Maragsakantayo ta Ipakita ni Jehova Kadatayo ti Dalanna
“No maipapan iti Dios, awan ti pagkurangan ti dalanna; Ti sao ni Jehova naipadasen.”—2 SAMUEL 22:31.
1, 2. (a) Ania ti kasapulan ti amin a tao? (b) Makin-ulidan ti nasayaat a tuladentayo?
KASAPULAN ti amin a tao ti pannarabay. Kinapudnona, kasapulantayo ti tulong a mangiwanwan iti biagtayo. Pudno, inikkannatayo ni Jehova iti saririt ken konsiensia a tumulong kadatayo a mamaglasin iti naimbag ken dakes. Ngem nasken a masanay ti konsiensiatayo tapno agbalin a mapagtalkan a giya. (Hebreo 5:14) Maysa pay, kasapulan ti panunottayo ti umiso nga impormasion—ken nasken met a masanay a mangtingiting iti dayta nga impormasion—tapno makaaramidtayo kadagiti husto a desision. (Proverbio 2:1-5) Nupay kasta, gapu kadagiti di mapakpakadaan a pasamak iti biag, dagiti desisiontayo ket mabalin a saan a sigun iti kayattayo a mapasamak. (Eclesiastes 9:11) Iti kabukbukodantayo, awan ti mapangnamnamaan a pamay-antayo a mangammo iti mapasamak iti masanguanan.
2 Gapu kadagitoy ken adu a dadduma pay a rason, insurat ni propeta Jeremias: “O Jehova, ammok a ti dalan ti tao saan nga agtaud kenkuana met laeng; saan nga agtaud iti tao a magna ti panangiturong kadagiti addangna.” (Jeremias 10:23) Ni Jesu-Kristo, ti katan-okan a tao a nagbiag, ket nagpaidalan. Kinunana: “Ti Anak dina kabalinan nga aramiden ti maysa a banag iti bukodna a nakem, no di laeng ti makitana nga ar-aramiden ti Ama. Ta aniaman dagiti bambanag nga aramiden dayta a Maysa, dagitoy a bambanag ti aramiden met ti Anak iti umasping a pamay-an.” (Juan 5:19) Anian a nainsiriban ngarud a tuladentayo ni Jesus ket agpannuray ken agpaidalantayo ken ni Jehova! Inkanta ni Ari David: “No maipapan iti Dios, awan ti pagkurangan ti dalanna: ti sao ni Jehova naipadasen; isu ti maysa a kalasag kadagiti amin nga agkamang kenkuana.” (2 Samuel 22:31) No ikagumaantayo ti magna iti dalan ni Jehova imbes a surotentayo ti bukodtayo a sirib, maaddaantayo iti awan pagkuranganna a giya. Ti panangiwaksi iti dalan ti Dios ket mangiturong iti didigra.
Ipakita ni Jehova ti Dalan
3. Kasano nga inwanwan ni Jehova da Adan ken Eva, ket aniada a gundaway ti indiayana kadakuada?
3 Usigenyo ti kasasaad da Adan ken Eva. Nupay saanda idi a managbasol, kinasapulanda ti pannarabay. Saan a binay-an ni Jehova ni Adan a mangaramid iti amin a kayatna iti makaay-ayo a minuyongan ti Eden. Imbes ketdi, adda trabaho nga inted ti Dios kenkuana. Umuna, panaganan ni Adan dagiti animal. Kalpasanna, inikkan ni Jehova da Adan ken Eva kadagiti manayon a kalat. Iturayanda ti daga, punnuenda kadagiti kaputotanda, ken aywananda dagiti animal ditoy daga. (Genesis 1:28) Dakkel nga annongen daytoy, ngem agresultanto iti sangalubongan a paraiso a napno kadagiti perpekto a tattao nga agbibiag a sikakappia kadagiti animal. Anian a nagsayaat a gundaway! Maysa pay, bayat a simamatalek a magmagna da Adan ken Eva iti dalan ni Jehova, mabalinda ti makisao kenkuana. (Idiligyo ti Genesis 3:8.) Anian a nagsayaat a pribilehio—ti maaddaan iti agtultuloy, personal a pannakirelasion iti Namarsua!
4. Kasano nga impakita da Adan ken Eva nga awan panagtalekda ken saanda a nasungdo, ket ania dagiti nakaam-amak a resultana?
