawaan ni Adriana. Kalpasanna natay ti ikitda. Iti pumpon ti ikitna, naburiboran ni Adriana kadagiti makariribuk a saludsod. Sadinot’ nagturongan ni ikitna? Adda kadi idiay langit? Napan kadi iti umap-apuy nga impierno? Makariro unay dayta, ket napan ni Adriana idiay kapilia ti sementerio tapno agkararag maipaay iti tulong, nga inusarna ti nagan ti Dios a Jehova, kas insuro kenkuana ti kabsatna.

Di nagbayag makipagad-adalen iti Biblia kadagiti Saksi ni Jehova ken tumabtabunon kadagiti Nakristianuan a panaggigimongda. Daytoy ti nangilukat kenkuana iti maysa a baro a panangmatmat iti biag, ket situtured nga insardengna ti makitimpuyog kadagiti barkadana iti lansangan. Kuna ni Adriana, nga itan nasurok a 20 ti tawenna: “Ti laeng panagayat ken Jehova ti nangtignay kaniak a mangidian iti kasta a dakes a panagbiag. Ni laeng Jehova nga addaan naindaklan nga asi ti makaited kaniak iti namnama a biag nga agnanayon.” Iti laksid ti narigat a nangrugianna iti biag, addaan ni Adriana kadagiti nasasayaat a rason tapno idaydayawna ti Dios.

Maysa nga ad-adda pay a di makaay-ayo a kasasaad ti naipadamag idiay Ukraine. Maysa a lalaki ti naibalud bayat nga agur-uray iti pannakapapatay. Ay-ayenna kadi ti bagina? Malmaldaang? Saan, maisupadi ketdi iti dayta. Tangay di pay nabayag a nasarakan dagiti Saksi ni Jehova ken naaddaan iti pannakaammo maipapan ken Jehova, indawatna a kasaritada ni nanangna. Sursuratannan ida gapu ta nadamagna a tinungpalda ti kalikagumna. Kunana: “Pagyamanan iti isasarungkaryo ken ni nanang. Dayta ti kararagsakan a damag a naawatko iti napalabas a tawen.”

No maipapan iti bagina ken dagiti kaseldana a kinaskasabaanna, insuratna: “Ita addan pammatimi iti Dios ken ikagkagumaanmi ti agtignay maitunos iti pammatimi.” Ingngudona iti suratna. “Pagyamanan iti panangtulongyo kadakami a makaammo no ania ti ayat ken manggun-od iti pammati. No agtalinaedak a sibibiag, tumulongak met kadakayo. Agyamanak iti Dios ta addakayo ken tultulonganyo ti sabsabali a mangipateg iti Dios ken mamati kenkuana.” Inyapelar daytoy a lalaki ti sentensiana nga ipapatay. Ngem mapapatay man wenno mangbusbos iti adu a tawen iti pagbaludan, nalawag nga adda panggapuanna a mangidayaw iti Dios.

‘Nupay Bulsekak, Makakitaak’

Usigentay ita, ti naalibtak a tin-edyer a babai a pagam-ammuan ta nabulsek. Kasta ti napasamak ken Gloria, nga agnanaed idiay Argentina. Kellaat a nabulsek ni Gloria idi agtawen iti 19, ket saannan a pulos a napasubli ti panagkitana. Idi agtawen iti 29, nakidenna iti maysa a lalaki ket di nagbayag nagsikog. Ita nariknana nga addan serserbi ti biagna. Ngem idi natay ti anakna, nangrugi nga agsaludsod. Pinampanunotna, ‘Apay a mapaspasamak daytoy kaniak? Aniat’ naaramidak? Talaga kadi nga adda Dios?’

Iti daytoy a gundaway, dua a Saksi ni Jehova ti simmarungkar kenkuana. Nagadal iti Biblia ket naammuanna ti maipapan iti karina a dagiti bulsek makakitadanto manen idiay baro a lubong. (Isaias 35:5) Anian a nakaskasdaaw a namnama ken Gloria! Nakaragragsak, nangnangruna idi immanamong ni lakayna nga aramidenda a legal ti panagasawada. Kalpasanna naaksidente ni lakayna ket nabaldado, a naka-wheelchair laengen. Ita daytoy bulsek a babai kasapulan nga igubesna ti agtrabaho tapno adda pagbiagda. Mainayon pay, isu ti mangaramid kadagiti amin a trabaho iti pagtaengan, kasta met ti personal a panangasikaso ken ni lakayna. Kaskasdi nga idaydayaw ni Gloria ni Jehova! Iti tulong dagiti Kristiano a kakabsatna, nagadal iti Biblia a Braille, ket mapatpatibker unay kadagiti Nakristianuan a panaggigimong idiay Kingdom Hall. Kunana: “Nagrigat nga ilawlawag, ngem nupay bulsekak, kas man la makakitaak.”

