Report Dagiti Manangiwaragawag iti Pagarian

Iruruk-at Manipud iti Impluensia ti Sairo

NABAYAGEN nga iturayan ti espiritismo ti biag dagiti riniwriw a tattao. Ngem posible ti iruruk-at! Kastat’ napasamak iti adu iti kadaanan a siudad ti Efeso. Sigun iti salaysay ti Biblia, “adu kadagidiay nangan-annurot kadagiti arte ti panagsalamangka inyegda a pinagkaykaysa dagiti libroda ket pinuoranda . . . Iti kasta iti nabileg a pamay-an nagtultuloy a rumang-ay ken agballigi ti sao ni Jehova.”​—Aramid 19:19, 20.

Rumangrang-ay met ita ti kongregasion Kristiano. Kas idiay Efeso, karaman kadagidiay nagbalin a manamati dagiti dati a mangal-alagad iti demonismo. Ti sumaganad a kapadasan manipud Zimbabwe iyilustrarna daytoy.

Nalatak ni Gogo (Lola) Mthupha gapu iti espiritistiko a bilegna. Mapan kenkuana dagiti tattao nga aggapu kadagiti adayo a lugar kas ti Zambia, Botswana, ken South Africa tapno agpaagasda babaen iti ruruot. Sinursuruan met ni Gogo Mthupha ti sabsabali no kasano ti agbalin a n’anga, wenno erbolario. Ket no dadduma mangkulam!

Iti maysa nga agsapa ti Domingo simmarungkar ken Gogo Mthupha dagiti Saksi ni Jehova a makiramraman iti panagbalaybalay. Talaga a naragsakan a nakisarita kadakuada maipapan iti kari ti Biblia a maysa a baro a lubong ti kinalinteg, maysa a lubong nga awan dagiti amin a dakes nga impluensia. Inawatna ti libro a Mabalinyo ti Agbiag nga Agnanayon iti Paraiso a Dagaa ken immanamong a makipagadal iti Biblia iti pagtaenganna. Kalpasan laeng ti namitlo a panagadal, rinugiannan ti tumabuno kadagiti gimong.

Iti panagadalna iti Biblia, naammuan ni Gogo Mthupha a ti naisangsangayan a bilegna naggapu kadagiti dakes nga espiritu a parparsua nga immalsa iti kinasoberano ni Jehova. (2 Pedro 2:4; Judas 6) Naammuanna met a determinado dagitoy a sairo a mangisiasi iti amin ken Jehova ken iti nadalus a panagdayaw. Yantangay agpannuray ti pagbiagna iti pannakiumanna kadagitoy dakes nga espiritu a parparsua, aniat’ aramidenna?

Kayat ni Gogo Mthupha nga ibelleng dagiti amin nga anting-anting ken alikamenna iti espiritismo. Mairaman ditoy ti naisangsangayan a belona ken ti “agsao a sara ti toro,” nga us-usarenna iti panangagasna kas maysa a n’anga. Kayat ni Gogo Mthupha nga ibelleng amin dagitoy a bambanag tapno makapagserbi iti kakaisuna a pudno ken sibibiag a Dios, ni Jehova.

Ngem, nagkedked ti dadduma a kabagianna, gapu ta supsuportaranna ida. Impakpakaasida kenkuana nga itedna kadakuada dagiti alikamen, agraman ti misterioso a bilegna tapno adda latta panguartaanda. Nagkedked ni Gogo Mthupha.

Babaen ti tulong ti kongregasion dagiti Saksi ni Jehova iti lugarna, tallo a dadakkel a bag a naglaon kadagiti alikamen iti espiritismo ti naurnongna ket pinuoranna amin dagitoy. Bayat a mapupuoran dagiti alikamenna iti panagdayaw iti sairo, kinuna ni Gogo Mthupha: “Kitaenyo! Daydiay a sara, dina maispal ti bagina.”

Iti saan a nabayag, siraragsak nga insimbolo ni Gogo Mthupha ti dedikasionna ken Jehova babaen ti panagpabautisar iti danum. Aniat’ pagbibiagna itan? Aglaklako iti nateng. Wen, iti bileg ti Sao ti Dios, kabaelan ti maysa ti rumuk-at manipud panagdaydayaw iti sairo. Kuna ni Gogo Mthupha: “Ita laeng a nariknak ti kasta a wayawaya.”

[Footnote]