4 Pinaritan ni Jehova ti immuna a pagassawaan a mangan iti bunga ti kayo ti pannakaammo iti naimbag ken dakes nga adda idiay Eden, ket nangted daytoy kadakuada iti insigida a gundaway a mangipakita iti kinatulnogda—ti tarigagayda a magna iti dalan ni Jehova. (Genesis 2:17) Ngem di nagbayag, nasuot ti kinatulnogda. Idi immay mangallilaw ni Satanas, nasken nga ipakita da Adan ken Eva ti kinasungdoda ken Jehova ken agtalekda kadagiti karina tapno makapagtalinaedda a natulnog. Makapaladingit ta saanda a nasungdo ken awan panagtalekda. Idi indiayaan ni Satanas ni Eva iti wayawaya ken siuulbod nga imbagana nga agul-ulbod ni Jehova, naallilaw ni Eva ket sinukirna ti Dios. Kimmanunong kenkuana ni Adan a nagbasol. (Genesis 3:1-6; 1 Timoteo 2:14) Nagdakkel a pukaw ti nagbanaganna. Ti pannagna iti dalan ni Jehova inikkanna koma ida iti rumayrayray a rag-o bayat a progresibo nga aramidenda ti pagayatanna. Ngem, nalapunosen ti biagda iti pannakapaay ken saem agingga a nagtungpalda ken patay.—Genesis 3:16-19; 5:1-5.
5. Ania ti manayon a panggep ni Jehova, ken kasanona a tulongan dagiti matalek a tattao tapno makitada ti kaitungpalanna?
5 Nupay kasta, saan a binaliwan ni Jehova ti panggepna a ti daga agbalinto a paraiso a pagtaengan dagiti perpekto, awanan basol a tattao. (Salmo 37:11, 29) Ken kanayon a mangipaay iti awan pagkuranganna a pannarabay kadagidiay magna iti dalanna ken mangnamnama a makakita iti pannakatungpal dayta a kari. Kadatayo nga addaan pagdengngeg, adda ti timek ni Jehova iti likudantayo, nga agkunkuna: “Isu daytoy ti dalan, magnakayo kenkuana.”—Isaias 30:21.
Nagna ti Dadduma iti Dalan ni Jehova
6. Asino ti dua a lallaki idi ugma a nagna iti dalan ni Jehova, ket ania ti nagbanaganda?
6 Sigun iti rekord ti Biblia, sumagmamano laeng kadagiti kaputotan da Adan ken Eva ti nagna iti dalan ni Jehova. Ni Abel ti umuna kadagitoy. Nupay nasapa a natay, natay ni Abel nga addaan anamong ni Jehova ket ngarud, sigurado a maysanto kadagiti ‘nalinteg a mapagungar’ iti panawen nga intuding ti Dios. (Aramid 24:15) Makitananto kamaudiananna ti pannakatungpal ti naindaklan a panggep ni Jehova para iti daga ken iti sangatauan. (Hebreo 11:4) Ti maysa pay a nagna iti dalan ni Jehova isu ni Enoc, a ti padtona maipapan iti pagtungpalan ti agdama a sistema ti bambanag ket nailanad iti libro ni Judas. (Judas 14, 15) Napaababa met ti biag ni Enoc. (Genesis 5:21-24) Kaskasdi, “addaan iti pangsaksi a naay-ayona unay ti Dios.” (Hebreo 11:5) Idi natay, kas ken Abel, adda sigurado a namnamana a mapagungar, ket maysanto kadagidiay makakita iti pannakatungpal dagiti panggep ni Jehova.
7. Kasano nga impakita ni Noe ken ti sangakabbalayanna ti kinasungdoda ken Jehova ken ti panagtalekda kenkuana?
7 Bayat a dumakes a dumakes ti lubong sakbay ti Layus, ti panagtulnog ken Jehova ket ad-adda met a nagbalin a pakasuotan iti kinasungdo. Idi agturongen dayta a lubong iti kanibusananna, maysa laeng a bassit a grupo ti nasarakan a magmagna iti dalan ni Jehova. Impangag ni Noe ken ti pamiliana ti Dios ken nagtalekda iti imbagana. Simamatalek a tinungpalda dagiti naiparamid kadakuada ken saanda a kimmanunong kadagiti dakes nga aramid ti lubong kadagidi nga aldaw. (Genesis 6:5-7, 13-16; Hebreo 11:7; 2 Pedro 2:5) Agyamantayo ta nasungdo ken sitatalek a nagtulnogda. Gapu iti dayta, nakalasatda iti Layus ket isuda ti nagbalin a kapuonantayo.—Genesis 6:22; 1 Pedro 3:20.
