No Aglaplapusanan ti Kinaparabur

NO ADDA gundawayyo a sagutan ti maysa nga ari, ania ti itedyo kenkuana? No ngay isu ti kabaknangan ken kasiriban nga agturay iti lubong? Adda kadi mapanunotyo a sagut a makaay-ayo kenkuana? Agarup tallo ribu a tawenen ti naglabas, inutob ti reyna ti Seba dagita a saludsod bayat nga agsagsagana a sumarungkar iti kasta nga agturay​—ni Ari Solomon iti Israel.

Sigun iti Biblia, karaman iti sagutna ti 120 a talento a balitok “ken rekrekado [“lana ti balsamo,”] a nagwadwad, ken napateg a batbato.” Dagiti balitok laengen ket aggatad iti agarup $40,000,000 no iti panawentayo. Ti lana ti balsamo, a nabanglo ken makaagas a lana, ket naibilang iti balitok a kas napateg a kasapulan. Nupay saan nga ibaga ti Biblia no kasano kaadu ti lana nga insagut ti reyna ken Solomon, ibagana nga awan pay ti pumada iti sagutna.​—1 Ar-ari 10:10.

Talaga a nabaknang ken naparabur a babai ti reyna ti Seba. Ket nasubadan ti kinaparaburna. Kuna ti Biblia: “Ni Ari Solomon intedna ken reyna sadi Seba ti amin a kinayatna, aniaman a kiniddawna, sabali laeng ti kaanatup daydiay nga insangpetna iti ari.” (2 Cronicas 9:12) Pudno, mabalin nga ugali idi dagiti agtuturay ti agsisinnagut; ngem espesipiko a dinakamat ti Biblia ti ‘kinaparabur’ ni Solomon. (1 Ar-ari 10:13) Insurat a mismo ni Solomon: “Ti managparabur a kararua mapalukmegto; ket ti agsibug, isu met laeng masibuganto.”​—Proverbio 11:25.

Siempre, dakkel met a sakripisio iti panawen ken pigsa ti reyna ti Seba idi sinarungkaranna ni Solomon. Agparang a ti Seba ket masarakan iti agdama a Republic of Yemen; isu nga agarup 1,600 a kilometro ti dinaliasat ti reyna ken dagiti kakaduana a nagtagikamelio a nagturong iti Jerusalem. Kas kinuna ni Jesus, “immay manipud kadagiti ungto ti daga.” Apay a kasta unay ti panagregget ti reyna ti Seba? Napan kangrunaanna “tapno dumngeg iti sirib ni Solomon.”​—Lucas 11:31.

Kuna ti 1 Ar-ari 10:1, 2 a ti reyna ti Seba “napan a mangsuot kenkuana [Solomon] kadagiti narikut a saludsod. . . . Impalawagna kenkuana ti amin nga adda iti pusona.” Ania ti inaramid ni Solomon? “Ket ni Solomon simmungbat kenkuana kadagiti amin a saludsodna: awan ti uray ania a nailemmeng iti ari a dina sinungbatan kenkuana.”​—1 Ar-ari 10:3.

Gapu ta nagsiddaaw iti nakita ken nangngeganna, sipapakumbaba a kinuna ti reyna: “Nagasat dagitoy ad-adipenmo, a tumakder a kankanayon iti sangom, ken makangkangngeg iti kinasiribmo!” (1 Ar-ari 10:4-8) Nupay nalikmut dagiti adipen ni Solomon iti kinabaknang, saan a dagita ti rason a nakunana a nagasatda. Imbes ketdi, naparaburan dagiti adipen ni Solomon gapu ta naynay a mangngegda ti inted-Dios a kinasirib ni Solomon. Anian a nagsayaat nga ulidan ti reyna ti Seba kadagiti tattao ni Jehova ita, a mangtagtagiragsak iti sirib ti mismo a Namarsua ken ti Anakna, ni Jesu-Kristo!

Makapainteres met ti simmaruno nga imbaga ti reyna ken Solomon: “Bendito ni Jehova a Diosmo.” (1 Ar-ari 10:9) Nabatad a nakitana a ni Jehova ti adda iti likudan ti kinasirib ken kinarang-ay ni Solomon. Maitunos daytoy iti inkari idi ni Jehova iti Israel. ‘No salimetmetanyo dagiti intedko nga alagaden,’ kinunana, “isu ti siribyo ken sarirityo iti imatang dagiti il-ili, a makangngeg kadagiti al-alagaden, ket kunada, Pudno unay a daytoy dakkel a nasion masirib ken mannakaawat nga ili.”​—Deuteronomio 4:5-7.

