Naragsak nga Okasion ti Panagturpos ti Maika-104 a Klase ti Gilead

“NARAGSAK nga aldaw daytoy, ket agragrag-otayo amin.” Babaen kadagitoy a sasao, linuktan ni Carey Barber, miembro ti Bagi a Manarawidwid dagiti Saksi ni Jehova, ti naragsak a programa iti panagturpos ti maika-104 a klase iti Watchtower Bible School of Gilead idi Marso 14, 1998. Naawis dagiti 4,945 a timmabuno a mangirugi iti dayta nga okasion babaen ti panangkantada iti numero 208 a kanta ti Pagarian, a napauluan “Kanta ti Panagrag-o.”

Praktikal a Balakad No Kasano ti Agtalinaed a Naragsak

Ti panglukat a paset ti programa, agsasaruno a lima nga ababa a diskurso a naibatay iti Biblia, ket nangipaay kadagiti praktikal a balakad no kasano a taginayonen ti naragsak nga espiritu a nangpunno iti daydi nga aldaw ti panagturpos.

Ni Joseph Eames iti Writing Department ti immuna a nagpalawag. Inlawlawagna ti tema a “Tuladenyo ti Espiritu Dagiti Nasungdo,” a naibatay iti salaysay ti Biblia iti 2 Samuel kapitulo 15 ken 17, maipapan iti panaggandat ni Absalom, nga anak ni David, a mangagaw iti pagarian nga inted ti Dios iti amana babaen ti panangisungsongna iti iyaalsa. Nupay kasta, adda dagidiay nagtalinaed a nasungdo iti pinulotan ni Jehova a ni Ari David. Ania ti maadal dagiti misionero iti daytoy? “Sadinoman ti pakaibaonanyo kas misionero, sisusungdo nga itandudoyo ti espiritu ti kooperasion ken panagraem iti teokratiko nga autoridad. Tulonganyo dagiti sabsabali a mangaramid met iti dayta,” ingngudo ni Brother Eames.

Ti simmaruno iti programa isu ni David Sinclair, a nangibinsabinsa iti sangapulo a maipaannurot iti panagbalin a sangaili iti ‘tolda ni Jehova,’ a nadakamat iti Salmo 15. Ti palawagna, a napauluan “Agtalinaedkayo a Sangsangaili iti Toldayo Kas Misionero,” pinaregtana dagiti nagturpos nga estudiante a mangyaplikar iti daytoy a salmo iti pakaidestinuanda kas misionero, a sadiay agbalindanto a sangsangaili. Inyunay-unay ni Brother Sinclair ti kinapateg ti panagbiag a mayannurot kadagiti nadiosan a pagalagadan iti amin a tiempo. Anianto ti resultana? Kuna ti Salmo 15:5: “Daydiay nga agaramid kadagitoy a bambanag saanto a maan-ano.”

Ni John Barr, miembro ti Bagi a Manarawidwid, ti simmaruno a nagpalawag. Inturongna ti atension iti makapabileg nga epekto ti panagkanta kadagiti Nakristianuan a gimong. Ngem ania ti kararagsakan a kanta a maikankanta iti aglawlaw ti daga ita? Isu ti naimbag a damag ti Mesianiko a Pagarian ti Dios. Ania ti resulta ti kastoy a panagkanta, wenno panangasaba maipapan iti Pagarian? Kastoy ti nabatad a kunaen ti maikadua a binatog ti kanta numero 208: “Mangasabatay ken mangyadal pay, tapno Dios ’suntot’ dasiganda. Inda ikantat’ panagragragsak ket isuamin, ay mangngegda!” Wen, tunggal aldaw agarup 1,000 a baro nga adalan ti mababautisaran. Inngudo ni Brother Barr: “Saan kadi a nagsayaat a panunoten, kakabsat, a maibaonkayo kadagiti teritoria a pakasarakanyo kadagiti tattao nga agur-uray laeng a dumngeg iti kantayo a pagdayaw?”