8. Para iti nasion ti Israel, ania ti kaipapanan ti pannagna iti dalan ti Dios?
8 Idi agangay, nakitulag ni Jehova kadagiti kaputotan ni matalek a Jacob, ket nagbalinda a naisangsangayan nga ilina. (Exodo 19:5, 6) Inwanwan ni Jehova dagiti tattao a nakitulaganna babaen ti naisurat a Linteg, dagiti papadi, ken ti agtultuloy a panangidalan dagiti mammadto. Ngem adda kadagiti Israelita a mangsurot iti kasta a panangidalan. Tinignay ni Jehova ti mammadtona a mangibaga iti kastoy kadagiti Israelita: “Adtoy, siak ikabilko iti sangoyo ita nga aldaw ti bendision ken lunod: ti bendision no ipangagyo dagiti bilbilin ni Jehova a Diosyo, nga ibilinko kadakayo itoy nga aldaw: ket ti lunod no dikayo ipangag dagiti bilbilin ni Jehova a Diosyo, ngem sumiasikayo iti dalan nga ibilinko kadakayo itoy nga aldaw, tapno sumurotkayo kadagiti sabsabali a didios, a dikayo am-ammo.”—Deuteronomio 11:26-28.
No Apay a Pinanawan Dagiti Dadduma ti Dalan ni Jehova
9, 10. Gapu iti ania a kasasaad a nasken nga agtalek dagiti Israelita ken ni Jehova ken agbalinda a nasungdo kenkuana?
9 Kas kada Adan ken Eva, nasken nga agtalek dagiti Israelita ken ni Jehova ken agbalinda a nasungdo kenkuana tapno makapagtalinaedda a natulnog. Maysa ti Israel a bassit a nasion a nalikmut kadagiti manangriribuk a kabangibang a nasion. Iti abagatan a laud, Egipto ken Etiopia. Iti amianan a daya, Siria ken Asiria. Iti mismo a kabangibangna, Filistia, Ammon, Moab, ken Edom. Adda dagiti tiempo a nagbalin amin dagitoy a kabusor ti Israel. Maysa pay, inannurot amin dagitoy ti palso a relihion, a nabuyogan iti panagdayaw kadagiti idolo a didiosen, astrolohia, ken iti dadduma a kasasaad, nakaro a seksual a ritual ken naulpit a panangidaton kadagiti ubbing. Dagiti kabangibang ti Israel nagpannurayda kadagiti didiosenda maipaay iti adu nga annak, nalabon nga apit, ken panagballigi iti gubat.
10 Ti laeng Israel ti nagdaydayaw iti maysa a Dios, ni Jehova. Inkarina kadakuada a paraburanna ida iti adu nga annak, nalabon nga apit, ken salaknibanna ida kadagiti kabusorda no la ket tungpalenda dagiti lintegna. (Deuteronomio 28:1-14) Makapaladingit ta adu kadagiti Israelita ti saan a nakaaramid iti daytoy a banag. Kadagidiay nagna iti dalan ni Jehova, adu ti nagsagaba gapu iti kinasungdoda. Dagiti dadduma pinarparigat, rinabrabak, sinapsaplit, imbalud, inub-ubor, ken pinapatay pay ketdi dagiti padada nga Israelita. (Aramid 7:51,52; Hebreo 11:35-38) Nakaro la ketdi a suot dayta kadagiti matalek! Ngem apay a nagadu ti simiasi iti dalan ni Jehova? Adda dua nga ehemplo iti pakasaritaan ti Israel a tumulong kadatayo a mangamiris iti di umiso a panagpampanunotda.
Ti Dakes nga Ulidan ni Ahaz
11, 12. (a) Idi pinangtaan ti Siria, ania ti di kayat nga aramiden ni Ahaz? (b) Ania ti dua a nagpannurayan ni Ahaz maipaay iti kinatalged?