Iyaadani iti Mangipapaay iti Sirib

Iti moderno a panawen, minilion ti immadani iti organisasion ni Jehova gapu ta mailasinda a ti “Israel ti Dios” ket “masirib ken mannakaawat nga ili,” saan a gapu ta naikasigudanda, no di ket gapu ta iwanwanwan ida dagiti awan pagkuranganna a linteg ken pagalagadan ti Dios. (Galacia 6:16) Iti kallabes a tawtawen, ti ginasut a ribu a bilang dagiti baro nga adalan a mababautisaran kada tawen ipakitana a kas man la kunkunada iti naespirituan nga Israel: “Dakami kumuyogkaminto kenka, ta nangngegmi a ti Dios adda kenka.” (Zacarias 8:23) Anian ti siddaaw dagitoy kabbaro nga adalan no makitada ti rambak ti naespirituan a taraon nga indiaya ni Jehova kadagiti adipenna! Pulos a dida nakita ti kasta kadagiti dati a relihionda.​—Isaias 25:6.

Panangted iti Katan-okan a Manangted

Gagangay laeng a panunoten dagiti manangapresiar a tattao no ania ti maisubadda iti naruay a parabur ti katan-okan nga Ari ken Manangted, ni Jehova a Dios. Ipalgak ti Biblia a ti kasayaatan a maisaguttayo ken Jehova isu “ti sakripisio ti panagdaydayaw.” (Hebreo 13:15) Apay? Agsipud ta direkta a mainaig daytoy a sakripisio iti maysa a kangrunaan a pakaseknan ni Jehova iti daytoy tiempo ti panungpalan, ti panangsalbar iti biag. (Ezequiel 18:23) Mainayon pay, makaay-ayo a sakripisio no mausar ti pigsa ken panawen a tumulong kadagiti masakit, malmaldaangan, ken dadduma pay.​—1 Tesalonica 5:14; Hebreo 13:16; Santiago 1:27.

Dakkel ti maaramidan ti pinansial a tulong. Pagbalinenda a posible ti pannakaimaldit dagiti Biblia ken naibatay Biblia a literatura, ken pannakagun-od kadagiti patakder a pagtataripnongan dagiti Kristiano. (Hebreo 10:24, 25) Dagiti kontribusion ti paggapuan met dagiti pondo a pangtulong kadagiti biktima ti gubgubat ken natural a didigra.

Nailanad iti Sao ti Dios ti sumagmamano a nagsasayaat a prinsipio a mangiwanwan kadatayo no maipapan iti panangted. Kas pagarigan, isurona a sidadaan ken siraragsak nga ited dagiti Kristiano no ania ti kabaelanda a maipaay, saan ket a nakedngan. (2 Corinto 9:7) Dakkel ti maited dagiti dadduma; bassit laeng ti maited dagiti dadduma, kas iti nakurapay a balo idi kaaldawan ni Jesus. (Lucas 21:2-4) Saan kadi a nakaskasdaaw a ni Jehova​—ti Makinkukua iti intero nga uniberso​—ipategna ti amin a naimpusuan a sagut ken sakripisio a maipaay iti naganna?​—Hebreo 6:10.

Tapno naragsak ti panangtedda, naynay a mapakaammuan ti ili ni Jehova kadagiti nadumaduma a panagkasapulan ken epektibo a pamay-an a mangpunno kadagita a panagkasapulan. Sa tignayen ti nasantuan nga espiritu ni Jehova ti situtulok a puso a tumulong. Kasta ti pinamay-an ti nagkauna nga Israel idi bangonenda ti tabernakulo ken kalpasanna, ti templo. (Exodo 25:2; 35:5, 21, 29; 36:5-7; 39:32; 1 Cronicas 29:1-19) Idi umuna a siglo K.P., kasta met la a pamay-an a napaadda ti kasapulan dagiti Kristiano tapno maidanonda ti naimbag a damag ti Pagarian kadagiti nasion ken tapno matulonganda dagiti kakabsat idiay Israel idi adda bisin.​—1 Corinto 16:2-4; 2 Corinto 8:4, 15; Colosas 1:23.

Kasta met ita, binendisionan ni Jehova ti ilina, ket agtultuloy a bendisionanna ida, babaen ti panangipaayna iti kasapulanda tapno naan-anay a mairingpas ti kadakkelan pay la a trabaho a panangasaba ken panangisuro a maar-aramid iti intero a lubong.​—Mateo 24:14; 28:19, 20.

