Timmulong a Nangisaknap iti Lawag “Agingga iti Ungto ti Daga”
NAUSAR idi ni apostol Pablo a mangisaknap iti naespirituan a lawag “agingga iti ungto ti daga.” Kas bungana, adu ‘dagidiay siuumiso a maikari iti agnanayon a biag a nagbalin a manamati.’—Aramid 13:47, 48; Isaias 49:6.
Nalawag nga addaan met iti nasged a tarigagay a mangisaknap iti naespirituan a lawag ni William Lloyd Barry, maysa a napinget, nagaget a Kristiano ken miembro ti Bagi a Manarawidwid dagiti Saksi ni Jehova. Pimmusay ni Kabsat Barry idi Hulio 2, 1999, bayat nga agpalpalawag iti maysa a kombension distrito idiay Hawaii.
Nayanak ni Lloyd Barry idiay New Zealand idi Disiembre 20, 1916. Uray idi sakbay a nayanak, a napalaus ti panaginteres dagiti dadakkelna kadagiti kinapudno iti Biblia nga indatag dagiti publikasion a sinurat ni C. T. Russell nga impablaak ti Watch Tower Bible and Tract Society. Dimmakkel ngarud ni Kabsat Barry iti napinget a Kristiano a sangakabbalayan.
Nupay interesado iti isport ken edukasion, a nakapagturpos pay ketdi iti maysa a kurso a mainaig iti siensia, dagiti naespirituan a banag ti impangpangruna ni Kabsat Barry. Gapuna, idi Enero 1, 1939, simrek iti amin-tiempo a ministerio, a nagbalin a miembro ti pamilia ti Bethel iti opisina ti Sosiedad idiay Australia. Kalpasan a ti Sosiedad ket pinaritan ti gobierno idi 1941, nagbalin nga okupado ni Kabsat Barry iti trabaho iti opisina, a no dadduma matudingan nga agsurat iti material a pangpabileg kadagiti kapammatianna. Pagwadan met no maipapan iti panagministerio iti publiko.
Idi Pebrero 1942, inkallaysa ni Kabsat Barry ti padana nga amin-tiempo nga adipen. Simamatalek a nakipagtrabaho kenkuana ti naayat nga asawana a ni Melba iti amin a tawen a panagserbida iti adu a paset ti daga. Tapno makapagserbida kadagiti ganggannaet a tay-ak, dakkel nga addang ti inaramidda babaen ti iyaatenderda iti maika-11 a klase ti Watchtower Bible School of Gilead idiay Estados Unidos. Naibaonda iti nalabit ibilang ti adu nga ‘ungto ti daga’—idiay Japan. Idi simmangpetda idi Nobiembre 1949, nagserbida kas misionero idiay Kobe, maysa a siudad nga addaan iti puerto. Sangapulo ket dua laeng idi ti manangaskasaba iti naimbag a damag idiay Japan. Nasursuro ni Kabsat Barry ti pagsasao ken dagiti kaugalian iti baro a pagnaedanna ken napatanorna ti nasged a panangipateg kadagiti Hapones, a pinagserbianna iti 25 a tawen. Nabatad kadagiti umad-adu idi a kakabsat a Kristiano idiay Japan ti panagayatna kadagidiay “siuumiso a maikari iti agnanayon a biag,” a nakatulong kenkuana a mangimaton a sieepektibo iti sanga nga opisina iti adu a dekada.
Idi ngalay ti 1975, idi adda agarup 30,000 a Saksi idiay Japan, nayakar dagiti agassawa a Barry idiay Brooklyn, New York. Kas pinulotan-espiritu a Kristiano, naawis ni Kabsat Barry nga agserbi a kas miembro ti Bagi a Manarawidwid dagiti Saksi ni Jehova. (Roma 8:16, 17) Nakatulong unay ti kapadasanna iti panagsurat iti baro nga akemna iti Writing Department. Ti nabaknang a kapadasanna iti sanga nga opisina ken iti sabali a pagilian ket dakkel ti naitulongna kenkuana kas miembro ti Publishing Committee ti Bagi a Manarawidwid.
Iti panaglabas dagiti tawen, saan a nagkupas ti panangipateg ni Kabsat Barry iti Oriente ken kadagiti tattao sadiay. Ammo lattan dagiti estudiante ti Gilead School ken dagiti kameng ti pamilia ti Bethel a sigurado nga adda dagiti makaparagsak a kapadasan maipapan kadagiti adu a nagserbi kas misionero nga itampokna kadagiti palawag ken komentona. Nabnabiag ti pannakailadawan dagiti aktibidad a mainaig iti pannakaikaskasaba ti Pagarian iti “ungto ti daga” no kasta a sigagagar nga isalaysay ni Kabsat Barry dagiti mismo a kapadasanna. Nadakamat ti dadduma kadagitoy iti insalaysayna a mismo a pakasaritaanna a naipablaak iti The Watchtower a Setiembre 15, 1960.
Agtalektayo a kas ‘makipagtawid ken Kristo,’ ti pannakaseknan ni Kabsat Barry kadagidiay “siuumiso a maikari iti agnanayon a biag” ket agtultuloy. Siempre, maikawa unay iti kaawanna dagiti amin a makaam-ammo ken mangay-ayat kenkuana kas naespirituan a tao, a naan-anay a dedikado ken ni Jehova ken addaan nabara a panangipateg iti ili ti Dios. Ngem agrag-otayo ta simamatalek a nagibtur ni Kabsat Barry agingga iti panungpalan ti biagna ditoy daga.—Apocalipsis 2:10.
[Ladawan iti panid 16]
Da Lloyd Barry ken John Barr idi mairuar ti “Insight on the Scriptures” idi 1988
[Ladawan iti panid 16]
Dagiti nagturpos iti maika-11 a klase ti Gilead, iti panagtataripnongda idiay Japan kalpasan ti 40 a tawen