11 Nagturay ni Ahaz iti makin-abagatan a pagarian ti Juda idi maikawalo a siglo K.K.P. Saan a natalna ti panagturayna. Naminsan, nagkappon ti Siria ken ti makin-amianan a pagarian ti Israel a nakigubat kenkuana, ket “ti pusona nagkintayeg, ken ti puso dagiti tattaona.” (Isaias 7:1,2) Nupay kasta, idi nangitukon ni Jehova iti tulong ken inawisna ni Ahaz nga isu ket subokenna, siiinget a nagtukkiad ni Ahaz! (Isaias 7:10-12) Nagbanaganna, naabak ti Juda iti gubat ket adu ti napapatay.—2 Cronicas 28:1-8.
12 Nupay nagkedked ni Ahaz a mangsubok ken Jehova, saan a bimdeng a nagpatulong iti ari ti Asiria. Kaskasdi, nagtultuloy a nagsagaba ti Juda iti sidong dagiti nasion a kabangibangna. Idi binusor met ti Asiria ni Ahaz ken “pinaleddaangna,” “nagidaton [ti ari] kadagiti didios ti Damasco, a nangkabil kenkuana; ket kinunana, Agsipud ta dagiti didios dagiti ar-ari ti Siria timmulongda kadakuada, gapuna agidatonakto kadakuada, tapno tulongandakto.”—2Cronicas 28:20,23.
13. Ania ti impakita ni Ahaz babaen ti panagpannurayna kadagiti didiosen ti Siria?
13 Idi agangay, kinuna ni Jehova iti Israel: “Siak ni Jehova a Diosmo, a mangisuro kenka a maipaay iti gunggonam, a mangiturong kenka iti dalan a papanam koma. O no dinengngegmo koma dagiti bilbilinko! iti kasta ti talnam kas koma iti maysa a karayan, ken ti kinalintegmo kas la koma daldalluyon ti baybay.” (Isaias 48:17, 18) Iti panagkamangna kadagiti didiosen ti Siria, saan a ‘nagturong [ni Ahaz] iti dalan a papananna koma.’ Isu ket naan-anay nga inyaw-awan ti panagpampanunot dagiti nasion, a nagpannuray kadagiti ubbaw a gubuayan ti kinatalged imbes a ni Jehova.
14. Apay nga awan ti pagpambar ni Ahaz idi nagpannuray kadagiti didiosen?
14 Nabayag idin a naipakita nga “awan serserbida a dios” ti didiosen dagiti nasion, a pakairamanan dagiti didiosen ti Siria. (Isaias 2:8,) Sakbayna, bayat ti panagturay ni Ari David, silalawag a naipakita a natantan-ok ni Jehova ngem kadagiti didiosen ti Siria idi nagbalin dagiti Sirio nga ad-adipen ni David. (1 Cronicas 18:5, 6) Ni laeng Jehova, “ti Dios dagiti didios, ken Apo dagiti ap-appo, ti dakkel a Dios, ti mannakabalin, ken nakabutbuteng,” ti makaipaay iti napaypayso a kinatalged. (Deuteronomio 10:17) Ngem tinallikudan ni Ahaz ni Jehova ket nagpannuray kadagiti didiosen dagiti nasion maipaay iti kinatalged. Didigra ti inyeg daytoy iti Juda.—2 Cronicas 28:24,25.
