Dagiti Saksi ni Jehova a Mangangay Kadagiti Internasional a Kombension
Agpalplano ti Bagi a Manarawidwid dagiti Saksi ni Jehova a mangangay kadagiti internasional a kombension kabayatan ti 1998. Naipakaammo daytoy buyogen ti nabara a panangabrasa iti tinawen a miting ti Watch Tower Bible and Tract Society of Pennsylvania, a naangay iti Assembly Hall idiay Jersey City idi Sabado, Oktubre 5, 1996.
Kagiddan dagiti gagangay a kombension distrito, sumagmamano nga internasional a kombension ti maangayto idiay Norte America kabayatan ti ngalay ti 1998. Manamnama a dagitoy a panagtitipon pagkaykaysaenda dagiti ginasut a ribu a Saksi iti adu a paset ti daga. Tapno maiwayaan ti pannakairepresentar ti ad-adu a pagilian, tunggal maysa kadagiti nasurok a 100 a sanga nga opisina ti Watch Tower Society addaandanto iti nakedngan a bilang dagiti delegado maipaay iti naituding a siudad a pakaangayan ti internasional a kombension idiay Norte America.
Nabatad, saan nga amin a mayat a mapan idiay Norte America ket makapanda. Nupay kasta, posible agpaay iti rinibu a tumabuno iti internasional a kombension nga as-asideg iti lugarda. Mayur-urnos ti pannakaangay dagiti internasional a kombension iti dua wenno tallo a pagilian iti Europa ken dadduma pay idiay Africa, Asia, Latin America, ti Sud Pacifico, ken ti Caribe.
Iti maitutop a tiempo, pakaammuanto dagiti sanga nga opisina ti Sosiedad dagiti kongregasion kadagiti teritoriada a mismo maipapan iti siudad wenno dagiti siudad [a pakaangayan] ti kombension a pakaawisanda. Addanto maited nga impormasion maipanggep iti petsa ti kombension ken dagiti urnos iti panagpili kadagiti delegado. Dagidiay agpangpanggep nga agaplikar maipaay iti pannakapili dagiti delegado mabalin a rugiandan ti agurnong iti kuartada bayat a segseggaanda dagitoy naisangsangayan a pasamak.
Manginanama amin dagiti Saksi ni Jehova iti sangalubongan iti adda nga agur-uray kadagitoy nga internasional a panagtataripnong iti 1998. Umaspingto met laeng a programa ti maaramid kadagiti kombension distrito iti amin a pagilian.