Natungday a Panagtakaw Idiay Makinlaud nga Africa
Kas insalaysay ni Eunice Ebuh
“Implano dagiti armado a mannanakaw ti irarautda iti aldaw a kadawyan nga ang-angayenmi ti Panagadal iti Libro ti Kongregasion iti pagtaenganmi. Bay-anmi a silulukat dagiti ruangan para kadagiti kakabsat ken interesado a tattao. Nalabit ammo dagiti mannanakaw ti nakayugalianmi ken ti oras ti taripnongmi. Ammomi a nagtakawda la ketdi iti kotse iti sabali a lugar sada naguray iti ruanganmi iti dayta nga aldaw ken iti oras a panagadal iti libro.
“Naiparna nga immayda iti lawas nga ibibisita ti manangaywan ti sirkito. Nagtataripnongkami idiay Kingdom Hall imbes nga iti pagtaenganmi. Kalpasan ti gimong, adda miting dagiti panglakayen. Gagangay nga umun-unakami kadagiti ubbing nga agawid, ngem kiniddaw ni lakayko, a maysa a panglakayen, nga urayenmi. Imbagana a saan nga agbayag. Inur-uraymi ngarud.
“Simmaganad, saan nga agandar ti kotse. Saan a matarimaan ti manangaywan ti sirkito ken ni lakayko. Saan met a matarimaan ti mekaniko nga inayabanmi.
“Nagnagna a nagawid dagiti ubbing. Di nagbayag, nagawidak metten. Nakadanonak idi ag-alas dies ti rabii. Kas kaniak, saan met a nagkotse a simrek iti compound dagiti ubbing, isu a saan a naluktan ti dakkel a ruangan.
“Idi simrekak iti kuartok, nangngegko ti nakapigpigsa a kanalbuong ti paltog. Nasdaawak no ania daydiay. Pinadasko a tineleponuan ti polisia, ngem napugsat ti linia ti telepono. Timmarayak a bimmaba ket imbalunetko ti makinsango a ridaw a landok, sa pinardasak a kinandaduan ti makintengnga a ruangan. Iniddepko dagiti silaw. Aglagawen dagiti annakko, isu nga imbagak kadakuada nga agkalmada. Immararawkami a sangsangkamaysa iti pannalaknib ni Jehova. Kabayatanna, adda pay laeng ni lakayko idiay Kingdom Hall a mangikagkagumaan a mangpaandar iti kotse.
“Timmannawagak iti tawa ket nakitak ti maysa a lalaki a napasag iti kalsada iti ruar ti ruangan. Iti panagkunak, nakapanawen dagiti mannanakaw, isu nga inluganko ti lalaki iti kotsek ken intarayko iti ospital. Napeggad ti inaramidko, ngem masapul nga agkutiak. Makapaladingit ta natay met laeng ti lalaki iti sumuno nga aldaw.
“Iti laksid dayta a trahedia, mabalin a nakarkaro pay koma ti napasamak. Awan ti panagadal iti libro iti balaymi gapu iti ibibisita ti manangaywan ti sirkito. Dikam nagawid a sangapamiliaan a nakakotse gapu ta naperdi ti kotse. Rabii unayen a simmangpet ni lakayko, a sigurado koma a kinemmeg dagiti mannanakaw. Dagitoy ken dadduma pay a banag ti nakatulong kadakami iti dayta a rabii.
“Ni Jehova ti sarikedked ken kamangmi. Umasping dayta iti kuna ti kasuratan: ‘No saan a ni Jehova ti mangaywan iti ili, ti agbantay agpuyat ngem bambannogna laeng.’”—Salmo 127:1.