Dagiti Judio Agraman ni Jeremias Idiay Egipto
15. Kasano a nagbasol dagiti Judio sadi Egipto idi kaaldawan ni Jeremias?
15 Gapu iti nakaro a kinagulib ti ilina, idi 607 K.K.P., impalubos ni Jehova a dadaelen dagiti taga Babilonia ti Jerusalem ken ti templona. Nakayawan idiay Babilonia ti kaaduan kadagiti umili. Ngem nabati dagiti dadduma ket maysa kadakuada ni propeta Jeremias. Idi napapatay ni gobernador Geodalias, nagkamang daytoy a grupo idiay Egipto ket inkuyogda ni Jeremias. (2 Ar-ari 25:22-26; Jeremias 43:5-7) Inrugida sadiay ti nagdaton kadagiti didiosen. Sipapasnek a nakirinnason ni Jeremias kadagiti di matalek a Judio, ngem nasubegda. Nagkedkedda nga agpannuray ken Jehova ket impettengda nga itultuloyda ti agdaton iti “reyna ti langit.” Apay? Agsipud ta daytoy ti inaramidda ken dagiti ammada ‘kadagiti il-ili ti Juda, ken kadagiti lanlansangan ti Jerusalem; ta iti daydi umanayen ti taraonda, ken nakaradkadda, ket awan ti nakitada a dakes.’ (Jeremias 44:16, 17) Inkalintegan pay dagiti Judio: “Manipud idi insardengmi ti panagpuor ti insienso iti reyna ti langit, ken imbuyat kenkuana dagiti datdaton a nainum, agkurangkami iti isuamin, ket maibuskami babaen ti kampilan, ken iti bisin.”—Jeremias 44:18.
16. Apay a namimpinsan a biddut ti panagrasrason dagiti Judio sadi Egipto?
16 Anian a panagpampanunot! Ania aya ti napasamak? Agpayso a nagdaton dagiti Judio kadagiti didiosen iti daga nga inted kadakuada ni Jehova. Adda dagiti tiempo, kas idi kaaldawan ni Ahaz, a nagsagabada gapu iti dayta a panagapostasia. Nupay kasta, ni Jehova “nainayad nga agpungtot” kadagiti tattao a nakitulaganna. (Exodo 34:6; Salmo 86:15) Imbaonna dagiti mammadtona tapno gutugotenda ida nga agbabawi. Adda dagiti tiempo a no matalek ti ari, isu ket bendisionan ni Jehova, ket magunggonaan dagiti umili iti dayta a pammendision, uray no di matalek ti kaaduan kadakuada. (2 Cronicas 20:29-33; 27:1-6) Nagbiddut a namimpinsan dagiti Judio sadi Egipto iti panangipagarupda a dagiti didiosenda ti nangted iti kinarang-ay a tinagiragsakda idi idiay dagada!
17. Apay a napukaw ti Juda ti daga ken ti templona?
17 Sakbay ti 607 K.K.P., indagadag ni Jehova kadagiti umili ti Juda: “Ipangagyo ti timekko, ket siakto ti Diosyo, ket dakayto ti ilik; ket magnakayo iti amin a dalan nga ibilinko kadakayo, tapno mapaimbagkayo.” (Jeremias 7:23) Napukaw dagiti Judio ti temploda ken ti dagada agsipud ta nagkedkedda a magna ‘iti amin a dalan nga imbilin ni Jehova kadakuada.’ Siguraduentayo a liklikan dayta a nakaam-amak a biddut.
Bendisionan ni Jehova Dagidiay Magna iti Dalanna
18. Ania ti masapul nga aramiden dagidiay magna iti dalan ni Jehova?
18 Iti kaaldawantayo, kas iti napalabas, ti pannagna iti dalan ni Jehova kalikagumanna ti kinasungdo—ti determinasion nga isu laeng ti pagserbiantayo. Kalikagumanna ti panagtalek—ti naan-anay a pammati a mapagpiaran ken matungpalto dagiti kari ni Jehova. Ti pannagna iti dalan ni Jehova kalikagumanna ti panagtulnog—panangtungpal kadagiti lintegna a di sumiasi ken panangannurot kadagiti nangato a pagalagadanna. “Ni Jehova nalinteg, ayatenna ti kinalinteg.”—Salmo 11:7.