“Ipangagyo Dagiti Timek ti Kapadasan.” Dayta ti paulo ti diskurso a simmaruno nga impaay ni James Mantz iti Writing Department. Kinunana nga adda dagiti banag a masursuro babaen laeng ti personal a kapadasan. (Hebreo 5:8) Nupay kasta, paregtaennatayo ti Proverbio 22:17 a ‘mangyallingag iti lapayagtayo ket denggentayo dagiti sasao ti masirib,’ wenno dagidiay natenneb. Adu ti maadal dagiti nagturpos nga estudiante kadagidiay immun-una ngem isuda. “Ammoda ti makitinnawar kadagiti aglaklako. Ammoda no ania a luglugar iti siudad ti liklikan gapu kadagiti pisikal wenno moral a peggad. Ammoda no ania ti nalaka a pakasairan dagiti umili. Ammo dagiti nabayagen a misionero no ania ti kasapulanyo tapno agbalinkayo a naragsak ken naballigi iti pakaidestinuanyo,” kinuna ni Brother Mantz.

Iti temana nga “Apresiarenyo ti Teokratiko nga Annongenyo,” inlawlawag ni Wallace Liverance, registrar ti Gilead School, a nupay adda idi dagiti misionero, kas kada apostol Pablo, Timoteo, ken Bernabe, a ti Dios a mismo ti nangituding iti pakaibaonanda babaen ti nasantuan nga espiritu wenno datdatlag a parangarang, ti “matalek ken masirib nga adipen” ti mangitudtuding iti lugar a pakaibaonan dagiti misionero a nasanay idiay Gilead iti sangalubongan a tay-ak. (Mateo 24:45-47) Inyarigna ti destino dagiti misionero kadagiti lugar a nangibaonan ni Gideon kadagiti tattaona a makiranget kadagiti Madianita. (Oc-ocom 7:16-21) “Apresiarenyo ti teokratiko nga annongenyo kas misionero. Kas kadagiti soldado ni Gideon a “sitatakderda tunggal lalaki iti lugarna,” ibilangyo a lugaryo ti pakaidestinuanyo. Agtalekkayo a mabalinnakay nga usaren ni Jehova kas iti panangusarna kadagiti tallogasut a tattao ni Gideon,” indagadag ni Brother Liverance.

Ti Pannakaseknan Kadagiti Tattao Mangyeg iti Kinaragsak

Naminsan, kinuna ti Pagwanawanan: “Imbes a dagiti banag ken ramramit a maparpartuat iti daytoy agdama nga urnos ti pakaseknan ken ipangpangrunatayo iti biagtayo, bambanag a saantayo a masigurado no agtultuloy pay, anian a nasaysayaat nga amang ken ad-adda a nainsiriban no dagiti tattao ti pudpudno a pakaseknantayo ken sursuruentayo ti maaddaan iti napaypayso a rag-o iti panangtulong kadagiti sabsabali.” Maitunos iti dayta, ni Brother Mark Noumair, maysa kadagiti instruktor iti Gilead School, insalaysayna iti maysa a grupo dagiti estudiante dagiti kapadasanda iti tay-ak ti serbisio, sana kinuna: “Ti panangipakita iti personal nga interes kadagiti sabsabali ti mamagbalin kadakayo a naimbag a misionero.”

Dagiti Tulbek iti Kinaragsak iti Ganggannaet a Tay-ak

Ania ti sumagmamano a tulbek iti balligi ken kinaragsak iti trabaho a panagmisionero? Ininterbiu da Brother Charles Woody iti Service Department ken Harold Jackson, dati a misionero idiay Latin America ken katulongan iti Teaching Committee, dagiti miembro ti nagduduma a Branch Committee nga agad-adal idi iti maikasiam a klase iti eskuelaan a para kadagiti branch personnel. Adtoy ti sumagmamano kadagiti imbalakadda:

Kinuna ni Albert Musonda manipud Zambia: “No iyuna ti misionero nga asitgan ken kablaawan dagiti kakabsat, makapabileg unay dayta agsipud ta suminged dagiti kakabsat iti misionero, ket suminged met ti misionero kadakuada.”

Insingasing ni Rolando Morales a taga Guatemala a no pasanguan dagiti mannakigayyem a tattao dagiti baro a misionero iti mainum, mabalin a siaanat ken sitataktikada nga ibaga: “Nabiitak pay ditoy. Kayatko dayta, ngem saan pay ngamin a sanay ti bagik. Inton maminsan laengen siguro.” Ania ti pagsayaatan ti kasta nga isusungbat? “Saan a masair dagiti tattao, ken agbalin a naayat dagiti misionero kadagiti sabsabali.”