No dadduma maidadanes dagiti tao no idaydayawda ti Dios. Naragsakan ti maysa a babai idiay Croatia idi naammuanna ti maipapan iti Dios, ngem binusor ni lakayna iti kabarbaro a pammatina ket isut’ inlaksidna, nga innalana ti maysa ti tawenna nga anakda a babai. Iti lansangan, a binaybay-an ti asawa ken ti pamiliana, nga awanan pagtaengan, panggedan, wenno uray pay ti anakna, naldaangan unay idi damo. Ngem ti ayatna iti Dios ti nangandingay kenkuana, nupay manmano nga agkitada iti balasitangna agingga a dimmakkel. Nasarakan daytoy a babai ti “perlas a nangato ti pategna” ket dina inibbatan dayta. (Mateo 13:45, 46) Kasanona a tinaginayon ti rag-ona iti laksid dagitoy narikut a tiempo? Kunana: “Ti rag-o ket maysa a bunga ti espiritu ti Dios. Mapatanor dayta a bukbukod iti makinruar a kasasaad, no kasano a dumakkel dagiti mula iti maysa a greenhouse uray aniaman ti klima iti ruar.”

Idiay Finland, natakuatan a ti innem ti tawenna a ni Markus addaan iti di maagasan a sakit iti piskel. Di nagbayag naka-wheelchair laengen. Kalpasan ti sumagmamano a tawen, isut’ impan ni nanangna iti maysa a Pentecostal a nalatak gapu ta ibagbagana a mapaimbagna dagiti tao a masaksakit. Ngem awan namilagruan a panangpaimbag. Gapuna napukaw ti interes ni Markus iti Dios ket inggubesna ti agadal iti siensia ken iti sabsabali pay a sekular a tay-ak. Kalpasanna agarup lima a tawenen ti napalabas, dimteng iti balay a pagnanaedan ni Markus ti maysa a babai a naka-wheelchair a kaduana ti maysa nga agtutubo a lalaki. Saksi ni Jehova dagitoy. Ateista idin ni Markus, ngem di nagkitakit a makisarita maipapan iti relihion ket pinastrekna ida.

Kalpasanna, maysa nga agassawa ti simmarungkar kenkuana, ket narugian ti panagadal iti Biblia. Kamaudiananna, ti bileg ti kinapudno iti Biblia ti nangbalbaliw iti panangmatmat ni Markus iti bambanag, ket naawatanna nga iti laksid ti kinabaldadona, talaga nga addaan kadagiti makagapu tapno idaydayawna ti Dios. Kinunana: “Nakaragragsakak ta nasarakak ti kinapudno ken ti organisasion nga us-usaren ni Jehova. Adda direksion ken pateg ti biagko itan. Maysa pay a napukaw a karnero ti nasarakan ket dinan kayat a panawan ti arban ni Jehova!”​—Idiligyo ti Mateo 10:6.

Amin ‘Idaydayawda Koma ni Jah’

Sumagmamano laeng dagitoy kadagiti adu a kapadasan a maisalaysay tapno ipakita a dagiti tao ita, aniaman ti kasasaadda, addaanda iti makagapu a mangidayaw iti Dios. Kastoy ti panangilawlawag ni apostol Pablo: “Ti nadiosan a debosion makagunggona iti isuamin a bambanag, ta addaan kari a biag ita ken daydiay umayto.” (1 Timoteo 4:8) No aramidentay ti pagayatan ti Dios, tungpalennanto ti “kari a biag ita.” Siempre, iti daytoy a sistema ti bambanag dina pagbalinen a nabaknang ti napanglaw wenno pagbalinen a nasalun-at ti masaksakit. Ngem itdenna ti espirituna kadagidiay agserbi kenkuana tapno masarakanda ti rag-o ken pannakapnek aniaman ti makinruar a kasasaadda. Wen, uray iti “biag ita,” dagiti masaksakit, mairurrurumen, ken napanglaw addaanda iti makagapu tapno idaydayawda ti Dios.

Ngem ti ngay biag ‘nga umayto’? Anian, ti panangpampanunot laengen iti dayta tignayennatayo a mangidayaw iti Dios buyogen iti nasged a kinarayray! Magagarantay a mangpanunot iti tiempo inton maawanen ti kinapanglaw; inton “ti agtaeng dinanto kunaen: ‘Masakitak’”; ken inton ni Jehova a Dios “punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.” (Isaias 33:24; Apocalipsis 21:3, 4; Salmo 72:16) Kasanot’ panangmatmatyo kadagitoy a kari ti Dios?

Inawat ti maysa nga agkabannuag a lalaki idiay El Salvador ti maysa a tract iti Biblia a nangilawlawag iti sumagmamano kadagitoy a banag. Kinunana iti Saksi a nangited iti daytoy kenkuana, “Manang, kasla narigat a patien ti ibagbaga daytoy a tract.” Kastat’ kuna ti adu. Nupay kasta, dagitoy ket kari Daydiay namarsua iti uniberso, a mangpapaandar kadagiti natural a siklo ti dagatayo, ken tumultulong uray kadagiti napanglaw ken masaksakit tapno makapagrag-oda. Mamatitayo iti ibagbagana. Nakipagadal iti Biblia ti nadakamat nga agkabannuag a lalaki kadagiti Saksi ni Jehova ket nasarakanna a pudno daytoy. No diyo pay naaramidan daytoy, paregtaendakayo a mangaramid iti kasta. Iti kasta, addakayto koma sadiay inton daytoy agdama a sistema ti bambanag naglabasen, ken amin a sangaparsuaan agkaykaysada a mangipukkaw: “Aleluya!” “Idaydayawyo ni Jah, dakayo a tattao!”​—Salmo 112:1; 135:1, NW.

[Footnote]

[Ladawan iti panid 5]

Addakayto koma sadiay inton ti amin a sangaparsuaan agkaykaysada a mangipukkaw: “Aleluya!”