Ania Dagiti Agdama a Kasapulan?

Kadagiti kallabes a tawen, nairehistron dagiti Saksi ni Jehova kadagiti pagilian a dati a maparparitan ti trabahoda. Kas resultana, dakkel ti rinang-ayan ti bilang dagiti agibumbunannag iti adu kadagitoy a pagilian. Di pagsiddaawan ngarud nga immadu ti agkasapulan kadagiti Biblia ken naibatay-Biblia a literatura.

Uray met kadagiti Kingdom Hall. Agarup 9,000 a baro a Kingdom Hall ti kasapulan ita iti intero a lubong. No maysa a Kingdom Hall ti maibangon kada aldaw, alaenna ti nasurok a 24 a tawen tapno maibangon dagiti Kingdom Hall a masapul iti agdama! Kabayatanna, agarup pito a baro a kongregasion ti mabubuangay kada aldaw, nga adu kadagitoy ket kadagiti di nabaknang a pagilian. Nupay kasta, iti adu kadagitoy a lugar saan a kasapulan dagiti nangina a patakder. Iti dadduma a lugar, umanayen ti $6,000 tapno mapatakder ti kasapulan a Kingdom Hall ken agserbi a nasayaat a pammaneknek iti komunidad.

Idi umuna a siglo, nanamnam-ay ti biag ti dadduma kadagiti Kristiano, isu nga insurat ni apostol Pablo: “Babaen ti panamagpapada anayan koma ti pagsursurokanyo ita met laeng ti pagkurkuranganda, tapno ti pagsursurokanda anayanna met ti pagkurkuranganyo, tapno maaramid koma ti panamagpapada.” (2 Corinto 8:14) Iti kaaldawantayo, adda met ti “panamagpapada” no mangtedtayo kadagiti kasapulan a pondo tapno maipaay iti adu a paset ti lubong dagiti Biblia, literatura ti Biblia, Kingdom Hall, tulong no panawen ti kalamidad, ken dadduma pay. Anian a bendision ti kasta a panangted​—agpadpada iti nangted ken iti immawat!​—Aramid 20:35.

Kas ipakita dagiti surat a maaw-awat ti Sosiedad manipud kadagiti naparabur-panagpuspusona a tattao, adu a managbasa iti daytoy a magasin ti agtarigagay a tumulong ngem dida masierto dagiti nadumaduma a pamay-an a panangted kadagiti kontribusionda. Di pagduaduaan a tumulong a sumungbat kadagiti saludsodda ti naipakuyog a kahon.

Idi panawen ti nadayag a panagturay ni Solomon, isu ket sinarungkaran “amin dagiti ar-ari ti daga” a nakadamag iti maipapan kenkuana. Ngem maysa laeng ti innaganan ti Biblia​—ti reyna ti Seba. (2 Cronicas 9:23) Anian a panagsakripisio ti inaramidna! Ngem nagunggonaan iti kasta unay​—ta idi nalpas ti panagbisitana, “nailabeg iti kasta unay a siddaawna.”​—2 Cronicas 9:4, Today’s English Version.

Iti masanguanan, ni Jehova, ti katan-okan nga Ari ken Manangted, dakdakkelto pay ti aramidenna kadagidiay mangipaay iti sakripisio Kenkuana ngem iti inaramid ni Solomon. Iti kasta, ‘mailabegdanto iti kasta unay a siddaawda,’ saan la a gapu ta isalakan ida ni Jehova iti nakaal-alinggaget nga aldaw ti panangukomna no di ket gapu ta ‘ukradennanto ti imana, ket pennekenna ti tarigagay ti isuamin a nabiag.’​—Salmo 145:16.

[Kahon iti panid 22]

Dagiti Pamay-an ti Panangted a Pilien Dagiti Dadduma

KONTRIBUSION ITI SANGALUBONGAN A TRABAHO

ADU ti mangilasin, wenno mangibadyet iti kantidad nga itinnagda kadagiti kahon ti kontribusion a nasuratan iti “Contributions for the Society’s Worldwide Work​—Matthew 24:14.” Kada bulan ipatulod dagiti kongregasion dagitoy a kantidad iti sangalubongan a hedkuarter sadi Brooklyn, New York, wenno iti lokal a sanga nga opisina.

Mabalin met nga ipatulod a direkta dagiti boluntario a donasion a kuarta iti Watch Tower Bible and Tract Society of the Philippines, P.O. Box 2044, 1060 Manila, wenno iti opisina ti Sosiedad iti pagilianyo. Mabalin met nga idonar dagiti alahas wenno dadduma pay a napapateg a banag. Masapul a mapakuyogan dagitoy a kontribusion iti ababa a surat a mangibaga a dayta ket direkta a sagut.