Ania ti makatulong kadagiti misionero tapno agpautda iti destinoda? Kastoy ti kinuna ni Brother Paul Crudass, a nagturpos iti maika-79 a klase ti Gilead ken 12 a tawenen nga agserserbi idiay Liberia: “Ammok a pudno a mailiw dagiti nagannak kadagiti annakda. Ngem adda dagiti tiempo nga ikagkagumaan ti misionero nga iruam ti bagina iti pagilian a nakaibaonanna, iti aglawlaw, iti kultura, kadagiti tattao. Mariknana a kasla makaaw-awiden. No makaawat iti surat a naggapu idiay balayda a kunkunana, ‘Mailiwkami unay kenka; saanmi nga ammo ti aramidenmi no awanka,’ mabalin a dayta laeng ti kasapulan tapno agimpake ket agawiden. Nasken a laglagipen dayta dagiti kakabagian nga adda ditoy ita.”

Kalpasan dagiti interbiu, ti maudi a palawag iti programa ket impaay ni Theodore Jaracz, miembro ti Bagi a Manarawidwid. Ti temana: “Ipangrunayo ti Pagarian iti Biagyo.” Kasano a maipamaysa dagiti misionero ti trabahoda ken saan a masinga iti dayta? Pinaregtana ida a maaddaan iti eskediul iti personal a panagadal iti Biblia, a tumulong kadakuada a mangipangruna iti intereses ti Pagarian iti biagda. Ken impaayna daytoy naintiempuan a palagip: “Nabaybay-an dagiti dadduma a misionero ti personal a panagadalda agsipud ta dagiti elektroniko nga alikamen, E-mail, ken kompiuter ti sangsanguenda. Natimbeng koma ti panangusartayo iti aniaman nga alikamen ken saan koma nga aglablabes ti panawen a busbosentayo iti banag a mangtakaw iti panawentayo nga agadal a personal iti Sao ti Dios.”

Kalpasan ti diskurso ni Brother Jaracz, nayawat dagiti diploma ken naibasa ti surat a pagyaman a naggapu iti klase. Kastoy ti panangyebkas ti pannakabagi ti klase iti karirikna ti tunggal maysa: “Nakitami ti pammaneknek iti ayat a kinuna ni Jesus a pakailasinan dagiti adalanna, ket impatalged daytoy kadakami a sadinoman ti ayanmi, adda nabara, naayat, kasla ina nga organisasion a mangandingay kadakami. Buyogen ti kasta a pannaranay, nakasaganakami a mapan iti amin a suli ti daga.” Maysa dayta a makatukay-rikna a paggibusan ti naragsak nga aldaw ti panagturpos ti maika-104 a klase ti Gilead.

[Kahon iti panid 24]

Estadistika ti Klase

Bilang dagiti pagilian a nairepresentar: 9

Bilang dagiti pagilian a pakaibaonanda: 16

Bilang dagiti estudiante: 48

Bilang dagiti agassawa: 24

Promedio nga edad: 33

Promedio a tawen iti kinapudno: 16

Promedio a tawen iti amin-tiempo a ministerio: 12

[Ladawan iti panid 25]

Ti Maika-104 a Nagturpos a Klase ti Watchtower Bible School of Gilead

Iti listaan ditoy baba, nanumeruan dagiti intar manipud sango nga agpalikud, ken nailista dagiti nagan manipud kannigid nga agpakannawan iti kada intar

(1) Romero, M.; Howarth, J.; Blackburne-Kane, D.; Hohengasser, E.; West, S.; Thom, S. (2) Colon, W.; Glancy, J.; Kono, Y.; Drews, P.; Tam, S.; Kono, T. (3) Tam, D.; Zechmeister, S.; Gerdel, S.; Elwell, J.; Dunec, P.; Tibaudo, H. (4) Taylor, E.; Hildred, L.; Sanches, M.; Anderson, C.; Bucknor, T.; Hohengasser, E. (5) Howarth, D.; Ward, C.; Hinch, P.; McDonald, Y.; Sanches, T.; Thom, O. (6) Drews, T.; Tibaudo, E.; Elwell, D.; Dunec, W.; Blackburne-Kane, D.; Ward, W. (7) Anderson, M.; Zechmeister, R.; McDonald, R.; Bucknor, R.; Glancy, S.; Gerdel, G. (8) Romero, D.; Hinch, R.; Hildred, S.; Taylor, J.; Colon, A.; West, W.

[Ladawan iti panid 26]

Dagiti kakabsat a nangisuro iti maika-104 a klase: (manipud kannigid) W. Liverance, U. Glass, K. Adams, M. Noumair