‘Agtigtignayda Maitunos iti Narelihiosuan a Pannakasanayda’
IMPATULOD ti maysa a babai manipud idiay Miami, Florida, E.U.A., daytoy a surat iti lokal a pagiwarnak: “Idi Dis. 10 nasipdut ti pitaka ti barok iti paglakuan kadagiti baratilio. Naglaon daytoy iti lisensiana nga agmaneho, tarheta iti Social Security, kdp., a pakairamanan ti $260.
“Idi maireportna iti manager ti napukaw, nagawiden. Iti sarsardam adda immawag kenkuana iti telepono a maysa a babai nga Español ti pagsasaona a, babaen ti panangipatarus ti operator [iti telepono], imbagana a nasarakanna ti pitaka ti anakko.
“Impatuldona ti pagnanaedanna. . . . Intedna ti pitaka iti anakko, a saan pay a nabistrad, agraman ti $260.
“Nakitana ti mannanakaw a nangsipdut iti pitakana sa nagikkis. Inibbatan ti mannipdut ti pitaka sa timmaray. Dinan nakita ti barok, isu nga inyawidna ti pitaka sa immawag iti telepono.
“Isuda a sangapamiliaan ket Saksi ni Jehova. Nabatad nga agtigtignayda maitunos iti narelihiosuan a pannakasanayda.”
Saan a pagminaren dagiti Saksi ni Jehova ti kinamapagtalkan tapno idaydayaw ida dagiti tattao. (Efeso 6:7) Imbes ketdi, pagregreggetanda nga idayaw ti nailangitan nga Amada a ni Jehova. (1 Corinto 10:31) Ti ayatda iti Dios ken iti padada a tao ti mangtigtignay kadakuada a mangiwaragawag iti “naimbag a damag” maipapan iti Pagarian ti Dios. (Mateo 24:14) Babaen iti Pagarian, ikari ti Dios a pagbalinenna ti daga a napintas a paraiso. Iti kasta, ti daga saanto laeng a maysa a napintas a lugar no di pay ket addaan iti moral a kinadayag a pagsaknapanto ti kinamapagtalkan iti agnanayon.—Hebreo 13:18; 2 Pedro 3:13.