KONDISIONAL A DONASION NGA URNOS

Mabalin nga italek ti kuarta iti Watch Tower Society babaen ti naisangsangayan nga urnos a, no dumteng ti personal a pakasapulan ti nangidonar, maisubli ti donasion kenkuana. Para iti kanayonan nga impormasion, pangngaasiyo ta agsuratkayo iti Treasurer’s Office iti nadakamat a direksion.

NAIPLANO A PANANGTED

Malaksid pay kadagiti direkta a sagut a kuarta ken dagiti kondisional a donasion a kuarta, addada pay sabali a pamay-an ti panangted nga agpaay iti serbisio ti Pagarian iti intero a lubong. Mairaman kadagitoy ti:

Insurance: Mabalin a ti Watch Tower Society ti maipanagan kas benepisario ti life insurance policy wenno ti retirement/pension plan.

Deposito iti Banko: Mabalin nga italek wenno payable on death iti Watch Tower Society dagiti deposito iti banko, certificate of deposit, wenno individual retirement account, maitunos kadagiti alagaden ti lokal a banko.

Stock ken Bond: Mabalin nga idonar dagiti stock ken bond iti Watch Tower Society kas maysa a direkta a sagut wenno babaen ti maysa nga urnos a ti masapulan ket agtultuloy a maited iti nangidonar.

Real Estate: Mabalin nga idonar iti Watch Tower Society ti mailako a real estate babaen ti panangaramid iti direkta a sagut wenno babaen ti panangireserba iti life estate iti nangidonar, a makapagtultuloy nga agnaed sadiay bayat a sibibiag. Makiuman koma ti maysa iti Sosiedad sakbay ti legal a panangyallatiw kadagiti papeles ti aniaman a real estate iti Sosiedad.

Testamento ken Trust: Mabalin nga ipatawid ti sanikua wenno kuarta iti Watch Tower Society babaen ti legal ti pannakapatalgedna a testamento, wenno ti Sosiedad ti mabalin a maipanagan kas benepisario iti maysa a trust agreement. Mabalin nga addada bentahana iti buis no maysa a relihioso nga organisasion ti benepisario ti trust.

Kas ipasimudaag ti termino a “naiplano a panangted,” dagitoy a kita ti donasion kasapulanda ti panagplano daydiay mangidonar. Tapno matulongan dagiti indibidual nga agtarigagay a mangbenepisio iti Sosiedad baeten ti nagduduma a kita ti naiplano a panangted, insagana ti Sosiedad ti Ingles a broshur a napauluan Planned Giving to Benefit Kingdom Service Worldwide. Naisurat daytoy a broshur a pangsungbat kadagiti adu a saludsod a naawat ti Sosiedad maipapan kadagiti sagut, testamento, ken trust. Naglaon pay kadagiti kanayonan a makatulong nga impormasion kadagiti panagplano iti estate, pinansial, ken buis. Ket nairanta daytoy a tumulong kadagiti indibidual idiay Estados Unidos nga agpalplano a mangipaay iti espesial a sagut iti Sosiedad itan wenno mangibatida iti ipatawid inton pumusayda tapno mapilida ti kasayaatan ken kaalistuan a metodo sigun kadagiti sirkumstansiada a mismo ken ti pamiliada. Mabalinyo ti maaddaan iti kastoy a broshur babaen ti direkta a panangkiddawyo iti kopia manipud Charitable Planning Office.

Kalpasan a nabasada ti broshur ken nakiumanda iti Charitable Planning Office, adu dagidiay nakatulong iti Sosiedad ket maigiddato iti dayta, naaprobetsarda dagiti benepisio no iti panagbuis. Pakaammuanyo koma ti Charitable Planning Office ken ikkanyo ti kopia ti aniaman a nesesita a dokumento maipapan iti uray ania kadagitoy nga urnos. No interesadokayo iti ania man kadagitoy urnos a naiplano a panangted, makiumankayo iti Charitable Planning Office, babaen ti surat wenno telepono, iti direksion a nailista ditoy baba wenno iti opisina ti Sosiedad nga agserserbi iti pagilianyo.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive,

Patterson, New York 12563-9204

Telephone: (914) 306-1000

[Dagiti Ladawan iti panid 23]

Masupsuportaran ti trabaho dagiti Saksi ni Jehova babaen kadagiti boluntario a donasion