No Mariknam a Dimon Kayat ti Agbiag

“Kanayon a kastoy ti marikriknak,” inamin ni Adriana a taga-Brazil. “Isu a napanunotko a nasaysayaat laengen no agpakamatayak.”

NARIKNAM kadin a kasla malmalmeska iti liday nga uray la kayatmon ti agpakamatay? Mabalin a maawatam ngarud ti narikna ni Adriana. Nakaro ti panagdandanagna, malidlidayan, ken maaw-awananen iti namnama. Ni Adriana ket na-diagnose nga addaan iti clinical depression.

Panunotem met ti Hapones nga agnagan iti Kaoru, a nangay-aywan kadagiti masakit ken nataenganen a nagannakna. “Marigrigatanak unay idi iti trabahok,” inlawlawagna. “Awan ti ganasko a mangan, ken masansan a mapuyatak. Napanunotko payen a nasaysayaat sa no matayakon.”

Kuna ti lalaki nga agnagan iti Ojebode a taga-Nigeria, “Kanayon a malidlidayak nga uray la agsangsangitak, isu a pinampanunotko no kasanok a gibusan ti biagko.” Naimbag laengen ta saan a nagpakamatay da Ojebode, Kaoru, ken Adriana. Ngem kada tawen, ginasut a ribu ti agpakpakamatay.

PAGPATULONGAM?

Lallaki ti masansan nga agpakpakamatay. Adu kadakuada ti mabain unay nga agpatulong. Imbaga ni Jesus a doktor ti kasapulan dagiti masakit. (Lucas 5:31) Isu a no adda sakitmo, pangngaasim ta saanka koma a mabain nga agpatulong. Adu nga addaan iti depression ti nangibaga a nakatulong kadakuada ti panagpadoktorda. Nagpadoktor da Ojebode, Kaoru, ken Adriana isu a nasaysayaaten ti kasasaadda.

Mabalin nga agireseta dagiti doktor iti agas wenno irekomendada iti pasiente ti talk therapy (ibagana iti doktor ti amin a marikriknana) wenno dagita a dua ti usarenda tapno sumayaat ti kasasaadna. Kasapulanna met ti mannakipagrikna a suporta dagiti naanus ken nadungngo a kapamilia ken gagayyemna. Ti kasayaatan nga agbalin a gayyem ti asinoman ket ni Jehova a Dios, a mangipapaay iti nagsayaat a tulong babaen ti Saona a ti Biblia.

ADDA KADI PERMANENTE A SOLUSION?

Masansan a kasapulan dagiti addaan iti depression ti napaut a panagpaagas ken masapul a sursuruenda a baliwan dagiti nakairuamanda. Ngem no addaanka iti depression, manamnamam nga adda naraniag a masakbayan a kas iti namnamaen ni Ojebode. Kunana, “Padpadaanak ti pannakatungpal ti Isaias 33:24, a nangipakpakauna nga addanto tiempo nga awanen ditoy daga ti mangibaga iti, ‘Masakitak.’” Kas ken Ojebode, manginanamaka iti inkari ti Dios a “baro a daga,” a sadiay, awanton ti “ut-ot.” (Apocalipsis 21:1, 4) Karaman iti dayta a kari ti panagpatingga ti amin a pakaburiboran ken pagladladingitan. Awanton dagiti nasaem a riknam iti agnanayon. Dagiti nasaem a riknam ket ‘saanmonton a malagip ken saanton nga agtalinaed iti pusom.’—Isaias 65:17.

Dagiti Makatulong a Bersikulo ti Biblia

Maawatan ti Dios ti rikriknam.

“Siak, ni Jehova a Diosmo, ig-iggamak ti kannawan nga imam, Daydiay mangibagbaga kenka, ‘Dika agbuteng. Tulongankanto.’”—Isaias 41:13.

Ad-adda a maawatan ni Jehova ti riknatayo ngem iti asinoman, ken kayatnatayo a tulongan.

Basaem ken panunotem ti Sao ti Dios.

Ni Elias “kiniddawna a matay koman.” Kinunana: “O Jehova! Alaemon ti biagko.”—1 Ar-ari 19:4.

“Nakatulong kaniak ti panangpampanunot iti Sao ti Dios,” kuna ni Ojebode. “Narikna met gayam idi ni propeta Elias ti nariknak.”

Agsursuroka kadagiti ulidan iti Biblia.

Imbaga ni Jesus ken Pedro: “Nagpakpakaasiakon a saan koma a kumapuy ti pammatim.”—Lucas 22:32.

Kalpasan a namitlo nga inlibak ni apostol Pedro ni Jesus, nakonsiensia unay isu a nagsangit gapu iti napalalo a ladingitna. Kuna ni Kaoru, “Tinulongannak ti kapadasan ni Pedro tapno maawatak nga ipatpateg ni Jehova ken ni Jesus ti rikna ni Pedro. Limmag-an ti riknak gapu iti dayta.”

Dagiti nasaem a riknam ket ‘saanmonton a malagip ken saanton nga agtalinaed iti pusom.’—Isaias 65:17