19. Aniada a didiosen ti pagdaydayawan ita dagiti adu, ket ania dagiti resultana?
19 Nagpannuray ni Ahaz kadagiti didiosen ti Siria maipaay iti kinatalged. Dagiti Israelita sadi Egipto ninamnamada a ti “reyna ti langit,” maysa a diosa a sapasap a mapagdaydayawan idi idiay Makintengnga a Daya idi un-unana a panawen, ti mangted kadakuada iti material a kinarang-ay. Iti kaaldawantayo, saan a literal nga idolo dagiti adu a didiosen. Namallaag ni Jesus maibusor iti panagserbi iti “Kinabaknang” imbes a ken Jehova. (Mateo 6:24) Dinakamat ni apostol Pablo ti “kinaagum, isu a panagrukbab iti didiosen.” (Colosas 3:5) Dinakamatna met dagidiay a “ti diosda isu ti tianda.” (Filipos 3:19) Wen, maibilang ti kuarta ken dagiti material a banag kadagiti kangrunaan a didiosen a mapagdaydayawan ita. Iti kinapudnona, ti kaaduan—a pakairamanan dagiti adu a kameng ti relihion—‘isadsadagda ti namnamada iti pagduaduaan a kinabaknang.’ (1 Timoteo 6:17) Adu ti siaagawa nga agserserbi kadagitoy a didiosen, ket agsagsagrap iti gunggona dagiti dadduma—agnanaedda kadagiti nagpipintas a pagtaengan, sagsagrapenda dagiti agkakangina a banag, ken agkakaimas ti kanenda. Ngem saan nga amin ket agsagsagrap iti kasta a kinabaknang. Ket uray dagidiay agnamnam-ay matakuatandanto inton agangay a saan a makapnek dagitoy a banag. Aglabas dagitoy, saanda nga agpaut, ken saanda a mapennek dagiti naespirituan a kasapulan.—Mateo 5:3.
20. Ania a natimbeng a panangmatmat ti nasken a mantenerentayo?
20 Pudno, nasken nga agbalintayo a praktikal bayat nga agbibiagtayo iti maudi nga al-aldaw ti agdama a sistema ti bambanag. Masapul a mangaramidtayo kadagiti rasonable nga addang tapno maipaaytayo dagiti material a kasapulan ti pamiliatayo. Ngem no napatpateg kadatayo ti nasaliwanwan a panagbiag, panagsapul iti kuarta, wenno dagiti umasping a banag ngem iti panagserbi iti Dios, natnagtayon iti maysa a kita ti idolatria ken saantayon a magmagna iti dalan ni Jehova. (1 Timoteo 6:9, 10) Ngem kasanon no sumangbay kadatayo dagiti parikut iti salun-at, pinansial, wenno dadduma pay a problema? Saantay koma a kas kadagiti Judio sadi Egipto nga impabasolda iti panagserbida iti Dios dagiti parikutda. Imbes ketdi, subokentayo ni Jehova, saan a kas ken Ahaz a nagkedked a mangaramid iti dayta. Sisusungdo nga agpaiwanwantayo ken Jehova a Dios. Sitatalek a surotentayo ti panangidalanna, ken agkararagtayo a dumawat iti kired ken sirib iti panangsango iti aniaman a kasasaad. Kalpasanna, siinanama nga urayentayo ti pammendision ni Jehova.
21. Aniada a bendision ti dumteng kadagidiay magna iti dalan ni Jehova?
21 Iti intero a pakasaritaan ti Israel, sibabaknang a binendisionan ni Jehova dagidiay nagna iti dalanna. Inkanta ni Ari David: “Idalannak, O Jehova, iti kinalintegmo gapu kadagiti kabusorko.” (Salmo 5:8) Pinagbiktoria ni Jehova ni David idi nakigubat kadagiti kabangibang a nasion a nangriribuk ken Ahaz idi agangay. Iti babaen ni Solomon, naparaburan ti Israel iti talna ken kinarang-ay nga inil-iliw idi kamaudiananna dagiti Judio sadi Egipto. Pinangabak pay ketdi ni Jehova ni Ezekias nga anak ni Ahaz maibusor iti nabileg nga Asiria. (Isaias 59:1) Wen, saan nga ababa ti ima ni Jehova kadagidiay nasungdo kenkuana, a di nagtakder “iti dalan dagiti managbasol” no di ket ti pakaragsakanda adda iti linteg ti Dios. (Salmo 1:1,2) Pudno met dayta ita. Ngem kasanotay a masigurado ita a magmagnatayo iti dalan ni Jehova? Masalaysay daytoy iti sumaganad nga artikulo.
Malagipyo Kadi?
◻ Aniada a galad ti kasapulan unay tapno makapagnatayo iti dalan ni Jehova?
◻ Apay nga ubbaw ti panagpampanunot ni Ahaz?
◻ Ania ti madi iti panagrasrason dagiti Judio sadi Egipto?
◻ Kasanotay a mapabileg ti determinasiontayo a magna iti dalan ni Jehova?
[Ladawan iti panid 13]
Nagpannuray ni Ahaz kadagiti didiosen ti Siria imbes a ken Jehova